ພິທີປະກາດອະໄພຍະໂທດ ຫຼຸດຜ່ອນໂທດ ແລະ ປ່ອຍຕົວນັກໂທດ ທີ່ມີການປະພຶດດີ ເນື່ອງໃນໂອກາດວັນຊາດທີ 2 ທັນວາ ຄົບຮອບ 49 ປີ ໄດ້ຈັດຂຶ້ນໃນວັນທີ 23 ທັນວານີ້, ທີ່ຄ້າຍຄຸມຂັງ-ດັດສ້າງ ກອງບັນຊາການ ປກສ ແຂວງຄໍາມ່ວນ, ໂດຍການເປັນກຽດເຂົ້າ ຮ່ວມຂອງທ່ານ ແກ້ວອຸດອນ ບຸດສິງຂອນ ຮອງເຈົ້າແຂວງຄໍາມ່ວນ ປະ ທານຄະນະກໍາມະການອະໄພຍະໂທດລະດັບແຂວງ, ມີພະ ແນກການທີ່ກ່ຽວຂ້ອງເຂົ້າ ຮ່ວມ.
ສໍາລັບປີ 2024 ແຂວງຄໍາມ່ວນມີຜູ້ທີ່ໄດ້ຮັບອະໄພຍະໂທດຫຼຸດຜ່ອນໂທດ ແລະ ປ່ອຍ ຕົວນັກໂທດ ຈໍານວນທັງໝົດ 195 ຄົນ ຍິງ 31 ຄົນ. ໃນນັ້ນ, ໄດ້ຮັບການປ່ອຍຕົວ 16 ຄົນ ຍິງ 3 ຄົນ (ມີນັກໂທດຄະດີ ຢາເສບຕິດ 15 ຄົນ ແລະ ນັກໂທດທົ່ວໄປ 1 ຄົນ) ແລະ ໄດ້ຮັບອະໄພຍະໂທດ ຫຼຸດຜ່ອນໂທດ 179 ຄົນ ຍິງ 28 ຄົນ (ມີນັກໂທດຢາເສບຕິດ 174 ຄົນ, ນັກໂທດທົ່ວໄປ 5 ຄົນ). ຊຶ່ງຈໍານວນນັກໂທດດັ່ງກ່າວ ແມ່ນບຸກ ຄົນທີ່ມີຄວາມຕື່ນຕົວເຄົາລົບ, ປະຕິບັດລະບຽບກົດໝາຍ, ວິໄນຂອງຄ້າຍໄດ້ດີ, ເປັນຜູ້ທີ່ມີຄວາມບຸກບືນຫ້າວ ຫັນໃນການປະຕິບັດໜ້າທີ່ວຽກງານຂອງຄ້າຍ.
