ໃນວັນທີ 16 ທັນວາ 2024, ພົຈວ ສີເສີດ ສອນລາດາ ຫົວໜ້າກອງບັນຊາການປ້ອງກັນຄວາມສະຫງົບແຂວງສາລະວັນ ກຳມະການປ້ອງກັນຊາດ-ປ້ອງກັນຄວາມສະຫງົບ ໃນງານມະຫາກຳກິລານັກຮຽນມັດທະ ຍົມສຶກສາທົ່ວປະເທດ ຄັ້ງທີ VII ທີ່ແຂວງສາລະວັນ ໄດ້ຮັບກຽດເປັນເຈົ້າພາບ ໃຫ້ສໍາພາດຕໍ່ສື່ມວນຊົນແຂວງວ່າ: ການຈັດງານດັ່ງກ່າວນີ້ ແມ່ນມີຄວາມສຳຄັນທີ່ສຸດ ຕ້ອງໄດ້ເພີ່ມທະວີໃນການຮັກສາຄວາມສະຫງົບ, ຄວາມປອດໄພ ໂດຍສະ ເພາະມີນັກກິລາຈາກບັນດາແຂວງໃນທົ່ວປະເທດ ເຂົ້າຮ່ວມເປັນຈໍານວນຫຼວງຫຼາຍ.
ພົຈວ ສີເສີດ ສອນລາດາ ຫ່າວອີກວ່າ: ເພື່ອຮັບປະກັນດ້ານຄວາມສະຫງົບ, ຄວາມປອດໄພ ໃນໄລຍະການຈັດງານແຂ່ງຂັນກິລາ, ກຳລັງເຈົ້າໜ້າທີ່ຕຳຫຼວດ ແລະ ພາກສ່ວນທີ່ກ່ຽວຂ້ອງທັງໝົດແມ່ນໄດ້ສຸມໃສ່ຈັດຕັ້ງປະຕິບັດຢ່າງເຂັ້ມງວດ ຕາມແຜນຍຸດທະສາດ, ຈັດຕັ້ງກຳລັງປ້ອງກັນເວນຍາມໃນແຕ່ລະຈຸດຕ່າງໆທີ່ສຳຄັນ ໄດ້ເລີ່ມປະຕິບັດມາແຕ່ວັນທີ 2 ທັນວາ 2024 ເປັນຕົ້ນມາ, ມີການປະສານສົມ ທົບກັບບັນດາກຳມະການຕ່າງໆທີ່ກ່ຽວຂ້ອງ, ບັນດາແຂວງໃກ້ຄຽງ, ກະຊວງ ປກຊ-ປກສ ແລະ ໄດ້ນຳເອົາກໍາລັງທັງໝົດ 1.114 ສະຫາຍ ທັງສູນກາງ ແລະ ທ້ອງຖິ່ນ ກະກຽມຄວາມພ້ອມຢ່າງເປັນລະບົບ, ຄົບຊຸດ ເປັນຕົ້ນໄດ້ປະກອບພາຫະນະ, ອຸປະກອນຮັບໃຊ້ໃນດ້ານວິຊາສະເພາະ, ຖືກກັບຫຼັກວິຊາການ ແນໃສ່ຈັດຕັ້ງປະຕິບັດໃຫ້ວ່ອງໄວ, ຮັດກຸມ ແລະ ຮອບດ້ານ. ກໍານົດເອົາ 22 ຈຸດ ໂດຍສະເພາະຈຸດສະຖານທີ່ພັກເຊົາຂອງນັກກິລາ, ສະໜາມກິລາ, ບັນດາເຮືອນພັກ, ໂຮງແຮມ, ສຳນັກງານຫ້ອງການ ແລະ ບັນດາພື້ນຖານໂຄງລ່າງຂອງປະຊາຊົນ, ພິເສດ ໄດ້ສຸມໃສ່ການປ້ອງກັນຄວາມສະຫງົບ ຢູ່ທີ່ສະໜາມເປີດ-ປິດ ໃນວົງໃນ, ທັງກຳລັງປ້ອງກັນຊາດ-ປ້ອງກັນຄວາມສະຫງົບ ແລະ ນຳໃຊ້ອຸປະກອນວິຊາສະເພາະ ເປັນຕົ້ນເຄື່ອງສະແກນທາດເຫຼັກ, ທາດລະເບີດ, ສະແກນພາຫະນະ ທຸກຊະນິດ ແລະ ຄົນເຂົ້າ-ອອກ ຢ່າງເປັນລະບົບ, ທັງໄດ້ນຳໃຊ້ກຳລັງວິຊາສະເພາະ, ນຳໃຊ້ໝາ ວິຊາສະເພາະ ເພື່ອນຳສືບຄົ້ນຫາ ແລະ ບັນຫາອາດຊະຍາກຳຕ່າງໆ, ໃນສະຖານທີ່ດັ່ງກ່າວໄດ້ນຳໃຊ້ກຳລັງທັງ ໝົດ 350 ສະຫາຍ, ມາຮອດປັດຈຸບັນເຫັນວ່າ ມີຄວາມສະຫງົບ ຮັບປະກັນ 100%.
ໃນໂອກາດນີ້, ທ່ານຫົວໜ້າກອງບັນຊາການ ປກສ ແຂວງ ກໍໄດ້ສະແດງຄວາມຊົມເຊີຍຕໍ່ກັບທຸກພາກສ່ວນໃນສັງຄົມ ທີ່ໄດ້ເອົາໃຈໃສ່ໃນການຮັກສາຄວາມສະຫງົບ, ຄວາມເປັນລະບົບຮຽບຮ້ອຍ ແລະ ເປັນເຈົ້າພາບທີ່ດີຮ່ວມກັນ ແລະ ຮຽກຮ້ອງທຸກຊັ້ນຄົນ ທີ່ໄດ້ມາຮ່ວມງານ, ມາທ່ຽວ ຫຼື ມາຊົມການແຂ່ງຂັນ ຂໍໃຫ້ເອົາໃຈໃສ່ມີສະຕິລະວັງຕົວ ເພື່ອປົກປ້ອງຕົນເອງໃຫ້ມີຄວາມປອດໄພໃນການເດີນທາງໄປມາ ໃຫ້ມີຄວາມປອດໄພ ແລະ ເປັນລະ ບຽບຮຽບຮ້ອຍ.
