ວິທະຍາຄານສັນຕິບານປະຊາຊົນ (ວສປ) ກະຊວງ ປກສ ໄດ້ຈັດພິທີປະກາດເລື່ອນຊັ້ນໃຫ້ນາຍ ແລະ ພົນຕຳຫຼວດ ແລະ ປາຖະກະຖາ 2 ວັນປະຫວັດສາດ ຂຶ້ນໃນວັນທີ 12 ທັນວາ 2024, ເປັນປະທານໂດຍ ພົຈວ ປອ ບຸນຊະນະ ສິມມາລາວົງ ຫົວໜ້າອໍານວຍການ ວສປ, ມີບັນດາຄະນະພັກ-ຄະນະອຳນວຍການ, ພະນັກງານຄູ-ອາຈານ, ນາຍ ແລະ ພົນຕຳຫຼວດ ທີ່ໄດ້ຮັບການເລື່ອນຊັ້ນ ເຂົ້າຮ່ວມ.
ພັທ ພອນສະໜິດ ພິມມະວົງສາ ຮອງຫົວໜ້າຫ້ອງການເມືອງ ວສປ ໄດ້ຜ່ານຂໍ້ຕົກລົງ ວ່າດ້ວຍການປະຕິບັດນະໂຍບາຍຍົກຂັ້ນເງິນເດືອນ ໃຫ້ນາຍຕຳຫຼວດ ວສປ. ໃນນີ້, ຍົກຂັ້ນເງິນເດືອນຊັ້ນ ພັນໂທ ຂຶ້ນເປັນຊັ້ນ ພັນເອກ 1 ສະຫາຍ.
ຜ່ານຂໍ້ຕົກລົງ ວ່າດ້ວຍ ການເລື່ອນຊັ້ນໃຫ້ນາຍ ແລະ ພົນຕຳຫຼວດ ວສປ ຈຳນວນ 70 ສະຫາຍ ດັ່ງນີ້: ເລຶ່ອນຊັ້ນ ພັນຕີ ຂຶ້ນເປັນຊັ້ນ ພັນໂທ 4 ສະຫາຍ, ຮ້ອຍເອກ ຂຶ້ນເປັນຊັ້ນ ພັນຕີ 12 ສະຫາຍ ຍິງ 3 ສະຫາຍ, ຮ້ອຍໂທ ຂຶ້ນເປັນຊັ້ນ ຮ້ອຍເອກ 8 ສະຫາຍ, ຮ້ອຍຕີ ຂຶ້ນເປັນຊັ້ນ ຮ້ອຍໂທ 38 ສະຫາຍ ຍິງ 5 ສະຫາຍ, ວາທີ ຂຶ້ນເປັນຊັ້ນ ຮ້ອຍຕີ 7 ສະຫາຍ, ສິບຕີ ຂຶ້ນເປັນຊັ້ນ ສິບໂທ 1 ສະຫາຍ ຍິງ 1 ສະຫາຍ ປະດັບຊັ້ນໂດຍ ພົຈວ ປອ ບຸນຊະນະ ສິມມາລາວົງ ຫົວໜ້າອຳນວຍການ ວສປ.
ໃນພິທີ, ພົຈວ ປອ ບຸນຊະນະ ສິມມາລາວົງ ກໍໄດ້ໂອ້ລົມຕໍ່ພິທີ ໂດຍສະເພາະ ຕໍ່ນາຍ ແລະ ພົນຕໍາຫຼວດຜູ້ທີ່ໄດ້ຮັບການເລື່ອນຊັ້ນໃໝ່ໃນຄັ້ງນີ້ ພ້ອມທັງປາຖະກະຖາຫວນຄືນມູນເຊື້ອວັນຊາດທີ 2 ທັນວາ ຄົບຮອບ 49 ປີ (2 ທັນວາ 1975-2 ທັນວາ 2024) ແລະ ວັນ ເກີດປະທານ ໄກສອນ ພົມວິຫານ ຄົບຮອບ 104 ປີ (13 ທັນວາ 1920-13 ທັນວາ 2024) ເພື່ອແນໃສ່ເຮັດໃຫ້ນາຍ ແລະ ພົນຕຳ ຫຼວດ ວສປ ກຳໄດ້ເນື້ອໃນເອກະສານທີ່ເປັນມູນເຊື້ອປະຫວັດສາດທີ່ສຳຄັນຂອງພັກ-ຂອງຊາດ ແລະ ນໍາເອົາມູນເຊື້ອດັ່ງກ່າວຫັນເຂົ້າແບບແຜນວິທີເຮັດວຽກໃຫ້ຖືກຕ້ອງ ແລະ ສອດຄ່ອງກັບພຶດຕິກຳຕົວຈິງ ເພື່ອເຮັດສໍາເລັດໜ້າທີ່ການເມືອງທີ່ພັກ-ລັດມອບ ໝາຍໃຫ້.
ນອກຈາກນີ້, ໃນພິທີກໍຍັງໄດ້ເຊື່ອມຊຶມຄໍາແນະນໍາກ່ຽວກັບ ການຈັດຕັ້ງປະຕິບັດວຽກງານປະກັນສັງຄົມໃນກຳລັງ ປກສ ສະບັບເລກທີ 4725/ກມປສ, ລົງວັນທີ 29 ຕຸລາ 2024; ເຊື່ອມຊຶມຄຳແນະນຳກ່ຽວກັບ ການຈັດຕັ້ງປະຕິບັດຂໍ້ຕົກລົງ ວ່າດ້ວຍ ການປະກັນສຸຂະພາບຕາມລະບົບປະກັນສັງຄົມ ສະບັບເລກທີ 4777/ກມປສ, ລົງວັນທີ 18 ພະຈິກ 2024 ເພື່ອກຳນົດຫຼັກການ, ລະບຽບການ ແລະ ມາດຕະການ ກ່ຽວກັບການຄຸ້ມຄອງ, ຕິດຕາມ, ກວດກາ ວຽກງານການປະກັນສຸຂະພາບ ຕາມລະບົບປະກັນສັງຄົມ ໃນກຳລັງປ້ອງກັນຄວາມສະຫງົບ ເພື່ອເຮັດໃຫ້ການຈັດຕັ້ງປະຕິບັດວຽກງານດັ່ງກ່າວເປັນລະບົບ, ມີປະສິດ ທິພາບ ແລະ ປະສິດທິຜົນ ແນໃສ່ຮັບປະກັນໃຫ້ສະມາຊິກປະກັນສັງຄົມ ທີ່ໄດ້ຮັບການປະກັນສຸຂະພາບເຂົ້າເຖິງການບໍລິການປິ່ນປົວຢ່າງສະເໝີພາບ, ທົ່ວເຖິງ ແລະ ຍຸຕິທຳ.
