ໃນຕອນບ່າຍວັນທີ 11 ຕຸລາ 2024, ທີ່ສະພາແຫ່ງຊາດລາວ, ສະຫາຍ ໄຊສົມພອນ ພົມວິຫານ ປະທານສະພາແຫ່ງຊາດລາວ ໄດ້ຕ້ອນຮັບ ແລະ ພົບປະກັບ ສະຫາຍ ຫລີ ສຽງ ນາຍົກລັດຖະ ມົນຕີແຫ່ງ ສປ ຈີນ ແລະ ຄະນະ ໃນໂອກາດເດີນທາງມາເຂົ້າຮ່ວມກອງປະຊຸມສຸດຍອດອາຊຽນ-ຈີນ ຄັ້ງທີ 27 ແລະ ບັນດາກອງປະຊຸມສຸດຍອດທີ່ກ່ຽວຂ້ອງ ຢູ່ນະຄອນຫລວງວຽງຈັນ ໃນລະ ຫວ່າງວັນທີ 8-11 ຕຸລາ 2024 ແລະ ໃນໂອກາດເດີນທາງຢ້ຽມຢາມ ສປປ ລາວ ທາງການ ໃນວັນທີ 11-12 ຕຸລາ 2024 .
ສະຫາຍ ໄຊສົມພອນ ພົມວິຫານ ໄດ້ສະແດງຄວາມຍິນດີຕ້ອນຮັບ ແລະ ຕີລາຄາສູງຕໍ່ການຢ້ຽມຢາມ ແລະ ເຂົ້າ ຮ່ວມກອງປະຊຸມສຸດຍອດອາຊຽນໃນຄັ້ງນີ້, ເຊິ່ງເປັນການໃຫ້ການສະໜັບ ສະໜູນອັນສຳຄັນ ແລະ ທັງເປັນການປະກອບສ່ວນຮັດແໜ້ນ ແລະ ເສີມຂະຫຍາຍສາຍພົວພັນ ມິດຕະພາບອັນເປັນມູນເຊື້ອ ແລະ ຄູ່ຮ່ວມຍຸດທະສາດຮອບດ້ານ ໝັ້ນຄົງ ຍາວນານ ຕາມທິດ 4 ດີ ລະຫວ່າງ ສອງພັກ, ສອງລັດ ແລະ ປະຊາຊົນສອງຊາດ ແລະ ການເປັນຄູ່ຮ່ວມຊາຕາກໍາສັງຄົມນິຍົມ ລາວ-ຈີນ, ຈີນ-ລາວ ໃຫ້ນັບມື້ເປັນຮູບປະທຳ ແລະ ເພື່ອນຳເອົາຜົນປະໂຫຍດສູງ ສຸດມາສູ່ປະຊາຊົນສອງຊາດ ລາວ-ຈີນ.
ພ້ອມກັນນີ້, ສະຫາຍ ປະທານສະພາແຫ່ງຊາດ ກໍໄດ້ສະ ແດງຄວາມຊົມເຊີຍຢ່າງສຸດໃຈ ແລະ ຕີລາຄາສູງຕໍ່ຜົນສໍາເລັດອັນໃຫຍ່ຫລວງຮອບດ້ານ ທີ່ປະຊາຊົນຈີນອ້າຍນ້ອງຍາດມາໄດ້ ຕະຫຼອດ ໄລຍະ 75 ປີ ຜ່ານມາ ພາຍໃຕ້ການນຳພາອັນເດັດດ່ຽວຂອງພັກກອມມູນິດຈີນ ອັນມີສະຫາຍ ເລຂາທິການໃຫຍ່, ປະທານປະເທດ ສີ ຈິ້ນ ຜິງ ເປັນແກນກາງ ໂດຍສະເພາະ ແມ່ນຜົນສໍາເລັດ ໃນພາລະກິດສ້າງສາພັດທະນາສັງຄົມນິຍົມ ຕາມສີສັນພິເສດຂອງຈີນ ທີ່ໄດ້ຍຶດຖືເອົາການສະແຫວງຫາຄວາມພາສຸກ ໃຫ້ແກ່ປະຊາ ຊົນເປັນຈຸດສຳຄັນ, ເຮັດໃຫ້ ສປ ຈີນ ມີການພັດທະນາຢ່າງກ້າວກະໂດດ, ສ້າງປະເທດຈີນ ໃຫ້ເປັນປະ ເທດສັງຄົມ ນິຍົມທີ່ທັນສະໄໝ ແລະ ເຂັ້ມແຂງ, ຈະເລີນຮຸ່ງເຮືອງ ກາຍເປັນຕົ້ນແບບທີ່ດີໃຫ້ແກ່ປະເທດຕ່າງໆໃນໂລກ; ຂໍ້ລິ ເລີ່ມວ່າ ດ້ວຍການພັດທະນາທົ່ວໂລກ ກໍຄື ຂໍ້ລິເລີ່ມ ໜຶ່ງແລວ ໜຶ່ງເສັ້ນທາງ ແລະ ຂໍ້ລິເລີ່ມວ່າດ້ວຍຄວາມ ໝັ້ນຄົງໃນທົ່ວ ໂລກ ໄດ້ຮັບການຕອບຮັບຢ່າງກວ້າງຂວາງ ເຮັດໃຫ້ບົດບາດ ແລະ ອິດທິພົນ ຂອງ ສປ ຈີນ ນັບມື້ນັບສູງເດັ່ນຂຶ້ນ ໃນເວທີພາກພື້ນ ແລະ ສາກົນ. ພ້ອມກັນນີ້, ສະຫາຍປະທານສະພາແຫ່ງຊາດ, ຍັງໄດ້ຕີລາຄາສູງຕໍ່ການພົວພັນຮ່ວມມື ລະຫວ່າງ ສະພາແຫ່ງຊາດລາວ ແລະ ສະພາຜູ້ ແທນປະຊາຊົນທົ່ວປະເທດຈີນ ທີ່ມີການພົວພັນຮ່ວມມື ທີ່ເປັນມູນເຊື້ອອັນດີງາມມາແຕ່ດົນນານ ແລະ ໄດ້ຮັບການເສີມຂະຫຍາຍຢ່າງຕໍ່ເນື່ອງ ແລະ ເປັນຮູບປະທໍາ, ເຊິ່ງສອງຝ່າຍ ໄດ້ຈັດຕັ້ງຜັນຂະຫຍາຍຂໍ້ຕົກລົງການຮ່ວມມື ລະ ຫວ່າງສອງອົງການນິຕິບັນຍັດ ໃນລະດັບສູນກາງ ແລະ ທ້ອງຖິ່ນ, ມີການແລກປ່ຽນການຢ້ຽມຢາມ ຂອງຄະນະຜູ້ແທນຂັ້ນສູງ ແລະ ຂັ້ນຕ່າງໆ, ແລກປ່ຽນບົດຮຽນ, ຮ່ວມກັນຈັດສໍາມະນາ ແລະ ຝຶກອົບຮົມ, ທັດສະນະສຶກສາ ກ່ຽວກັບການຈັດຕັ້ງປະຕິບັດພາລະບົດບາດຂອງສອງອົງການນິຕິບັນຍັດ.
ນອກຈາກນີ້, ສອງຝ່າຍ ຍັງໄດ້ສະໜັບສະໜູນ ເຊິ່ງກັນ ແລະກັນ ໃນເວທີລັດຖະສະພາພາກພື້ນ ແລະ ສາກົນ ເປັນຕົ້ນ AIPA, IPU, ASEP, APPF. ໃນທ້າຍເດືອນຕຸລາ 2024, ສະພາແຫ່ງຊາດລາວ ກໍຈະໄດ້ເປັນເຈົ້າພາບຈັດກອງປະຊຸມສະມັດຊາໃຫຍ່ ລັດຖະສະພາລະຫວ່າງຊາດອາຊຽນ ຫຼື ໄອປາ ຄັ້ງທີ 45. ພິເສດ ໃນເດືອນກັນຍາ ປີ 2023, ສອງຝ່າຍ ກໍໄດ້ລົງນາມຂໍ້ຕົກລົງວ່າດ້ວຍການຮ່ວມມື ລະຫວ່າງ ສະພາແຫ່ງຊາດລາວ ແລະ ສະພາຜູ້ ແທນປະຊາຊົນທົ່ວປະເທດຈີນ, ເຊິ່ງເປັນນິຕິກໍາ ສະບັບທຳອິດຂອງສອງອົງການນິຕິບັນຍັດ. ໃນໂອກາດນີ້, ສະ ຫາຍ ໄຊສົມພອນ ພົມວິຫານ ກໍໄດ້ຝາກຄວາມຢື້ຢາມຖາມຂ່າວອັນອົບອຸ່ນ ແລະ ພອນໄຊອັນປະເສີດ ໄປຍັງ ສະຫາຍ ຈ້າວ ເລີ້ຈີ້ ປະທານສະພາຜູ້ແທນ ປະຊາຊົນທົ່ວປະ ເທດ ແຫ່ງ ສປ ຈີນ, ຄະນະປະຈໍາ ແລະ ສະມາຊິກສະພາຜູ້ແທນ ປະຊາຊົນທົ່ວປະເທດຈີນ ທຸກທົ່ວໜ້າ.
ໂອກາດນີ້, ສະຫາຍ ຫລີ ສຽງ ກໍໄດ້ສະແດງຄວາມຂອບໃຈຕໍ່ການຕ້ອນຮັບອັນອົບອຸ່ນ ແລະ ສະແດງຄວາມໝາຍໝັ້ນວ່າ ຈະສືບຕໍ່ໃຫ້ການຮ່ວມມື ແລະ ສະໜັບສະໜູນ ສປປ ລາວ ໃນອະນາຄົດ ແລະ ກໍສະແດງຄວາມຊົມເຊີຍຕໍ່ຜົນສໍາເລັດຂອງການພົວພັນຮ່ວມມື ລະຫວ່າງ ສອງອົງການນິຕິ ບັນຍັດຈີນ-ລາວ ທີ່ຍາດມາໄດ້ໃນຕະຫຼອດໄລຍະຜ່ານມາ, ອັນໄດ້ປະກອບສ່ວນສໍາຄັນ ເຂົ້າໃນການເສີມຂະຫຍາຍສາຍພົວພັນ ມິດຕະພາບອັນເປັນມູນເຊື້ອ ແລະ ຄູ່ຮ່ວມຍຸດທະສາດຮອບດ້ານ ໝັ້ນຄົງຍາວນານ ຕາມທິດ 4 ດີ ລະຫວ່າງ ສອງພັກ, ສອງລັດ ແລະ ປະຊາຊົນສອງຊາດ ແລະ ການເປັນຄູ່ຮ່ວມຊະຕາກໍາສັງຄົມ ນິຍົມ ລາວ-ຈີນ, ຈີນ-ລາວ ໃຫ້ນັບມື້ເປັນຮູບປະທຳ ແລະ ເພື່ອນຳເອົາຜົນປະໂຫຍດ ສູງສຸດມາສູ່ປະຊາຊົນສອງຊາດ ລາວ-ຈີນ. ພ້ອມທັງ ໄດ້ອວຍ ພອນໃຫ້ການເປັນປະທານກອງປະຊຸມໄອປາ ຄັ້ງທີ 45 ທີ່ ສະ ພາແຫ່ງຊາດລາວ ຈະເປັນເຈົ້າພາບໃນມໍ່ໆນີ້ ປະສົບຜົນສໍາເລັດຢ່າງຈົບງາມ.
