ໃນວັນທີ 12 ຕຸລາ 2024, ທີ່ທຳນຽບປະທານປະເທດ, ພະນະທ່ານ ທອງລຸນ ສີສຸລິດ ປະທານປະເທດ ແຫ່ງ ສປປ ລາວ ໄດ້ຕ້ອນຮັບການເຂົ້າຢ້ຽມຂ່ຳນັບຂອງ ພະນະທ່ານ ລໍເຣັນສ໌ ວອງ (Lawrence WONG), ນາຍົກລັດຖະມົນຕີ ແຫ່ງ ສາທາລະນະລັດ ສິງກະໂປ, ໃນໂອກາດເດີນທາງມາຢ້ຽມຢາມ ສປປ ລາວ ຢ່າງເປັນທາງການ ແລະ ເຂົ້າຮ່ວມກອງປະຊຸມສຸດຍອດອາຊຽນ ຄັ້ງທີ 44 ແລະ 45 ແລະ ບັນດາກອງປະຊຸມສຸດຍອດທີ່ກ່ຽວຂ້ອງ ຢູ່ ນະຄອນຫຼວງວຽງຈັນ.
ໃນໂອກາດນີ້, ພະນະທ່ານ ທອງລຸນ ສີສຸລິດ ໄດ້ສະແດງຄວາມຍິນດີຕ້ອນຮັບ ແລະ ຊົມເຊີຍຕໍ່ ພະນະທ່ານ ລໍເຣັນສ໌ ວອງ ທີ່ໄດ້ຮັບການແຕ່ງຕັ້ງໃຫ້ເປັນ ນາຍົກລັດຖະ ມົນຕີ ຄົນທີ 4 ແຫ່ງ ສ ສິງກະໂປ ໃນເດືອນ ພຶດສະພາ ຜ່ານມາ, ຊຶ່ງສະແດງໃຫ້ເຫັນເຖິງຄວາມເຊື່ອໝັ້ນຕໍ່ຄວາມຮູ້ຄວາມສາມາດ ແລະ ວິໄສທັດອັນກວ້າງໄກໃນການສືບຕໍ່ບໍລິຫານ ແລະ ນໍາພາປະເທດ, ພ້ອມທັງໄດ້ຕີລາຄາສູງຕໍ່ການຢ້ຽມຢາມທາງການ ສປປ ລາວ ຄັ້ງນີ້ ຊຶ່ງມີຂຶ້ນໃນທ່າມກາງທີ່ສອງປະເທດ ກຳລັງສະເຫຼີມສະຫຼອງສາຍພົວ ພັນການທູດ ຄົບຮອບ 50 ປີ (2 ທັນວາ 1974-2024) ປະກອບສ່ວນສຳຄັນເຂົ້າໃນການເພີ່ມທະວີຮັດແໜ້ນສາຍພົວພັນມິດຕະພາບ ແລະ ການຮ່ວມມືອັນດີງາມ ລະຫວ່າງ ສປປ ລາວ ແລະ ສ ສິງກະໂປ ໃຫ້ນັບມື້ແໜ້ນແຟ້ນຍິ່ງຂຶ້ນ. ພ້ອມນີ້, ກໍ່ໄດ້ຕີລາຄາສູງຕໍ່ຜົນສຳເລັດຂອງກອງປະຊຸມພົບປະສອງຝ່າຍ ລະຫວ່າງ ສອງນາຍົກລັດຖະມົນຕີ ລາວ 7-ສິງກະໂປ ທີ່ໄດ້ເຫັນດີເປັນເອກະພາບສືບຕໍ່ຜັນຂະຫຍາຍບັນດາໝາກຜົນຂອງການຮ່ວມມືໃນໄລຍະຜ່ານມາໃຫ້ແຕກດອກອອກຜົນ.
ຍິ່ງໆຂຶ້ນ; ເຫັນດີໃຫ້ສືບຕໍ່ການພົບປະຢ້ຽມຢາມຂອງຄະ ນະຜູ້ແທນຂັ້ນສູງສອງປະເທດ ຢ່າງເປັນປົກກະຕິ, ຊຸກຍູ້ການຮ່ວມມືໃນຂະແໜງການຕ່າງໆເປັນຕົ້ນດ້ານການເມືອງ, ເສດຖະກິດ ກໍຄືການຄ້າ ແລະ ການລົງທຶນ, ການຊື້-ຂາຍພະລັງງານໄຟຟ້າ, ສິນເຊື່ອກາກບອນ (Carbon Credit), ການສະໜອງສະບຽງອາຫານ, ການຮ່ວມມືດ້ານສາທາລະນະສຸກ, ການສົ່ງເສີມການໄປມາຫາສູ່ຂອງປະຊາ ຊົນສອງຊາດ ແລະ ຂະແໜງການອື່ນໆທີ່ມີທ່າແຮງຮ່ວມ ກັນ; ສືບຕໍ່ໃຫ້ການສະໜັບ ສະໜູນ ເເລະ ຊ່ວຍເຫຼືອເຊິ່ງກັນ ເເລະ ກັນ ໃນເວທີພາກພື້ນ ແລະ ສາກົນ, ຕັ້ງຫນ້າຮັກສາສະຖຽນລະພາບ, ສັນຕິພາບ ແລະ ຄວາມຮັ່ງມີຂອງພາກພື້ນ ແລະ ຄອບຄົວອາຊຽນ. ໃນໂອກາດດຽວກັນນີ້, ພະນະທ່ານ ທອງລຸນ ສີສຸລິດ ໄດ້ສະແດງຄວາມຂອບໃຈຢ່າງຈິງໃຈມາຍັງ ລັດຖະບານ ແລະ ປະຊາຊົນ ສິງກະໂປ ທີ່ໄດ້ໃຫ້ການສະໜັບສະໜູນຊ່ວຍເຫຼືອ ສປປ ລາວ ຕະຫຼອດໄລຍະຜ່ານມາ ເປັນຕົ້ນ ການພັດທະນາຊັບພະຍາກອນມະນຸດ ແລະ ໂຄງການອາສາສະໝັກສິງກະໂປ, ການຊ່ວຍເຫຼືອໃນການຮັບມືກັບພະຍາດໂຄວິດ-19, ການສະໜັບສະໜູນ ສປປ ລາວ ໃນການເປັນປະທານອາຊຽນ ປີ 2024, ພິເສດ ການຊ່ວຍເຫຼືອປະຊາຊົນລາວ ທີ່ປະສົບໄພນ້ຳຖ້ວມໃນຕົ້ນເດືອນກັນຍາ 2024 ຜ່ານມາ. ພ້ອມນີ້, ກໍ່ໄດ້ຝາກຄວາມຢື້ຢາມຖາມຂ່າວອັນອົບອຸ່ນໄປຍັງ ພະນະທ່ານ ທາມັນ ຊາມູກາຣັດນຳ (H.E. Tharman Shanmurgaratnum), ປະທານາທິ ບໍດີ ແຫ່ງ ສາທາລະນະລັດ ສິງກະໂປ ແລະ ພະນະທ່ານ ລີ ຊຽນ ລຸງ (H.E. Lee Hsien Loong), ລັດຖະມົນຕີອາວຸໂສ, ອະດີດນາຍົກລັດຖະມົນຕີ ພ້ອມທັງເຊື້ອເຊີນຢ້ຽມຢາມ ສປປ ລາວ ໃນໂອກາດທີ່ເໝາະສົມ.
ໃນຂະນະດຽວກັນ, ພະນະທ່ານ ລໍເຣັນສ໌ ວອງ ໄດ້ສະແດງຄວາມຂອບໃຈຕໍ່ການຕ້ອນຮັບອັນອົບອຸ່ນ ແລະ ຍິນດີຈະສືບຕໍ່ໃຫ້ການຮ່ວມມື ແລະ ສະໜັບສະໜູນຊ່ວຍເຫຼືອເຊິ່ງກັນ ແລະ ກັນ, ຈະຮ່ວມກັນຈັດຕັ້ງຜັນຂະຫຍາຍບັນດາສັນຍາທີ່ໄດ້ລົງນາມຮ່ວມກັນ ໃຫ້ເປັນຮູບປະທຳຍິ່ງຂຶ້ນ, ຈະຊຸກຍູ້ໃຫ້ພາກສ່ວນກ່ຽວຂ້ອງຂອງສິງກະໂປ ປະສານສົມທົບກັບຝ່າຍລາວ ຢ່າງໃກ້ຊິດ ເພື່ອຂະຫຍາຍການຮ່ວມມືໃນຂະແໜງການທີ່ມີທ່າແຮງຮ່ວມກັນ, ສືບຕໍ່ສະໜັບສະໜູນເຊິ່ງກັນ ແລະ ກັນ ໃນເວທີພາກພື້ນ ແລະ ສາກົນ, ນຳເອົາຜົນປະໂຫຍດຕົວຈິງມາສູ່ປະຊາຊົນທັງສອງປະເທດ ກໍ່ຄື ນຳເອົາຄວາມສົມບູນພູນສຸກມາສູ່ປະຊາ ຄົມອາຊຽນ.
