ໂດຍຕອບສະໜອງຕາມຄໍາເຊື້ອເຊີນຂອງ ສະຫາຍ ສອນໄຊ ສີພັນດອນ, ນາຍົກລັດຖະມົນຕີ ແຫ່ງ ສປປ ລາວ, ສະຫາຍ ຫຼີ ສຽງ, ນາຍົກລັດຖະມົນຕີ ແຫ່ງ ສປ ຈີນ ໄດ້ເດີນທາງມາຢ້ຽມ ຢາມ ສປປ ລາວ ຢ່າງເປັນທາງການ ແລະ ເຂົ້າຮ່ວມກອງປະ ຊຸມ ສຸດຍອດອາຊຽນ ທີ່ ສປປ ລາວ ໃນລະຫວ່າງວັນທີ 09-12 ຕຸລາ 2024, ເພື່ອສືບຕໍ່ຮັດແຫນ້ນສາຍພົວພັນມິດຕະພາບທີ່ເປັນມູນເຊື້ອ, ການພົວພັນຮ່ວມມືແບບຄູ່ຮ່ວມຍຸດທະສາດຮອບດ້ານ ໝັ້ນຄົງຍາວນານ ຕາມທິດ 4 ດີ ກໍ່ຄື ການເປັນຄູ່ຮ່ວມຊາຕາກໍາ ລາວ- ຈີນ, ຈີນ-ລາວ ລະຫວ່າງສອງປະເທດ ໃຫ້ເລິກເຊິ່ງກວ່າເກົ່າ.
ພິທີຕ້ອນຮັບຢ່າງເປັນທາງການ ໄດ້ຈັດຂຶ້ນໃນຕອນເຊົ້າຂອງວັນທີ 12 ຕຸລາ 2024 ທີ່ ສໍານັກງານນາຍົກລັດຖະ ມົນຕີ ໂດຍການເຂົ້າຮ່ວມຂອງຄະນະທາງການຂອງສອງປະເທດ ນໍາໂດຍ ສະຫາຍ ນາຍົກລັດຖະມົນຕີ ສອນໄຊ ສີພັນດອນ ແລະ ສະ ຫາຍ ນາຍົກລັດຖະມົນຕີ ຫຼີ ສຽງ. ຫຼັງຈາກນັ້ນ, ນາຍົກລັດຖະມົນຕີຂອງສອງປະເທດ ແລະ ຄະນະ ໄດ້ດໍາເນີນການພົບປະສອງຝ່າຍຢ່າງເປັນທາງການ ເພື່ອຮ່ວມກັນທົບທວນຄືນການພົວພັນຮ່ວມມືສອງຝ່າຍໃນດ້ານຕ່າງໆ ພ້ອມທັງກໍານົດທິດ ທາງການ ຮ່ວມມືໃນຕໍ່ໜ້າ.
ໃນໂອກາດນີ້, ສະຫາຍ ນາຍົກລັດຖະມົນຕີ ສອນໄຊ ສີພັນດອນ ໄດ້ສະແດງຄວາມຍິນດີຕ້ອນຮັບ ແລະ ຕີລາຄາສູງຕໍ່ການ ເດີນທາງມາເຂົ້າຮ່ວມກອງປະຊຸມສຸດຍອດອາຊຽນ ແລະ ສືບຕໍ່ດໍາເນີນ ການຢ້ຽມຢາມ ສປປ ລາວ ຢ່າງເປັນທາງການໃນຄັ້ງນີ້, ພ້ອມທັງໄດ້ຕາງໜ້າພັກ, ລັດຖະ ບານ ແລະ ປະຊາຊົນລາວ ສະແດງຄໍາ ອວຍພອນຕໍ່ພັກ, ລັດຖະບານ ແລະ ປະຊາຊົນຈີນອ້າຍ ນ້ອງ ເນື່ອງໃນໂອກາດສະເຫຼີມສະຫຼອງ ວັນສະຖາປະນາ ສາທາ ລະນະ ລັດ ປະຊາຊົນຈີນ ຄົບຮອບ 75 ປີ ໃນຕົ້ນເດືອນຕຸລາ 2024 ຜ່ານມາ.
ສອງຝ່າຍໄດ້ຕີລາຄາສູງຕໍ່ສາຍພົວພັນມິດຕະພາບອັນເປັນມູນເຊື້ອ, ການເປັນຄູ່ຮ່ວມຍຸດທະສາດຮອບດ້ານ ໝັ້ນຄົງ ຍາວ ນານ ຕາມທິດ 4 ດີ ແລະ ການເປັນຄູ່ຮ່ວມຊາຕາກໍາ ລາວ-ຈີນ, ຈີນ-ລາວ ທີ່ໄດ້ຮັບການເສີມຂະຫຍາຍດ້ວຍຄຸນນະພາບໃໝ່ຢ່າງບໍ່ຢຸດຢັ້ງ ທັງທາງກວ້າງ ແລະ ທາງເລິກ, ສອງຝ່າຍ ໄດ້ຮ່ວມກັນຈັດຕັ້ງປະຕິບັດ “ແຜນແມ່ບົດ ວ່າດ້ວຍ ການສ້າງຄູ່ຮ່ວມຊາຕາກໍາ ລາວ-ຈີນ“ ສະບັບໃໝ່ (2024-2028) ຢ່າງຕັ້ງໜ້າ ແລະ ກ້າວເຂົ້າສູ່ລວງເລິກ ດ້ວຍມາດຕະຖານ, ຄຸນນະພາບ ແລະ ລະ ດັບທີ່ສູງກວ່າເກົ່າ. ສອງຝ່າຍໄດ້ແຈ້ງສະພາບການຢູ່ພາບໃນປະ ເທດໂດຍສັງເຂບໃຫ້ກັນຊາບ ພ້ອມທັງໄດ້ສະຫລູບຕີລາ ຄາໝາກຜົນຂອງການພົວພັນຮ່ວມມືໃນໄລຍະຜ່ານມາ, ໄດ້ລົງເລິກປຶກ ສາຫາລື ແລະ ແລກປ່ຽນຄໍາຄິດເຫັນຕໍ່ກັບການຮ່ວມ ມືດ້ານຕ່າງໆ ເຊັ່ນ: ການຮ່ວມມືດ້ານເສດຖະກິດ- ການຄ້າ ແລະ ການ ລົງທຶນ ແມ່ນນັບມື້ນັບໄດ້ຮັບການຂະຫຍາຍຕົວ ແລະ ມີໝາກຜົນຕົວຈິງດີຂຶ້ນເທື່ອລະກ້າວ ໂດຍມູນຄ່າການຄ້າສອງຝ່າຍ ລາວ-ຈີນ ໃນ 8 ເດືອນຕົ້ນປີ 2024 ສາມາດບັນລຸໄດ້ ປະມານ 5,53 ຕື້ໂດລາສະຫະລັດ ເພີ່ມຂຶ້ນ 26,5%, ມູນຄ່າການລົງທຶນຂອງ ສປ ຈີນ ຍັງຄອງອັນດັບຕົ້ນຂອງການລົງທຶນຈາກຕ່າງປະ ເທດ; ການດໍາເນີນງານບໍລິຫານໂຄງການລົດໄຟ ລາວ-ຈີນ ໄດ້ຮັບຜົນສໍາເລັດເປັນກ້າວ, ເຊິ່ງນັບຕັ້ງແຕ່ເປີດນໍາໃຊ້ທາງລົດໄຟ ລາວ -ຈີນ ເປັນຕົ້ນມາ ສາມາດຂົນສົ່ງຜູ້ໂດຍສານໄດ້ທັງໝົດ 6 ລ້ານກວ່າເທື່ອຄົນ, ຂົນສົ່ງສິນຄ້າໄດ້ທັງໝົດປະມານ 10 ລ້ານໂຕນ; ການປະຕິບັດບັນດາໂຄງການຊ່ວຍເຫຼືອລ້າຂອງຈີນ ແມ່ນນັບມື້ນັບມີປະສິດທິຜົນ.
ສອງຝ່າຍເຫັນດີຮ່ວມກັນ ທີ່ຈະສືບຕໍ່ເລັ່ງລັດການຈັດຕັ້ງຜັນຂະຫຍາຍເນື້ອໃນຈິດໃຈ ຄວາມເຫັນດີເປັນເອກະພາບການຂອງການນໍາສູງສຸດຂອງສອງພັກ, ສອງລັດຖະບານ ໂດຍສະເພາະ ຮ່ວມກັນເອົາໃຈໃສ່ຊຸກຍູ້ຜັນຂະຫຍາຍການຈັດຕັ້ງປະຕິບັດ ແຜນ ແມ່ບົດວ່າດ້ວຍການສ້າງຄູ່ຮ່ວມຊາຕາກໍາ ລາວ-ຈີນ ສະບັບໃໝ່ ໃຫ້ເປັນຮູບປະທໍາຍິ່ງຂຶ້ນ; ສືບຕໍ່ກົນໄກການພົບປະແລກ ປ່ຽນຢ້ຽມຢາມເຊິ່ງກັນ ແລະ ກັນຂອງການນໍາຂັ້ນສູງຂອງທັງ ສອງຝ່າຍໃຫ້ເປັນປົກກະ ຕິ ລວມທັງການແລກປ່ຽນການ ຮ່ວມມືໃນສາຍພັກ, ອົງ ການນິຕິບັນຍັດ ແລະ ອົງການຕຸລາການ ໃຫ້ເກີດດອກອອກຜົນ; ສືບຕໍ່ສະໜັບສະໜູນຊຶ່ງກັນ ແລະ ກັນ ໃນທຸກເວທີພາກພື້ນ ແລະ ສາກົນ; ສືບຕໍ່ເອົາໃຈໃສ່ສ້າງແຜນພັດທະນາປິ່ນອ້ອມທາງລົດໄຟ ລາວ-ຈີນ ເພື່ອເຮັດໃຫ້ແຜນພັດທະນາຂອງສອງປະເທດເຊື່ອມໂຍງກັນ ແລະ ເຮັດໃຫ້ການນໍາໃຊ້ທາງລົດ ໄຟ ລາວ-ຈີນ ມີປະສິດທິຜົນສູງສຸດ; ຍິນດີສືບຕໍ່ປຶກສາຫາລື ກ່ຽວກັບການເຊື່ອມໂຍງເຊື່ອມຈອດດ້ານຄົມມະນາ ຄົມ ລະຫວ່າງ ສາມປະເທດສປ ຈີນ, ສປປ ລາວ ແລະ ສສ.ຫວຽດນາມ ລວມທັງການເຊື່ອມຕໍ່ໄປຍັງພາກໃຕ້ຂອງ ສປປ ລາວ ໄປ ກໍາປູເຈຍ ໃຫ້ປະກົດຜົນເປັນຈິງ; ສືບຕໍ່ສ້າງແຜນແມ່ບົດການຮ່ວມມືດ້ານເສດ ຖະກິດ, ການຄ້າ ແລະ ເຕັກນິກ ລະຫວ່າງ ລາວ-ຈີນ ເພື່ອເປັນບ່ອນອີງໃນການປະຕິບັດໂຄງການຮ່ວມມືທີ່ເປັນຮູບປະທໍາລະ ຫວ່າງສອງປະເທດ; ສືບຕໍ່ການຮ່ວມມືດ້ານການຄ້າ, ການທະນາ ຄານ, ການລົງທຶນ, ການພັດທະນາພື້ນຖານໂຄງລ່າງອື່ນໆທີ່ສໍາຄັນ ແລະ ການທ່ອງທ່ຽວ.
ສະຫາຍ ນາຍົກລັດຖະມົນຕີ ສອນໄຊ ສີພັນດອນ ໄດ້ຊຸກຍູ້ໃຫ້ນັກລົງທຶນ ແລະ ນັກທ່ອງທ່ຽວຈາກ ສປ ຈີນ ເຂົ້າມາລົງທຶນ ແລະ ທ່ອງທ່ຽວ ຢູ່ ສປປ ລາວ ໃຫ້ຫຼາຍຂຶ້ນຕື່ມ ໂດຍສະເພາະໃນປີທ່ອງທ່ຽວລາວ 2024 ນີ້, ເຊິ່ງລັດຖະ ບານລາວ ໄດ້ມີນະ ໂຍ ບາຍຍົກເວັ້ນວີຊາ ໃຫ້ແກ່ນັກທ່ອງ ທ່ຽວຈາກຕ່າງປະເທດ ລວມທັງ ສປ ຈີນ ທີ່ມີຈຸດປະສົງເຂົ້າມາທ່ອງທ່ຽວລາວເປັນຄະນະ.
ພ້ອມນີ້, ໄດ້ຕາງໜ້າໃຫ້ພັກ, ລັດຖະບານ ແລະ ປະຊາຊົນລາວ ສະແດງຄວາມຂອບໃຈຢ່າງຈິງໃຈ ແລະ ຮູ້ບຸນຄຸນເປັນຢ່າງສູງ ຕໍ່ພັກ, ລັດຖະບານ ແລະ ປະຊາຊົນຈີນອ້າຍນ້ອງ ທີ່ໄດ້ໃຫ້ການສະ ໜັບສະໜູນ ແລະ ຊ່ວຍເຫຼືອແກ່ ສປປ ລາວ ຕະຫຼອດໄລຍະຜ່ານມາ, ຊຶ່ງໄດ້ປະກອບສ່ວນອັນໃຫຍ່ຫຼວງໃນການພັດທະນາເສດຖະກິດ-ສັງຄົມ ຢູ່ ສປປ ລາວ ກໍ່ຄື ການສະໜັບສະ ໜູນຊ່ວຍເຫຼືອທາງດ້ານວັດຖຸອຸປະກອນ, ພາຫະນະທີ່ຈໍາເປັນ ແລະ ຍັງໄດ້ໃຫ້ຄໍາປຶກສາທີ່ມີຄຸນຄ່າ ເຮັດໃຫ້ການເປັນປະທານອາຊຽນຂອງ ສປປ ລາວ ໃນປີ 2024 ນີ້ໄດ້ຮັບຜົນສໍາເລັດຢ່າງຈົບງາມ.
ໃນຂະນະດຽວກັນ, ສະຫາຍ ນາຍົກລັດຖະມົນຕີ ຫຼີ ສຽງ ກໍ່ໄດ້ສະແດງຄວາມຂອບໃຈຕໍ່ການຕ້ອນຮັບອັນອົບອຸ່ນ ແລະ ໄດ້ຢືນຢັນຈະສືບຕໍ່ໃຫ້ການຮ່ວມມື ແລະ ສະໜັບສະ ໜູນ ສປປ ລາວ ໃນວຽກງານປົກປັກຮັກສາ ແລະ ສ້າງສາພັດທະນາປະ ເທດ ຊາດ ໂດຍສະເພາະການເຊື່ອມໂຍງເຊື່ອມຈອດ, ບັນດາໂຄງການພັດທະນາພື້ນຖານໂຄງລ່າງ, ດ້ານການຄ້າ-ການລົງ ທຶນ, ການພັດ ທະນາດ້ານພະລັັງງານໄຟຟ້າ ແລະ ການຮ່ວມພັດທະນາດ້ານວິທະ ຍາສາດ-ເຕັກໂນໂລຊີ ເພື່ອເສີມຂະຫຍາຍສາຍພົວພັນ ແລະ ການ ຮ່ວມມືສອງຝ່າຍ ໃຫ້ນັບມື້ນັບຈະເລີນງອກງາມຂຶ້ນເລື້ອຍໆ, ພ້ອມທັງໄດ້ສະແດງຄວາມຊົມເຊີຍ ຕໍ່ຜົນສໍາເລັດຂອງການເປັນປະທານອາຊຽນຂອງ ສປປ ລາວ ໃນປີ 2024 ນີ້ຢ່າງຈົບງາມ.
ພາຍຫຼັງສໍາເລັດການພົບປະ, ສອງນາຍົກລັດຖະມົນຕີ ໄດ້ເຂົ້າຮ່ວມເປັນສັກຂີພິຍານ ໃນພິທີລົງນາມເອກະສານຮ່ວມມືສອງຝ່າຍ ກ່ຽວກັບການເຊື່ອມໂຍງເຊື່ອມຈອດກັນ, ເສດຖະ ກິດ-ການຄ້າ, ການກວດກາສຸຂະອະນາໄມ, ການພັດທະນາສີຂຽວ ແລະ ຍືນຍົງ, ການຮ່ວມມືໃນຂົງເຂດອຸດສາຫະກໍາ, ວິທະຍາສາດເຕັກໂນໂລຊີ, ທ້ອງຖິ່ນ ແລະ ການຮ່ວມມືລະຫວ່າງບັນດາທ້ອງ ຖິ່ນຂອງສອງປະເທດ ໂດຍສະເພາະແມ່ນແນ່ໃສ່ຍົກລະດັບ, ປັບ ປຸງຊີວິດການເປັນຢູ່ຂອງປະຊາຊົນ.
ໃນຕອນບ່າຍຂອງວັນດຽວກັນ, ສະຫາຍ ຫຼີ ສຽງ, ນາຍົກ ລັດຖະມົນຕີ ແຫ່ງ ສປ ຈີນ ແລະ ຄະນະ ໄດ້ເຂົ້າຮ່ວມງານລ້ຽງຕ້ອນຮັບທາງການ ເປັນກຽດຈັດໂດຍ ສະຫາຍ ສອນໄຊ ສີພັນດອນ, ນາຍົກລັດຖະມົນຕີ ແຫ່ງ ສປປ ລາວ. ພ້ອມນັ້ນ, ສອງນາຍົກລັດຖະມົນຕີ ລາວ-ຈີນ ຍັງໄດ້ເຂົ້າ ຮ່ວມພິທີເປີດປ້າຍສໍາເລັດໂຄງການກໍ່ສ້າງໂຮງໝໍມະໂຫສົດຫຼັງໃໝ່ ອີກດ້ວຍ.
