ວັນທີ 11 ຕຸລາ 2024, ທີ່ ຫໍປະຊຸມແຫ່ງຊາດ, ນະຄອນ ຫຼວງວຽງຈັນ, ທ່ານ ສອນໄຊ ສີພັນດອນ ນາຍົກລັດຖະມົນຕີ ແຫ່ງ ສປປ ລາວ ໄດ້ເຂົ້າຮ່ວມກອງປະຊຸມບັນດາຜູ້ນຳຂອງປະຊາຄົມອາຊີ ເພຶອຫຼຸດຜ່ອນການປ່ອຍອາຍພິດໃຫ້ເຫຼືອສູນ ຫຼື (ອາແຊັກ) ຄັ້ງທີ 2 ໂດຍການເປັນປະທານຂອງ ທ່ານ ອິຊິບະ ຊິເງະຣຸ, ນາຍົກລັດຖະມົນຕີ ແຫ່ງ ຍີ່ ປຸ່ນ, ເຊິ່ງມີບັນດາຜູ້ນໍາ ແລະ ຄະນະຜູ້ແທນຈາກບັນດາປະເທດສະມາຊິກ ອາແຊັກ ຄື: ອົດສະຕຣາລີ, ບຣູໄນ, ກໍປູເຈຍ, ອິນໂດເນເຊຍ, ຍີ່ປຸ່ນ, ສປປ ລາວ, ມາເລເຊຍ, ຟີລິບປິນ, ສິງກະໂປ, ໄທ ແລະ ຫວຽດນາມ ເຂົ້າຮ່ວມ.
ກອງປະຊຸມບັນດາຜູ້ນຳປະຊາຄົມອາຊີ ເພື່ອການຫຼຸດຜ່ອນ ການປ່ອຍອາຍພິດໃຫ້ເຫຼືອສູນຄັ້ງນີ້ ໄດ້ຕີລາຄາສູງຕໍ່ການສ້າງລະບົບຕ່ອງໂສ້ ການສະໜອງພະລັງງານສະອາດ ໂດຍຜ່ານບັນດາໂຄງການຮ່ວມມື ການພັດທະນາເຂດອຸດສາຫະກຳການປ່ອຍອາຍພິດ, ການຮ່ວມມືລະຫວ່າງບັນດາຫົວໜ່ວຍທຸລະກິດ, ອົງການຈັດຕັ້ງສາກົນ ເພື່ອສືບຕໍ່ປະກອບສ່ວນໃນການຫັນປ່ຽນໃຫ້ເປັນພະລັງງານສະອາດ ເປັນມິດຕໍ່ສະພາບແວດລ້ອມ ໃນອະນາຄົດທີ່ຍືນຍົງ.
ໃນສໍາລັບ ສປປ ລາວ ແມ່ນໄດ້ມີນະໂຍບາຍດ້ານພະລັງ ງານ ໂດຍໄດ້ກໍານົດເອົາການຫັນໄປສູ່ການຜະລິດພະລັງງານໄຟຟ້າ ດ້ວຍພະລັງງານທົດແທນ ເປັນບູລິມະສິດ ເພື່ອການພັດທະນາພະລັງງານຢ່າງມີປະສິດທິພາບ ແລະ ຮັບປະກັນການສະ ໜອງໄຟຟ້າໃຫ້ພຽງພໍ ຄຽງຄູ່ກັບການຫຼຸດຜ່ອນຜົນກະທົບຕໍ່ສິ່ງແວດລ້ອມ ໂດຍສະເພາະການຫຼຸດຜ່ອນອາຍກາກບອນ ຈາກພະລັງງານຖ່ານຫີນ ແລະ ນ້ຳມັນເຊື້ອໄຟ.
ກອງປະຊຸມ ໄດ້ຮ່ວມກັນຮັບຮອງເອົາຖະແຫຼງການຮ່ວມຂອງຜູ້ນໍາ ອາແຊັກ ເພື່ອຫຼຸດຜ່ອນການປ່ອຍອາຍພິດໃຫ້ເຫຼືອສູນ, ເຊິ່ງເປັນແຜນປະຕິບັດງານສໍາລັບທົດສະຫວັດຂ້າງໜ້າ.
