ວັນທີ 11 ຕຸລາ 2024 ທີ່ຫໍປະຊຸມແຫ່ງຊາດ, ນະຄອນ ຫລວງວຽງຈັນ ພະນະທ່ານ ສອນໄຊ ສີພັນດອນ, ນາຍົກລັດ ຖະມົນຕີ ແຫ່ງ ສປປ ລາວ ໄດ້ເປັນປະທານພິທີປິດກອງປະຊຸມສຸດຍອດອາຊຽນ ຄັ້ງທີ 44 ແລະ 45 ແລະ ບັນດາກອງປະຊຸມ ສຸດຍອດທີ່ກ່ຽວຂ້ອງ ແລະ ການມອບປະທານອາຊຽນໃຫ້ແກ່ ມາເລເຊຍ ໂດຍມີບັນດາປະມຸກລັດ, ຫົວໜ້າລັດຖະບານປະເທດສະມາຊິກອາຊຽນ ແລະ ຕີມໍແລັດສະເຕ, ບັນດາລັດຖະ ມົນຕີ ແລະ ເຈົ້າໜ້ທີ່ອາວຸໂສຂອງສາມ ເສົາຄໍ້າປະຊາຄົມອາ ຊຽນ ແລະ ຕີມໍແລັດສະເຕ, ເລຂາທິການໃຫຍ່ ແລະ ຮອງເລຂາ ທິການໃຫຍ່ອາຊຽນ, ຜູ້ຕາງໜ້າ ຖາວອນປະຈໍາອາຊຽນ, ບັນດາຜູ້ແທນ ແລະ ບັນດາແຂກຖືກເຊີນ ເຂົ້າຮ່ວມ.
ໃນໂອກາດນີ້, ພະນະທ່ານ ສອນໄຊ ສີພັນດອນ ນາຍົກ ລັດຖະມົນຕີແຫ່ງ ສປປ ລາວ ໄດ້ສະຫລຸບຜົນຂອງກອງ ປະຊຸມ ສຸດຍອດອາຊຽນ ຄັ້ງທີ 44 ແລະ 45 ແລະ ບັນດາກອງປະຊຸມ ສຸດຍອດທີ່ກ່ຽວຂ້ອງ, ເຊິ່ງມີທັງໝົດ 16 ກອງ ປະຊຸມສຸດຍອດ ພາຍໃຕ້ການເປັນເຈົ້າພາບ ແລະ ປະທານອາຊຽນຂອງ ສປປ ລາວ ພາຍໃຕ້ຄໍາຂວັນ “ເພີ່ມທະວີການເຊື່ອມ ຈອດ ແລະ ຄວາມ ເຂັ້ມແຂງອາຊຽນ”. ໃນນີ້, ພະນະທ່ານ ນາຍົກລັດຖະມົນຕີ ສອນໄຊ ສີພັນດອນ ໄດ້ຍົກໃຫ້ເຫັນຄວາມ ຄືບຫນ້າຂອງການຈັດຕັ້ງປະຕິບັດວິໄສທັດປະຊາຄົມອາຊຽນ 2025 ແລະ ຜົນສໍາເລັດຂອງການຈັດ ຕັ້ງປະຕິບັດ 9 ຂົງເຂດບູລິມະສິດສໍາລັບການເປັນປະທານອາຊຽນຂອງ ສປປ ລາວ, ເຊິ່ງປະກອບສ່ວນເຂົ້າໃນຂະ ບວນການເສີມສ້າງປະຊາ ຄົມອາຊຽນ ໃຫ້ມີການເຊື່ອມຈອດ ແລະ ເຂັ້ມແຂງຫລາຍກວ່າເກົ່າ.
ນອກຈາກນີ້, ພະນະທ່ານ ນາຍົກລັດຖະມົນຕີ ສອນໄຊ ສີພັນດອນ ໄດ້ຢໍ້າເຖິງຄວາມສໍາຄັນຂອງຄວາມພະຍາຍາມລວມຂອງອາຊຽນ ເພື່ອຮັບປະກັນຂະບວນການສ້າງ ປະ ຊາຄົມອາຊຽນໃຫ້ມີຄວາມຕໍ່ເນື່ອງ ແລະ ສະແດງຄວາມຊົມເຊີຍຕໍ່ຄວາມຄືບໜ້າໃນການສ້າງບັນດາແຜນຍຸດທະ ສາດ ເພື່ອຈັດຕັ້ງປະຕິບັດວິໄສທັດປະຊາຄົມອາຊຽນ 2045 ໂດຍບັນດາຂະແໜງການທີ່ກ່ຽວຂ້ອງຂອງສາມເສົາຄໍ້າປະຊາຄົມ ອາຊຽນ ແລະ ການເຊື່ອມຈອດອາຊຽນ ພາຍໃຕ້ການເປັນປະທານຂອງ ສປປ ລາວ ແນໃສ່ຈັດຕັ້ງປະຕິບັດວິໄສທັດປະຊາຄົມອາຊຽນ 2045 ເພື່ອສ້າງປະຊາ ຄົມອາຊຽນໃຫ້ເປັນປະຊາຄົມທີ່ເຂັ້ມແຂງ, ມີນະວັດຕະກຳ, ຄ່ອງແຄ້ວ ແລະ ມີປະຊາຊົນເປັນແກນກາງ, ແລະ ແຈ້ງໃຫ້ຊາບຄວາມຄືບໜ້າການກະກຽມຄວາມພ້ອມສໍາລັບການເປັນສະມາຊິກສົມບູນອາຊຽນຂອງຕີມໍແລັດສະເຕ ແລະ ການເສີມຂະຫຍາຍການພົວພັນຮ່ວມມືກັບພາຍນອກ.
ກອງປະຊຸມສຸດຍອດຄັ້ງທີ 44 ແລະ 45 ແລະ ບັນດາກອງປະຊຸມສຸດຍອດກ່ຽວຂ້ອງ ໄດ້ຮັບຮອງ ແລະ ຮັບຊາບເອກະສານຫຼາຍກວ່າ 90 ສະບັບ ຊຶ່ງເອກະສານເຫລົ່ານີ້ຈະເປັນພື້ນຖານໃຫ້ບັນດາຂະແໜງການຂອງອາຊຽນເພື່ອນໍາໄປຈັດຕັ້ງຜັນຂະຫຍາຍ ເພື່ອເຮັດໃຫ້ອາຊຽນມີການເຊື່ອມຈອດ ແລະ ຄວາມເຂັ້ມແຂງຫລາຍຂື້ນ ແລະ ກ້າວໄປສູ່ປະຊາຄົມທີ່ເຂັ້ມແຂງ, ມີນະວັດຕະກຳ, ຄ່ອງແຄ້ວ ແລະ ມີປະຊາຊົນເປັນແກນກາງ ກໍຄື ການປະກອບສ່ວນເຂົ້າໃນພາລະກິດລວມແຫ່ງການປົກປັກຮັກສາ ແລະ ສົ່ງ ເສີມສັນຕິພາບ, ສະຖຽນລະພາບ ແລະ ຄວາມຈະເລີນກ້າວໜ້າໃນພາກພື້ນ ແລະ ໃນໂລກ.
ພະນະທ່ານນາຍົກລັດຖະມົນຕີ ໄດຖືໂອກາດນີ້ ສະແດງຄວາມຂອບໃຈ ແລະ ຮູ້ບຸນຄຸນຢ່າງຈິງໃຈຕໍ່ການສະໜັບ ສະໜູນ, ການຮ່ວມມື ແລະ ການປະກອບສ່ວນຂອງປະເທດສະມາຊິກອາຊຽນ, ຄູ່ຮ່ວມມືພາຍນອກຂອງອາຊຽນ ແລະກອງເລຂາອາຊຽນ. ພ້ອມທັງ, ໄດ້ສະແດງຄວາມຊົມເຊີຍ ແລະ ຂອບໃຈຢ່າງຈິງໃຈ ມາຍັງພະນັກ ງານ, ທະຫານ, ຕຳຫຼວດ, ນັກທຸລະກິດ, ພໍ່ຄ້າຊາວຂາຍ ແລະ ພໍ່ແມ່ພີ່ນ້ອງຊາວລາວບັນດາເຜົ່າທຸກຖ້ວນໜ້າ ທີ່ໄດ້ປະກອບສ່ວນຢ່າງຫ້າວຫັນຕາມພາລະໜ້າທີ່ ແລະ ຄວາມ ຮັບ ຜິດຊອບຂອງຕົນ ອັນໄດ້ເຮັດໃຫ້ບັນດາກອງປະຊຸມສຸດຍອດໃນຄັ້ງນີ້ ກໍຄື ການເປັນປະທານອາຊຽນຂອງ ສປປ ລາວ ໄດ້ຮັບຜົນສໍາເລັດອັນຈົບງາມ.
ໃນຕອນທ້າຍຂອງພິທີດັ່ງກ່າວ, ພະນະທ່ານ ສອນໄຊ ສີພັນດອນ ນາຍົກລັດຖະມົນຕີ ແຫ່ງ ສປປ ລາວ ໄດ້ມອບ ຄ້ອນສັນຍາລັກປະທານອາຊຽນ ໃຫ້ແກ່ ພະນະທ່ານ ອານວາ ອິບຣາຮີມ, ນາຍົກລັດຖະມົນຕີ ແຫ່ງ ມາເລເຊຍ ເພື່ອເປັນ ປະ ທານອາຊຽນ ໃນປີ 2025.
ສປປ ລາວ ຈະສືບຕໍ່ເປັນປະທານອາຊຽນໄປຈົນຮອດວັນທີ 31 ທັນວາ 2024 ແລະ ມາເລເຊຍ ຈະເລີ່ມເປັນ ປະທານອາຊຽນແຕ່ວັນທີ 1 ມັງກອນ – 31 ທັນວາ 2025 ເປັນຕົ້ນໄປ.
