ໃນເຊົ້າຂອງວັນທີ 3 ຕຸລາ 2024 ຢູ່ກອງບັນການ ປກສ ເຂດເສດຖະກິດພິເສດສາມຫຼ່ຽມຄຳ ໄດ້ຈັດກອງປະຊຸມສ່ອງແສງວຽກພັກ-ວຽກງານການເມືອງ 4 ກອງບັນຊາການ ປກສ ແຂວງ ແລະ 1 ກອງບັນຊາການ ປກສ ເຂດ (ຜົ້ງສາລີ, ຫຼວງນ້ຳທາ, ອຸດົມໄຊ, ບໍ່ແກ້ວ ແລະ ເຂດເສດຖະກິດພິເສດສາມຫຼ່ຽມຄຳ ໂດຍການເປັນປະທານຂອງ ສະຫາຍ ພົຕ ຄຳກິ່ງ ຜຸຍຫຼ້າມະນີວົງ ຄະປະຈຳພັກກະຊວງ, ຮອງລັດຖະມົນຕີກະຊວງປ້ອງກັນຄວາມສະຫງົບ ມີສະຫາຍ ພົຈວ ຄອນສະຫວັນ ສົມພາໄຊ ຄະນະພັກກະຊວງ ຮອງກົມໃຫຍ່ການເມືອງ ປກສ, ສະຫາຍຫົວໜ້າກົມພັກ, ຮອງກົມພະນັກງານ, ບັນດາສະຫາຍຫົວໜ້າ ແລະ ຮອງກອງບັນຊາການ ປກສ 4 ແຂວງ ແລະ 1 ກອງບັນຊາການ ປກສ ເຂດ ຕະຫຼອດຮອດພະນັກງານຫຼັກແຫຼ່ງເຂົ້າຮ່ວມ.
ກອງປະຊຸມສະຫາຍ ພັອ ອານຸສິນ ສັກປະເສີດ ເລຂາຄະນະພັກຮາກຖານ ຫົວໜ້າກອງບັນຊາການ ປກສ ເຂດເສດຖະກິດພິເສດສາມຫຼ່ຽມຄຳ ໄດ້ຂຶ້ນລາຍງານການເຄື່ອນໄຫວນໍາພາ-ຊີ້ນໍາ ຂອງຄະນະພັກແຕ່ລະຂັ້ນ ຕໍ່ວຽກງານພັກ-ວຽກງານການເມືອງ ໃນໄລຍະ 03 ເດືອນ ຜ່ານມາ ຄະນະພັກແຕ່ລະຂັ້ນໄດ້ຖືເອົາວຽກງານສຶກສາອົບຮົມການເມືອງ-ແນວຄິດເປັນກົກຕິດພັນກັບທຸກຂົງເຂດວຽກງານ, ບົນພື້ນຖານຄວາມສາມັກຄີເປັນເອກະພາບພາຍໃນຄະນະພັກ ເຮັດໃຫ້ສະມາຊິກພັກ,ນາຍ ແລະ ພົນຕໍາຫຼວດແຕ່ລະສະຫາຍມີແນວຄິດຫຼັກໝັ້ນອຸ່ນອ່ຽນທຸ່ນທ່ຽງ, ມີສະຕິຕໍ່ການຈັດຕັ້ງ, ມີຄວາມຫ້າວຫັນໃນການປະຕິບັດໜ້າທີ່ວຽກງານທີ່ໄດ້ຮັບມອບໝາຍ ນຳເອົາແນວທາງຂອງພັກ-ກົດໝາຍຂອງລັດ, ຄໍາສັ່ງ,ດໍາລັດ ແລະ ບັນດາມະຕິຕ່າງໆ ມາຈັດຕັ້ງເຜີຍແຜ່ ແລະ ຜັນຂະຫຍາຍເຂົ້າໃນວຽກງານຕົວຈິງ.
ຈາກນັ້ນ, ຕ່າງໜ້າກອງບັນຊາການ ປກສ ທັງ 4 ແຂວງ ກໍໄດ້ຜັດປ່ຽນກັນຂື້ນລາຍງານໂດຍສັງເຂບ ເພື່ອຍົກໃຫ້ເຫັນເຖິງຈຸດດີຈຸດອ່ອນ, ຂໍ້ຄົງຄ້າງ ແລະ ພ້ອມກັນແກ້ໄຂໃນຕໍ່ໜ້າ ໃນທ້າຍກອງປະຊຸມ ສະຫາຍ ພົຕ ຄຳກິ່ງ ຜຸຍຫຼ້າມະນີວົງ ປະທານກອງປະຊຸມກໍ່ໄດ້ມີຄໍາເຫັນສັງລວມ ແລະ ຊີ້ນຳຕໍ່ກອງປະຊຸມເຊິ່ງສະຫາຍໄດ້ເນັ້ນບາງບັນຫາທີ່ສຳຄັນເປັນຕົ້ນແມ່ນຄະນະພັກແຕ່ ລະຂັ້ນຕ້ອງເປັນຄັນທຸງນຳໜ້າມີຄວາມເປັນແບບຢ່າງ, ເຊີດຊູຄວາມຮັບຜິດ ຊອບໃຫ້ສູງຂຶ້ນ ນຳພາ-ຊີ້ນໍາວຽກງານໃນຂອບ ເຂດທີ່ຕົນຮັບຜິດຊອບ ໃຫ້ມີຜົນສຳເລັດ, ພ້ອມທັງເອົາໃຈໃສ່ຕິດຕາມ, ເກັບກໍາສະພາບການເມືອງ-ແນວຄິດຂອງສະມາຊິກພັກ, ນາຍ ແລະ ພົນຕໍາຫຼວດໃຫ້ແໜ້ນ, ໂດຍຖືເອົາວຽກງານສຶກສໍາອົບຮົມການເມືອງແນວຄິດເປັນສໍາຄັນ, ເຮັດຢ່າງແທດເຖິງ ແລະ ເລິກເຊິ່ງກວ່າເກົ່າພ້ອມທັງມີມາດຕະການສະກັດກັ້ນ ປະກົດ ການຫຍໍ້ທໍ້ພາຍໃນພັກຢ່າງເດັດຂາດ ເພືິ່ອເຮັດໃຫ້ໜ່ວຍພັກມີຄວາມປອດໃສ, ເຂັ້ມແຂງ ແລະ ໜັກແໜ້ນ.
