ກອງປະຊຸມສ່ອງແສງວຽກງານພັກ ແລະ ວຽກງານການເມືອງ ປະຈໍາໄຕມາດ II ປີ 2024 ຈັດຂຶ້ນໃນວັນທີ 12 ສິງຫາ 2024 ທີ່ຫ້ອງປະຊຸມຫ້ອງວ່າການແຂວງເຊກອງ ພາຍໃຕ້ການເປັນປະທານຂອງ ພົຕ ສຸລິນະ ແກ້ວປະເສີດ ຫົວໜ້າຫ້ອງວ່າການ ກະຊວງປ້ອງກັນຄວາມສະຫງົບ, ມີຄະນະພັກ-ຄະນະບັນຊາກອງບັນຊາການ ປກສ ແຂວງເຊກອງ, ສະຫວັນນະເຂດ, ຈໍາປາສັກ, ສາລະວັນ, ອັດຕະປື ພ້ອມດ້ວຍຂະແໜງການກ່ຽວຂ້ອງຂັ້ນສູນກາງ ແລະ ຂັ້ນແຂວງ ເຂົ້າຮ່ວມ. ເພື່ອຮັບຟັງການ ລາຍງານສະພາບ ການປະຕິບັດວຽກງານດັ່ງກ່າວ ໃນໄລຍະ 3 ເດືອນ (4, 5, 6) ຈາກກອງບັນຊາການ ປກສ 5 ແຂວງ ໂດຍສະເພາະຜົນງານດ້ານດີ, ດ້ານອ່ອນ-ຂໍ້ຄົງຄ້າງ ແລະ ທິດທາງແຜນການແກ້ໄຂໃນຕໍ່ໜ້າ.
ກອງປະຊຸມສ່ອງແສງ-ລາຍງານຄັ້ງນີ້ ເພື່ອຕີລາຄາຄືນການຈັດຕັ້ງປະຕິບັດການຜັນຂະຫຍາຍ ຜົນສໍາເລັດ ຂອງກອງປະຊຸມສ່ອງແສງໃນໄລຍະຜ່ານມາ ກໍຄືການນໍາພາ-ຊີ້ນໍາປະຕິບັດວຽກງານພັກ-ວຽກງານການເມືອງ ຂອງຄະນະພັກ-ຄະນະບັນຊາ ແຕ່ລະຂັ້ນໃຫ້ມີປະສິດຕິຜົນ ແລະ ປະສິດທິພາບດີຂຶ້ນເທື່ອລະກ້າວ. ຈາກນັ້ນ, ຫົວໜ້າກອງບັນຊາການ ປກສ 5 ແຂວງ ໄດ້ຜັດປ່ຽນກັນຂຶ້ນລາຍງານການນໍາພາ-ບັນຊາວຽກງານຮອບດ້ານ, ວຽກງານພັກ ແລະ ວຽກງານການເມືອງ ທີ່ຕິດພັນກັບການປະຕິບັດບັນດາຄາດໝາຍສູ້ຊົນ ແຕ່ລະຂົງເຂດວຽກງານ.
ໂອກາດນີ້, ພົຕ ສຸລິນະ ແກ້ວປະເສີດ ໄດ້ຊີ້ນໍາຫຼາຍບັນຫາ ໃຫ້ຄະນະພັກ-ຄະນະບັນຊາການ ເຊີດຊູສະຕິລະວັງຕົວ, ສະຕິໃນການປົກປັກຮັກສາແນວທາງນະໂຍບາຍຂອງພັກ, ລັດ; ປົກປັກຮັກສາໝາກຜົນຂອງການປະຕິວັດ; ກໍາລັງພວກເຮົາ ຕ້ອງເປັນກຳລັງຫຼັກແຫຼ່ງ, ເປັນພາຫະນະອັນແຫຼມຄົມຂອງພັກ ໃນການນໍາພາທົ່ວປວງຊົນເຮັດວຽກງານປ້ອງກັນຊາດ-ປ້ອງກັນ ຄວາມສະຫງົບ, ເພີ່ມທະວີການເຄື່ອນໄຫວວຽກງານວິຊາສະເພາະຢູ່ແຕ່ລະຂັ້ນໃຫ້ແຂງແຮງ ໂດຍສະເພາະ ວຽກງານສືບຂ່າວ, ເກັບກຳເປົ້າໝາຍທີ່ກ່ຽວຂ້ອງກັບກົນອຸບາຍ, ການເຄື່ອນໄຫວຂອງອິດທິກຳລັງປໍລະປັກ; ເຂັ້ມງວດກວດກາ ທັງຕິດ ຕາມກຳແໜ້ນການເຄື່ອນໄຫວຂອງອົງການຈັດຕັ້ງສັງຄົມ, ມູນລະນິທິ, ການຈັດຕັ້ງ-ການເຄື່ອນໄຫວຂອງອົງການຈັດຕັ້ງທີ່ບໍ່ຂຶ້ນກັບລັດຖະບານ, ການສວຍໃຊ້ຮູບການລົງທຶນ, ການທ່ອງທ່ຽວ, ຢ້ຽມຢາມແອບແຝງ ເພື່ອສ້າງໜໍ່ແໜງຄວາມບໍ່ສະຫງົບຢູ່ປະເທດເຮົາດ້ວຍທຸກຮູບແບບ, ເອົາໃຈໃສ່ຊີ້ນໍາວຽກງານກຽມພ້ອມສູ້ຮົບ ດ້ວຍການສືບຕໍ່ສ້າງ, ປັບປຸງກໍາລັງ, ລະບົບສູນບັນຊາ, ພາຫະນະ, ວຽກງານຮັບປະກັນ, ແຜນການກຽມພ້ອມສູ້ຮົບ, ແຜນປະສານໃນການ ກອບກູ້ໄພພິບັດ ເພື່ອສາມາດແກ້ໄຂສະພາບໄດ້ໃນທຸກກໍລະນີ; ພ້ອມນີ້, ກໍ່ໃຫ້ສືບຕໍ່ແຜນດໍາເນີນ ງານກ່ຽວກັບການຄຸ້ມຄອງ ແລະ ເລີກຮື້ອາວຸດເສິກ; ການຈັດຕັ້ງປະຕິບັດວາລະແຫ່ງຊາດ ວ່າດ້ວຍ ການແກ້ໄຂບັນຫາຢາເສບຕິດ ໃຫ້ບັນລຸຄາດໝາຍ, ສຸມໃສ່ການຄຸ້ມຄອງກວດກາ ການນໍາໃຊ້ສື່ສັງຄົມອອນລາຍ, ຄຸ້ມຄອງຄົນເຂົ້າ-ອອກ ເມືອງ, ຄຸ້ມຄອງສໍາມະໂນຄົວ, ວຽກງານຕ້ານການຄ້າມະນຸດ, ການຫຼຸດຜ່ອນອຸປະຕິເຫດຕາມເສັ້ນທາງສັນຈອນ, ວຽກງານຄຸມຂັງ-ດັດສ້າງ, ການສືບສວນ-ສອບສວນ-ແກ້ໄຂຄະດີ ໃຫ້ເຂົ້າສູ່ນິຕິກຳ ແລະ ກົດໝາຍ, ສຸມໃສ່ກໍ່ສ້າງກໍາລັງທີ່ນອນໃນຄວາມຮັບຜິດຊອບໃຫ້ໜັກແໜ້ນທາງດ້ານການເມືອງ, ແນວຄິດ, ເຂັ້ມແຂງດ້ານການຈັດຕັ້ງ, ມີລະບຽບວິໄນເຂັ້ມງວດ ແລະ ມີແບບແຜນກ້າວສູ່ຄວາມທັນສະໄໝ, ເອົາໃຈໃສ່ດໍາເນີນກອງປະຊຸມ 3 ຂັ້ນຂອງພັກໃຫ້ມີຄວາມຮັບປະກັນໃນແຕ່ລະດ້ານ, ໄປພ້ອມກັບການເສີມຂະຫຍາຍມູນເຊື້ອຂອງຊາດ, ຂອງພັກ, ຂອງກໍາລັງປ້ອງກັນຄວາມສະຫງົບ ໃຫ້ມີຄວາມທົນທານ, ໜຽວແໜ້ນ, ອົງອາດກ້າຫານ, ບໍ່ຫວັ່ນໄຫວຄອນແຄນຕໍ່ສະພາບການ ແລະ ຂໍ້ຫຍຸ້ງຍາກໃດໆ; ເຊື່ອມຊຶມກຳແໜ້ນ ແລະ ປະຕິບັດແນວທາງການຕ່າງປະເທດຂອງພັກໃຫ້ຖືກຕ້ອງ, ເພີ່ມທະວີການພົວ ພັນຮ່ວມມືກັບກຳລັງ ປກສ ປະເທດເພື່ອນມິດຍຸດທະສາດ, ປະເທດໃກ້ຄຽງຕາມເງື່ອນໄຂ
