ໃນໂອກາດທີ່ ພົນເອກ ວິໄລ ຫຼ້າຄໍາຟອງ ກໍາມະການກົມການເມືອງສູນກາງພັກ ຮອງນາຍົກລັດຖະມົນຕີ ລັດຖະມົນຕີກະ ຊວງ ປກສ ເຂົ້າຮ່ວມເປັນປະທານກອງປະຊຸມສະຫຼຸບວຽກງານການຈັດຕັ້ງປະຕິບັດຄໍາສັ່ງເລກທີ 563/ປກສ ວ່າດ້ວຍການຂຶ້ນບັນຊີເກັບກູ້, ຄຸ້ມຄອງອາວຸດເສິກ ແລະ ວັດຖຸລະເບີດ ໃນຂອບເຂດທົ່ວປະເທດ ທີ່ຈັດຂຶ້ນໃນວັນທີ 8 ສິງຫາ 2024 ໂດຍມີມີ ພົນໂທ ສຸວອນ ເລືອງບຸນມີ ຮອງປະທານສະພາແຫ່ງຊາດ, ມີບັນດາຮອງລັດຖະມົນຕີ-ອົງການທຽບເທົ່າ, ຫ້ອງວ່າການກະ ຊວງ, ກົມໃຫຍ່, ກົມ-ກອງອ້ອມຂ້າງກະຊວງ, ປກສ ນະຄອນຫຼວງວຽງຈັນ, ປກສ ແຂວງ ໃນຂອບເຂດທົ່ວປະເທດ ແລະ ພາກສ່ວນທີ່ກ່ຽວຂ້ອງເຂົ້າຮ່ວມ.
ເຊິ່ງທ່ານຮອງນາຍົກລັດຖະມົນຕີ ໄດ້ສະແດງຄວາມຍ້ອງຍໍຊົມເຊີຍຕໍ່ບັນດາຄະນະຮັບຜິດຊອບຂອງແຕ່ລະຂະແໜງການທີ່ກ່ຽວຂ້ອງໄດ້ມີຄວາມເອົາໃຈໃສ່ສູງຕໍ່ກັບການຈັດຕັ້ງປະຕິບັດວຽກງານຂຶ້ນບັນຊີ, ເກັບກູ້, ຄຸ້ມຄອງອາວຸດເສິກ ແລະ ວັດຖຸລະເບີດ ທີ່ມີຜົນສໍາເລັດຫຼາຍດ້ານ ພ້ອມທັງເນັ້ນໜັກໃຫ້ບັນດາກະຊວງ-ອົງການທຽບເທົ່າ, ຫ້ອງວ່າການກະຊວງ, ກົມໃຫຍ່, ກົມ-ກອງອ້ອມຂ້າງກະຊວງ, ກອງບັນຊາການ ປກສ ນະຄອນຫຼວງ ແລະ ບັນດາ ປກສ ແຂວງໃນຂອບເຂດທົ່ວປະເທດ ສືບຕໍ່ເພີ່ມທະວີເຄື່ອນໄຫວຈັດຕັ້ງປະຕິບັດຂຶ້ນບັນຊີຄຸ້ມຄອງ, ເກັບກູ້ອາວຸດເສິກ ແລະ ວັດຖຸລະເບີດ ເປັນຕົ້ນມອບໃຫ້ຄະນະກຳ ມະການທີ່ຮັບຜິດຊອບວຽກງານດັ່ງກ່າວຢູ່ໃນຂະແໜງການຂອງຕົນ ໄດ້ຮັບການຈັດຕັ້ງປະຕິບັດໃຫ້ມີປະສິດທິຜົນດັ່ງນີ້:
1. ຄະນະກຳມະການຂຶ້ນບັນຊີຄຸ້ມຄອງ, ເກັບກູ້ອາວຸດເສິກ ແລະ ວັດຖຸລະເບີດ ຢູ່ຂະແໜງ ການຕ່າງໆ ນັບທັງຂັ້ນສູນກາງ ແລະ ທ້ອງຖິ່ນ ຕ້ອງກວດກາຄືນກົງຈັກການຈັດຕັ້ງຂັ້ນຂອງຕົນ ໃຫ້ມີຄວາມຮັບປະກັນໃນການເຄື່ອນໄຫວເຮັດໜ້າທີ່ວຽກງານຕາມພາລະບົດບາດ.
2. ໃຫ້ຍູ້ແຮງໃນການຄຸ້ມຄອງ ແລະ ການຖອນອາວຸດປືນເສິກຂອງພະນັກງານ ຜູ້ທີ່ກະສຽນ ອາຍຸ, ໄດ້ຮັບອຸດໜູນບໍານານ ແມ່ນມອບໃຫ້ບັນດາກົມກອງ, ກອງບັນຊາການເປັນເຈົ້າການໃນການຖອນ ແລະ ເກັບກູ້ຄືນຕາມລະບຽບຫຼັກການ.
3. ມອບໃຫ້ບັນດາກົມວິຊາສະເພາະ, ກອງບັນຊາການ ປກສ ນະຄອນຫຼວງວຽງຈັນ ແລະ ປກສ ແຂວງໃນຂອບເຂດທົ່ວປະ ເທດ ປະຕິບັດຕາມພາລະບົດບາດ, ສິດໜ້າທີ່, ເປັນເຈົ້າການສັງລວມບັນຊີອາວຸດ ກັບພາກສ່ວນທີ່ເຫັນວ່າບໍ່ມີຄວາມຈໍາເປັນນໍາໃຊ້ ແລະ ອາວຸດທີ່ໄດ້ມາຈາກການດໍາເນີນຄະດີ ເພື່ອຖອນ, ເກັບກູ້ຕາມລະບຽບຫຼັກການ ແລະ ດຳເນີນໃຫ້ສຳເລັດໂດຍໄວ.
4. ເພີ່ມທະວີການປະສານສົມທົບ ກັບພາກສ່ວນອື່ນທີ່ກ່ຽວຂ້ອງໂຄສະນາເຜີຍແຜ່ໃຫ້ທົ່ວສັງຄົມ, ເຫັນໄດ້ຄວາມອັນຕະລາຍຂອງອາວຸດ ແນ່ໃສ່ສະກັດກັ້ນ ແລະ ແກ້ໄຂບັນຫາອາວຸດໃຫ້ໄດ້; ເພື່ອຫຼຸດຜ່ອນຄວາມສ່ຽງຈາກການຊື້ຂາຍ, ມີໄວ້ໃນຄອບ ຄອງອາວຸດເສິກ ແລະ ທາດລະເບີດ.
5. ຄົ້ນຄວ້າສະໜອງງົບປະມານ ຮັບໃຊ້ວຽກງານການຂຶ້ນບັນຊີຄຸ້ມຄອງ, ເກັບກູ້ອາວຸດເສິກ ແລະ ທາດລະເບີດ ໃຫ້ມີຄວາມຮັບປະກັນ, ຄະນະກຳມະການຂຶ້ນບັນຊີຄຸ້ມຄອງ, ເກັບກູ້ອາວຸດເສິກ ແລະ ວັດຖຸລະເບີດ ແຕ່ລະຂະແໜງການ ນັບທັງຂັ້ນສູນກາງ ແລະ ທ້ອງຖິ່ນໃຫ້ຄົ້ນຄວ້າ ແລະ ຕອບສະໜອງງົບປະມານທີ່ຈໍາເປັນຮັບໃຊ້ການເຄື່ອນໄຫວວຽກງານໃນຂົງເຂດຂອງຕົນ ໃຫ້ມີຄວາມເໝາະສົມ ແລະ ທັນເວລາ ເພື່ອເຮັດໃຫ້ການເຄື່ອນໄຫວວຽກງານຂຶ້ນບັນຊີຄຸ້ມຄອງ, ເກັບກູ້ອາວຸດເສິກ ແລະ ວັດຖຸລະເບີດ ຢູ່ໃນຂົງເຂດຄວາມຮັບຜິດຊອບຂັ້ນຂອງຕົນໃຫ້ມີປະສິດທິຜົນ ແລະ ບັນລຸໄດ້ບັນດາຄາດໝາຍທີ່ໄດ້ກໍານົດໃນແຜນການ.
