ໃນວັນທີ 30 ກໍລະກົດ 2024, ວິທະຍາຄານການເມືອງປ້ອງກັນຄວາມສະຫງົບ (ວກປສ) ຈັດພິທີປິດຊຸດຮຽນ ແລະ ຮັບໃບປະກາສະນີຍະບັດ ນັກສຶກສາອະນຸປະລິນຍາຕີການເມືອງ-ການບັນຊາ ຮຸ່ນທີ XVII, ເຂົ້າຮ່ວມໂດຍ ພົທ ກົງທອງ ພົງວິຈິດ ກໍາມະການກົມການເມືອງສູນກາງພັກ ຮອງລັດຖະມົນຕີ ກະຊວງປກສ ແລະ ມອບໃບປະກາສະນີຍະບັດໂດຍ ພັອ ຊາຍຄອງ ເພັດຊະວົງ ຫົວໜ້າອໍານວຍການ ວກປສ, ມີຮອງອໍານວຍການ, ພະແນກ, ຫ້ອງ, ນັກສຶກສາ ເຂົ້າຮ່ວມ.
ໃນພິທີ, ພັອ ສີເພົ້າ ບຸນບາລິດ ຮອງຫົວໜ້າອໍານວຍການ ວິທະຍາຄານການເມືອງປ້ອງກັນຄວາມສະຫງົບ ໃຫ້ຮູ້ວ່າ: ນັກສຶກສາອະນຸປະລິນຍາຕີທິດສະດີການເມືອງ-ການບັນຊາຮຸ່ນນີ້ ມີທັງໝົດ 51 ສະຫາຍ ຍິງ 9 ສະຫາຍ ເຊິ່ງໄດ້ເລີ່ມຮຽນມາແຕ່ວັນທີ 30 ກັນຍາ 2022 ເປັນຕົ້ນມາ ແລະ ໂຄງການຫຼັກສູດການຮຽນການສອນ ມີທັງໝົດ 41 ວິຊາ ແລະ 1 ວິຊາເລືອກ, ມີ 86 ໜ່ວຍກິດ. ໃນນັ້ນ, ພາກທິດສະດີມີ 84 ໜ່ວຍກິດ ແລະ ປ້ອງກັນບົດຈົບຊັ້ນ 2 ໜ່ວຍກິດ, ຮຽນຕົວຈິງ 936 ຊົ່ວໂມງ, ກຽມສໍາມະນາ 175 ຊົ່ວໂມງ, ສໍາມະນາ 199 ຊົ່ວໂມງ, ທວນເສັງ 130 ຊົ່ວໂມງ, ໄປທັກສະນະສຶກສາ 14 ຊົ່ວໂມງ, ສອບເສັງ 144 ຊົ່ວໂມງ, ວິຊາເລືອກ 96 ຊົ່ວໂມງ, ຊຽນບົດ 195 ຊົ່ວໂມງ, ປ້ອງກັນໂຄງຮ່າງຈົບຊັ້ນ 7 ຊົ່ວໂມງ ແລະ ປ້ອງກັນບົດຈົບຊັ້ນ 7 ຊົ່ວໂມງ.
ຜ່ານການສຶກສາຄົ້ນຄວ້າຮໍ່າຮຽນ, ນັກສຶກອະນຸປະລິນຍາ ສາມາດສະຫຼຸບຕີລາຄາຜົນການຮຽນ ໄດ້ເກຼດ A ທຸກສະຫາຍ, ຜົນການປ້ອງກັນບົດຈົບຊັ້ນ ໄດ້ເກຼດ A ມີ 45 ສະຫາຍ ຍິງ 8 ສະຫາຍ ແລະ ເກຼດ B ມີ 6 ສະຫາຍ ຍິງ 1 ສະຫາຍ.
ໂອກາດດຽວກັນ, ພົທ ກົງທອງ ພົງວິຈິດ ຍັງໄດ້ເນັ້ນໃຫ້ຄະນະພັກ-ຄະນະອໍານວຍການ ວິທະຍາຄານການເມືອງ ເອົາໃຈໃສ່ສຶກສາອົບຮົມການເມືອງນໍາພາແນວຄິດໃຫ້ພະນັກງານ-ຄູອາຈານ ຕະຫຼອດນັກສຶກສາໃຫ້ມີແນວຄິດອຸ່ນອຽນທຸ່ນທ່ຽງຕໍ່ໜ້າທີ່ວຽກງານ, ປະຕິບັດລະບຽບວິໄນຂອງໂຮງຮຽນຢ່າງເຂັ້ມງວດ, ຊຸກຍູ້ປຸກລະດົມຂະບວນການຕ່າງໆໃຫ້ຟົດຟື້ນ ເປັນຕົ້ນແມ່ນ ຂະບວນການສອນດີ, ຮຽນເກັ່ງ, ມີວິໄນ, ຂະບວນການກິລາວັນນະຄະດີໃຫ້ຟົດຟື້ນ, ຂະບວນເພີ່ມພູນຜະລິດຜົນ, ປູກຝັງລ້ຽງສັດຕາມເງື່ອນໄຂຕົວຈິງຂອງແຕ່ລະຄອບຄົວ ເພື່ອເຮັດໃຫ້ຊີວິດການເປັນຢູ່ດີຂຶ້ນ, ຕັ້ງໜ້າຝຶກຝົນຫຼໍ່ຫຼອມຕົນເອງໃຫ້ກາຍເປັນຄູສອນດີ-ສອນເກັ່ງ, ໄດ້ຮັບຄວາມນັບຖືເຊື່ອໝັ້ນຈາກນັກສຶກສາ; ຄູ-ອາຈານຕ້ອງເອົາໃຈໃສ່ໃນການຄົ້ນຄວ້າແຕ່ງບົດສອນ ແລະ ຂຶ້ນຫ້ອງສິດສອນໃຫ້ມີຄວາມຮັບປະກັນ.
=:>>> ສ່ວນນັກສຶກສາທີ່ຈົບອອກໄປ ຕ້ອງເອົາໃຈໃສ່ຝຶກຝົນຫຼໍ່ຫຼອມຕົນເອງ ໃຫ້ກາຍເປັນພະນັກງານທີ່ມີຄຸນທາດການເມືອງໜັກແໜ້ນ, ມີອຸດົມການທີ່ຖືກຕ້ອງ, ມີທັດສະນະຫຼັກໝັ້ນຮູ້ຈໍາແນກມິດ ແລະ ສັດຕູຢ່າງຈະແຈ້ງ, ມີຄຸນສົມບັດສິນທຳປະຕິວັດ, ມີແບບແຜນດຳລົງຊີວິດທີ່ປອດໃສຂາວສະອາດ, ມີແບບແຜນທີ່ເຮັດວຽກທີ່ດີ, ສືບຕໍ່ຄົ້ນຄ້ວາກຳແໜ້ນບັນດາຫຼັກມູນທິດສະດີມາກ-ເລນິນ, ແນວຄິດໄກສອນ ພົມວິຫານ, ແນວທາງ, ແຜນນະໂຍບາຍຂອງພັກ, ກົດໝາຍ ແລະ ລະບຽບການຂອງລັດ ເພື່ອທີ່ຈະກາຍເປັນພະນັກງານນໍາພາ-ບັນຊາ ໃນທຸກຂົງເຂດວຽກງານໃນອະນາຄົດ.
ຂ່າວ: ລັດດາວັນ
