ວັນທີ 4 ກໍລະກົດ 2024, ທ່ານ ພົອ ວິໄລ ຫຼ້າຄໍາຟອງ ກໍາມະການກົມການເມືອງສູນກາງພັກ ຮອງນາຍົກລັດຖະມົນຕີ ລັດຖະມົນຕີກະຊວງ ປກສ ພ້ອມດ້ວຍຄະນະ ໄດ້ເຄື່ອນໄຫວຊີ້ນໍາວຽກງານວິຊາສະເພາະຢູ່ ກອງບັນຊາການ ປກສ ແຂວງອັດຕະປື, ໃຫ້ກຽດຕ້ອນຮັບຂອງ ທ່ານ ພົຈວ ສີເວີນ ແກ້ວສີວົງສາ ຫົວໜ້າກອງບັນຊາການ ປກສ ແຂວງອັດຕະປື ພ້ອມດ້ວຍຄະນະ.
ທ່ານ ພົຈວ ສີເວີນ ແກ້ວສີວົງສາ ຫົວໜ້າກອງບັນຊາການ ປກສ ແຂວງອັດຕະປື ໄດ້ລາຍ ງານການເຄື່ອນໄຫວວຽກງານປ້ອງ ກັນຄວາມສະຫງົບ ພາຍໃນແຂວງອັດຕະປື ໂດຍຫຍໍ້; ເຊິ່ງທ່ານໄດ້ຍົກໃຫ້ເຫັນບາງຜົນງານທີ່ຍາດມາໄດ້ໃນໄລຍະຜ່ານມາ, ຄະນະພັກ-ຄະນະກອງບັນຊາການ ໄດ້ເອົາໄຈໃສ່ນໍາພາ-ຊີ້ນໍາວຽກງານປ້ອງກັນຄວາມສະຫງົບ ແລະ ຕອບຕ້ານທຸກປະກົດ ການຫຍໍ້ທໍ້ຂອງກຸ່ມຄົນບໍ່ດີ ທີ່ຫວັງມ້າງເພທໍາລາຍຕໍ່ການນໍາພາຂອງພັກເຮົາ, ເຮັດໃຫ້ແຂວງອັດຕະປື ມີຄວາມສະ ຫງົບໂດຍພື້ນຖານ. ແຕ່ກໍປາສະຈາກບໍ່ໄດ້ບັນຫາປາກົດການຫຍໍ້ທໍ້ທີ່ເກີດຂື້ນໃນສັງຄົມ ເປັນຕົ້ນແມ່ນບັນຫາມົ້ວສຸມຢາເສບຕິດຊະນິດຕ່າງໆ, ຄ້າຂາຍຢາເສບຕິດ, ລັກຊັບພົນລະເມືອງ, ນໍາໃຊ້ອາວຸດລ່າເນື້ອ, ອາວຸດເຖື່ອນ, ຄ້າຂາຍເຖື່ອນ ແລະ ອື່ນໆ.
ໂອກາດນີ້, ທ່ານ ພົອ ວິໄລ ຫຼ້າຄໍາຟອງ ໄດ້ເນັ້ນໜັກໃຫ້ຄະນະພັກ-ຄະນະບັນຊາ ແຕ່ລະຂັ້ນ ເອົາໃຈໃສ່ສຶກສາອົບຮົມການເມືອງ-ແນວຄິດ ໃຫ້ນາຍ ແລະ ພົນຕໍາຫຼວດ ໃຫ້ມີແນວຄິດຈົງຮັກພັກດີຕໍ່ພັກ, ເຊື່ອໝັ້ນຕໍ່ການຈັດຕັ້ງ ເພື່ອກຽມພ້ອມຮັບໃຊ້ໜ້າທີ່ວຽກງານ ໃນການຮັກສາຄວາມສະຫງົບປອດໄພ ໃຫ້ສໍາເລັດຕາມການມອບໝາຍ, ເຮັດໃຫ້ການຈັດຕັ້ງມີຄວາມເຂັ້ມແຂງຮອບດ້ານ, ສືບຕໍ່ຫັນເອົາພະນັກງານລົງກໍ່ສ້າງຮາກຖານການເມືອງໃຫ້ແຂງແຮງ, ເອົາໃຈໃສ່ໃນການຕິດຕາມເປົ້າໝາຍທີ່ເຄື່ອນໄຫວກໍ່ຄວາມບໍ່ສະຫງົບຕ່າງໆ ຊອກໃຫ້ໄດ້ແລ້ວແກ້ໄຂໃຫ້ທັນເວລາ ແລະ ຖືກຕ້ອງຕາມລະບຽບກົດໝາຍ.
ໃນວັນດຽວກັນນັ້ນ, ທ່ານ ພົອ ວິໄລ ຫຼ້າຄໍາຟອງ ກໍາມະການກົມການເມືອງສູນກາງພັກ ຄະ ນະກໍາມະການ ປ້ອງກັນຊາດ-ປ້ອງກັນຄວາມສະຫງົບ ສູນກາງ ຮອງນາຍົກລັດຖະມົນຕີ ລັດຖະມົນຕີກະຊວງປ້ອງກັນຄວາມສະຫງົບ ໄດ້ລົງພົບປະໂອ້ລົມກໍາລັງປ້ອງກັນຊາດ-ປ້ອງ ກັນຄວາມສະຫງົບ ແຂວງອັດຕະປື; ເຂົ້າຮ່ວມມີ ທ່ານ ພົທ ວັນທອງ ກອງມະນີ ກໍາມະການສູນກາງພັກ ເຈົ້າແຂວງ ປະທານຄະນະກໍາມະການ ປກຊ-ປກສ ແຂວງອັດຕະປື, ມີຄະນະປະຈໍາພັກແຂວງ, ກໍາມະການພັກແຂວງ ຕະຫຼອດຮອດນາຍທະຫານ, ນາຍ ແລະ ພົນຕໍາຫຼວດ ເຂົ້າຮ່ວມ.
ໃນການພົບປະໂອ້ລົມຄັ້ງນີ, ຄະນະກໍາມະການປ້ອງກັນຊາດ-ປ້ອງກັນຄວາມສະຫງົບ ໄດ້ຮັບຟັງການລາຍງານຫຍໍ່້ການຈັດຕັ້ງປະຕິບັດວຽກງານ ປກຊ-ປກສ ໃນໄລຍະ 6 ເດືອນຕົ້ນປີ 2024, ເຊິ່ງໄດ້ຍົກໄຫ້ເຫັນບາງຜົນງານທີ່ກໍາລັງ ປກຊ-ປກສ ແຂວງຍາດມາໄດ້ໃນໄລຍະຜ່ານມາ ຈາກທ່ານ ພັອ ບຸນຈັນ ສີຫາວົງ ຫົວໜ້າການທະຫານ, ຮອງປະທານ, ຜູ້ປະຈໍາການ, ຄະນະກໍາມະການ ປ້ອງກັນຊາດ-ປ້ອງກັນຄວາມສະຫງົບ ແຂວງອັດຕະປື ເຊິ່ງທ່ານໄດ້ລາຍງານໃຫ້ຮູ້ວ່າ: ຄະນະພັກ-ຄະນະບັນຊາ ໄດ້ຫັນເອົາກໍາລັງປ້ອງກັນຊາດ-ປ້ອງກັນຄວາມສະຫງົບ ລົງກໍ່ສ້າງຮາກຖານການເມືອງ ສົມທົບກັບກອງປະຕິບັດງານ, ປຸກລະ ດົມຂົນຂວາຍອໍານາດການປົກຄອງ, ປະຊາຊົນບັນດາເຜົ່າແຕ່ລະທ້ອງຖິ່ນ ໃຫ້ມີສ່ວນຮ່ວມໃນວຽກງານປ້ອງກັນຊາດ-ປ້ອງ ກັນຄວາມສະຫງົບ ໃນຂອບເຂດຄວາມຮັບຜິດຊອບຕົນ; ຜ່ານມາໄດ້ປະກາດບ້ານປ້ອງກັນຊາດເຂັ້ມແຂງ 5 ບ້ານ, ປະເມີນຄອບຄົວປ້ອງກັນຊາດເຂັ້ມແຂງ 1.312 ຄອບຄົວ, ປະກາດກົມກອງແຮກສ່ຽວ 1 ກົມກອງ, ປະກາດບ້ານປ້ອງກັນຄວາມສະ ຫງົບດີ 3 ບ້ານ, ສ້າງຄອບຄົວ ແລະ ບ້ານປ້ອງກັນຄວາມສະຫງົບດີຢູ່ເມືອງພູວົງ ມີ 3 ບ້ານ, ມີ 581 ຄອບຄົວ, ມີ 520 ຫຼັງຄາເຮືອນ; ວຽກງານປັບປຸງກໍ່ສ້າງກໍາລັງ ເອົາໃຈໃສ່ສຶກສາອົບຮົມການເມືອງ-ແນວຄິດ ໃຫ້ພະນັກງານ-ນັກຮົບ ຮັບຮູ້ເຊື່ອມຊຶມແນວທາງນະໂຍບາຍຂອງພັກ, ກົດໝາຍຂອງລັດ ບັນດາຂໍ້ກໍານົດ, ມະຕິ, ຄໍາສັ່ງ, ມະຕິກອງປະຊຸມໃຫຍ່ຕ່າງໆຂອງກະ ຊວງປ້ອງກັນປະເທດ ແລະ ກະຊວງປ້ອງກັນຄວາມສະຫງົບ ໃຫ້ມີຄວາມສາມັກຄີເປັນເອກະພາບ, ມີສະຕິຕື່ນຕົວເປັນເຈົ້າ ການໃນການປະຕິບັດໜ້າທີ່ວຽກງານ ທີ່ໄດ້ຮັບມອບໝາຍຢ່າງມີຜົນສໍາເລັດ.
ໂອກາດດັ່ງກ່າວ, ທ່ານ ພົອ ວິໄລ ຫຼ້າຄໍາຟອງ ຟອງ ໄດ້ມີຄໍາເຫັນໂອ້ລົມຕໍ່ພະນັກງານຫຼັກແຫຼ່ງກໍາລັງ ປກຊ-ປກສ, ເຊິ່ງທ່ານໄດ້ຕ່າງໜ້າໃຫ້ຄະນະກໍາມະການ ປກຊ-ປກສ ສູນກາງ, ລັດຖະບານ ສະແດງຄວາມຍ້ອງຍໍຊົມເຊີຍຕໍ່ຜົນງານ,ໄຊຊະນະ ທີ່ຄະນະກໍາມະການ ປກຊ-ປກສ ແຂວງອັດຕະປື ຍາດມາໄດ້ໃນໄລຍະຜ່ານມາ ເຮັດໃຫ້ກໍາລັງ ປກຊ-ປກສ ແຂວງ ມີການຫັນປ່ຽນ, ມີບາດກ້າວທີ່ໜັກແໜ້ນໃນຕໍ່ໜ້າ.
ພ້ອມນັ້ນ, ທ່ານໄດ້ເນັ້ນໜັກໃຫ້ທຸກສະຫາຍເຊີດຊູສະຕິລະວັງຕົວ, ມີສະຕິໃນການປົກປັກຮັກສາແນວທາງນະໂຍບາຍຂອງພັກ-ລັດ, ປົກປັກຮັກສາໝາກຜົນຂອງການປະຕິວັດ, ກໍາລັງ ປກຊ-ປກສ ຕ້ອງເປັນກໍາລັງລັກແຫຼ່ງ, ສ້າງສະຕິປຸກລະດົມຈິດໃຈຮັກຊາດ, ພ້ອມກັນນໍາພາທົ່ວປວງຊົນເຮັດວຽກງານປ້ອງກັນຊາດ-ປ້ອງກັນຄວາມສະຫງົບ ຄຽງຄູ່ກັບການພັດທະນາເສດຖະ ກິດ-ສັງຄົມ, ປົກປັກຮັກສາວັດທະນະທໍາຮີດຄອງປະເພນີອັນດີງາມ, ຫັນເອົາພະນັກ ງານລົງກໍ່ສ້າງຮາກຖານຢ່າງແຂງແຮງ ສືບຕໍ່ສ້າງຮາກຖານປັບປຸງຕານ່າງ ປ້ອງກັນຊາດ-ປ້ອງກັນຄວາມສະຫງົບ ໃຫ້ທົ່ວເຖິງ, ຍົກສູງສະຕິເປັນເຈົ້າການໃນການປົກປັກຮັກສາທ້ອງ ຖິ່ນ, ຕ້ານການຮຸກຮານມ້າງເພທໍາລາຍຂອງກຸ່ມຄົນບໍ່ດີ ພ້ອມກັນລົງກໍ່ສ້າງຮາກຖານພັດທະ ນາຊົນນະບົດ ຕິດພັນກັບວຽກງານສາມສ້າງ, 4 ເນື້ອໃນ 4 ຄາດໝາຍ ປະກອບສ່ວນຢ່າງຕັ້ງໜ້າໃນການປັບປຸງອໍານາດການປົກຄອງ, ປົກປັກຮັກສາສິດເປັນເຈົ້າປະຊາຊົນ, ເພີ່ມທະວີການເຄື່ອນໄຫວວິຊາສະເພາະຢູ່ແຕ່ລະຂັ້ນໃຫ້ແຂງແຮງ, ເອົາໃຈໃສ່ວຽກງານກຽມພ້ອມສູ້ຮົບ ປັບປຸງກໍາລັງເພື່ອກຽມພ້ອມແກ້ໄຂທຸກກໍລະນີທີ່ອາດເກີດຂຶ້ນ, ສືບຕໍ່ຈັດຕັ້ງປະຕິບັດວາລະແຫ່ງຊາດ ວ່າດ້ວຍການແກໄຂບັນຢາເສບຕິດຈົນເຖິງປີ 2025, ບັນຫາການຄ້າມະ ນຸດ, ສື່ສັງຄົມອອນລາຍຕ່າງໆ ສຸມໃສ່ກໍາລັງທີ່ນອນຢູ່ໃນຄວາມຮັບຜິດຊອບຂອງຕົນ ໃຫ້ມີຄວາມເຂັ້ມແຂງທາງດ້ານການຈັດຕັ້ງ, ມີແນວຄິດທາງດ້ານການເມືອງໜັກແໜ້ນ, ມີລະບຽບວິໃນເຂັ້ມງວດ, ມີແບບແຜນວິທີເຮັດວຽກ, ດຸໝັ້ນອົດທົນ, ມີນໍ້າໃຈເສຍສະລະເພື່ອຊາດ, ມີອຸດົມການແໜ້ວແໜ້, ກໍາໄດ້ມິດ-ສັດຕູຢ່າງຈະແຈ້ງ, ຕອບຕ້ານແກ້ໄຂທຸກກໍລະນີທີ່ຈະເກີດຂື້ນ ຕອບຕ້ານທຸກເຫດການທີ່ແຕະຕ້ອງເຖີງບົດບາດການນໍາພາຂອງພັກ ເອົາໃຈໃສ່ປີ່ທ່ອງ ທ່ຽວ, ກອງປະຊຸມໃຫຍ່ 3 ຂັ້ນ ແລະ ກອງປະຊຸມສຸດຍອດອາຊຽນທີ່ ສປປ ລາວ ຮັບກຽດເປັນເຈົ້າພາບ ໃຫ້ມີຄວາມສະຫງົບປອດໄພເປັນຢ່າງດີ.
