ກົມໃຫຍ່ຕໍາຫຼວດ ກະຊວງປ້ອງກັນຄວາມສະຫງົບ ໄດ້ຈັດຕັ້ງເຜີຍແຜ່ເຊື່ອມຊຶມມະຕິ 8 ສະໄໝທີ XI ຂອງຄະນະບໍລິຫານງານສູນກາງພັກ ໃນວັນທີ 3 ກໍລະກົດ 2024, ເຜີຍໂດຍສະຫາຍ ພົຕ ຄໍາກິ່ງ ຜຸຍຫຼ້າມະນີວົງ ຄະນະປະຈໍາພັກກະຊວງ ຮອງລັດຖະມົນຕີກະຊວງປ້ອງກັນຄວາມສະຫງົບ ຫົວໜ້າກົມໃຫຍ່ຕໍາຫຼວດ, ມີຄະນະປະຈຳພັກກົມໃຫຍ່, ຫ້ອງ, ສູນ, ພະແນກເຂົ້າຮ່ວມ.
ສະຫາຍ ພົຕ ຄໍາກິ່ງ ຜຸຍຫຼ້າມະນີວົງ ກ່າວວ່າ: ກອງປະຊຸມຄົບຄະນະ ຄັ້ງທີ 8 ຂອງຄະນະບໍລິຫານງານສູນກາງພັກ ສະໄໝທີ XI ໄດ້ດໍາ ເນີນໃນລະຫວ່າງວັນທີ 13-17 ພຶດສະພາ 2024 ທີ່ຫ້ອງວ່າການສູນກາງພັກ ພາຍໃຕ້ການ ເປັນປະທານຂອງສະ ຫາຍ ທອງລຸນ ສີສຸລິດ ເລຂາທິການໃຫຍ່ຄະນະບໍລິຫານງານສູນກາງພັກ ປະຊາຊົນ ປະຕິວັດລາວ, ປະທານປະເທດ ແຫ່ງ ສປປ ລາວ. ກອງປະຊຸມໄດ້ດໍາເນີນໄປບົນຈິດໃຈຍົກສູງຄວາມຮັບຜິດຊອບການເມືອງ, ບັນດາສະຫາຍສູນກາງ ໄດ້ສຸມໃສ່ປະກອບຄໍາເຫັນດ້ວຍບັນຍາກາດຟົດຟື້ນ, ເລິກເຊິ່ງ, ກົງໄປກົງມາ ແລະ ໄດ້ໃຫ້ທິດຊີ້ນໍາ. ຕໍ່ບັນຫາສໍາຄັນດັ່ງນີ້, ຕີລາຄາການຈັດ ຕັ້ງປະຕິບັດແຜນພັດທະນາເສດຖະກິດ-ສັງຄົມ, ແຜນງົບປະມານ, ແຜນເງິນຕາ 6 ເດືອນຕົ້ນປີ ແລະ ທິດທາງແຜນການ 6 ເດືອນທ້າຍປີ 2024 ຕິດພັນກັບການ ຈັດຕັ້ງປະຕິບັດວາລະແຫ່ງຊາດ ວ່າດ້ວຍການແກ້ໄຂຄວາມຫຍຸ້ງຍາກດ້ານເສດຖະກິດ-ການເງິນ ແລະ ວາລະແຫ່ງຊາດ ວ່າດ້ວຍການແກ້ໄຂບັນຫາຢ່າເສບຕິດ.
ກອງປະຊຸມ ໄດ້ຕີລາຄາວ່າດ້ວຍຄວາມບຸກບືນສູ້ຊົນຂອງທົ່ວພັກ, ທົ່ວລັດ, ທົ່ວກໍາລັງປະກອບອາວຸດ ແລະ ທົ່ວປວງຊົນລາວທັງຊາດ ສາມາດເຮັດໃຫ້ການຈັດຕັ້ງປະຕິບັດຄາດໝາຍສູ້ຊົນດ້ານຕ່າງໆ ບັນລຸໄດ້ເປັນສ່ວນຫຼາຍ, 6 ເດືອນຕົ້ນປີ ຄາດຄະເນ GDP ຈະຂະຫຍາຍຕົວໃນລະດັບ 4,7%; ການຈັດເກັບລາຍຮັບງົບປະມານບັນລຸຕາມແຜນທີ່ສະພາແຫ່ງຊາດຮັບຮອງ, ຫຼາຍທ້ອງຖິ່ນໄດ້ເກີນແຜນ, ເຖິງຢ່າງໃດກໍ່ຕາມເຫັນວ່າຜົນໄດ້ຮັບນັ້ນຫຼາຍດ້ານຍັງບໍ່ທັນໜັກແໜ້ນ ແລະ ໝັ້ນຄົງ, ບັນຫາເຄັ່ງຮ້ອນ ເປັນຕົ້ນເງິນກີບສືບຕໍ່ອ່ອນຄ່າ, ອັດຕາແລກປ່ຽນ ແລະ ເງິນເຟີ້ຍັງຢູ່ໃນລະດັບສູງ, ລາຄາສິນຄ້າ-ຄ່າຄອງຊີບຍັງສືບຕໍ່ສູງ ຂຶ້ນ. ກອງປະຊຸມໄດ້ຍົກໃຫ້ເຫັນແຈ້ງສິ່ງທ້າທາຍ ແລະ ກາລະໂອກາດ, ເຊິ່ງຕ້ອງກໍາແໜ້ນ ແລະ ໝູນໃຊ້ຢ່າງປະດິດສ້າງ, ສົມ ເຫດສົມຜົນເຂົ້າໃນການຂຸດຄົ້ນ ແລະ ນໍາໃຊ້ທ່າແຮງບົ່ມຊ້ອນພາຍໃນ ເພື່ອສືບຕໍ່ຈັດຕັ້ງປະຕິບັດວຽກງານຈຸດສຸມໃນ 6ເດືອນທ້າຍປີ 2024 ເປັນຕົ້ນແມ່ນສືບຕໍ່ແກ້ໄຂຄວາມເຄັ່ງຮ້ອນດ້ານເສດຖະກິດ-ການເງິນ: ເລັ່ງແກ້ໄຂອັດຕາເງິນເຟີ້ໃຫ້ຫຼຸດລົງ,ດຶງອັດຕາແລກປ່ຽນເງິນຕາຕ່າງປະເທດໃຫ້ຕໍ່າລົງ, ເອົາໃຈໃສ່ຄຸ້ມຄອງເງິນຕາ, ການແລກປ່ຽນເງິນຕາຂອງທະນາຄານທຸລະ ກິດ ແລະ ລາຄາສິນຄ້າໃຫ້ຖືກຕ້ອງ, ຮັດກຸມຕາມກົດໝາຍ ຕິດພັນກັບການຍູ້ແຮງການຜະລິດ-ທຸລະກິດດ້ວຍມາດຕະການ, ກົນ ໄກ, ເຄື່ອງມືດ້ານເສດຖະກິດທີ່ມີແລ້ວສົມທົບກັບການຄົ້ນຄວ້າວາງນະໂຍບາຍ, ວິທີການໃໝ່ດ້ານການເງິນ-ເງິນຕາ (ນະໂຍ ບາຍດອກເບ້ຍ, ສິນເຊື່ອ, ເງິນເດືອນ) ເພື່ອແກ້ໄຂບັນຫາໃຫ້ແທດເຖິງ ແລະ ເປັນຮູບປະທໍາຕົວຈິງ; ສຸມໃສ່ແກ້ໄຂໜີ້ສິນຢ່າງມີແຜນການລະອຽດ (ການຈັດສັນງົບປະມານ ເພື່ອຮັບປະກັນການໃຊ້ແທນໜີ້ສິນຢ່າງເປັນລະບົບ), ບໍ່ເປັນການແກ້ໄຂສະ ເພາະໜ້າ. ພ້ອມນັ້ນ, ສືບຕໍ່ປັບໂຄງສ້າງໜີ້ພາກລັດຄືນໃໝ່, ເດັດຂາດບໍ່ໃຫ້ມີການຈ່າຍນອກແຜນງົບປະມານ ແລະ ບັນຫາອື່ນໆ.
ພ້ອມດຽວກັນນີ້, ໃນກອງປະຊຸມຍັງໄດ້ເຜີຍແຜ່ມະຕິ ວ່າດ້ວຍການສ້າງເສດຖະກິດເອກະລາດເປັນເຈົ້າຕົນເອງ ໄລຍະໃໝ່ ແລະ ປາຖະກະຖາ ວັນຜ່າວົງປິດລ້ອມຂອງກອງພັນທີ 2 ວິລະຊົນແຫ່ງຊາດ ທົົ່ງໄຫຫີນຊຽງຂວາງ ຄົບຮອບ 65 ປີ, ວັນວິລະກໍາໂຕນຄຸກຢ່າງມະຫັດສະຈັນຂອງບັນດາຜູ້ນໍາພັກ ແລະ ແນວລາວຮັກຊາດ ຄົບຮອບ 64 ປີ, ວັນເກີດປະທານ ໂຮ່ຈິມິນ ຄົບ ຮອບ 134 ປີ, ວັນໄຊຊະນະບັ້ນຮົບດຽນບຽນຟູ ຄົບຮອບ 70 ປີ ແລະ ວັນໄຊຊະນະຂອງສະພາບໂຊວຽດ ເໜືອຟາດຊິດເຢຍ ລະມັນ ໃນສົງຄາມໂລກຄັ້ງທີ 2 ຄົບຮອບ 79 ປີ.
ຈາກນັ້ນ, ໃນກອງປະຊຸມຍັງໄດ້ຜ່ານມະຕິຕົກລົງຂອງຄະນະພັກກົມໃຫຍ່ຕໍາຫຼວດ ສະບັບເລກທີ 251/ຄພ ຕຫຼ, ລົງວັນທີ 24 ມິຖຸນາ 2024 ວ່າດ້ວຍການບົ່ງຕົວແຕ່ງຕັ້ງເລຂາໜ່ວຍພັກຮາກຖານ ບັນດາກົມ, ກອງທີ່ຂື້ນກັບຄະນະພັກກົມໃຫຍ່ຕໍາຫຼວດ ຕື່ມອີກ.
