ໃນຕອນບ່າຍວັນທີ 28 ມິຖຸນາ 2024, ທີ່ຫ້ອງຮັບແຂກກະຊວງປ້ອງກັນຄວາມສະຫງົບ, ທ່ານ ພົນຕີ ຄໍາກິ່ງ ຜຸຍຫຼ້າມະນີວົງ ຮອງລັດຖະມົນຕີກະຊວງປ້ອງກັນຄວາມສະຫງົບ ພ້ອມດ້ວຍຄະນະ, ໄດ້ຕອນຮັບການເຂົ້າຢ້ຽມຂໍ່ານັບຂອງທ່ານ ພົນໂທ ຫວັງ ຢົງ ຫົວໜ້າອົງການຕໍາຫຼວດສາກົນ ແຫ່ງຊາດ ຈີນ, ໃນໂອກາດທີ່ ທ່ານໄດ້ມາເຂົ້າຮ່ວມ ກອງປະຊຸມເຈົ້າໜ້າທີ່ອາວຸໂສອາຊຽນ ວ່າດ້ວຍການຕ້ານອາຊະຍາກໍາຂ້າມຊາດ ຄັ້ງທີ 24 ທີ່ ສປປ ລາວ ເປັນເຈົ້າພາບ.
ໃນໂອກາດທີ່ມີຄວາມໝາຍສໍາຄັນນີ້ ທ່ານ ຮອງລັດຖະມົນຕີກະຊວງປ້ອງກັນຄວາມສະຫງົບ ສປປ ລາວ, ໄດ້ສະແດງຄວາມຕ້ອນຮັບ ແລະ ຕີລາຄາສູງຕໍ່ຄະນະຜູ້ແທນຕໍາຫຼວດສາກົນ ແຫ່ງຊາດ ຈີນ, ພ້ອມຄະນະທີ່ໄດ້ມາພົບປະຢ້ຽມໃນຄັ້ງນີ້, ພ້ອມນີ້ຄະນະຜູ້ແທນທັງສອງຝ່າຍໄດ້ພົບປະແລກປ່ຽນ ແລະ ໄດ້ປຶກສາຫາລືກັນຫຼາຍວຽກງານຮ່ວມກັນ ເພື່ອສືບຕໍ່ໃນການພົວພັນຮ່ວມມືຊ່ວຍເຫຼືອເຊິ່ງກັນແລະກັນລະຫວ່າງ ສອງປະເທດ ສປປ ລາວ – ສປ ຈີນ ໂດຍເວົ້າສະເພາະແມ່ນສອງກະຊວງປ້ອງກັນຄວາມຄວາມສະຫງົບ ລາວ-ຈີນ, ເປັນຕົ້ນ ແມ່ນ ວຽກງານພົວພັນຮ່ວມມືນັນໃນການປ້ອງກັນຄວາມສະຫງົບທາງດ້ານການເມືອງລະຫວ່າງສອງປະເທດລາວ-ຈີນ, ວຽກງານປ້ອງກັນຄວາມສະຫງົບຕາມຊາຍແດນ, ວຽກງານຕ້ານອາຊະຍາກໍາຂ້າມຊາດ, ວຽກງານປ້ອງກັນຄວາມສະຫງົບເສັ້ນທາງລົດໄຟລາວ-ຈີນ.
ໃນໂອກາດດຽວກັນນີ້, ທ່ານ ພົນໂທ ຫວັງ ຢົງ ຫົວໜ້າອົງການຕຳຫຼວດສາກົນ ແຫ່ງຊາດ ຈີນ,ໄດ້ສະແດງຄວາມຂອບໃຈມາຍັງ ທ່ານ ຮອງລັດຖະມົນຕີກະຊວງປ້ອງກັນຄວາມສະຫງົບ ລາວ, ທີ່ໄດ້ໃຫ້ການຕ້ອນຮັບຢ່າງອົບອຸ່ນ ແລະ ຈະນໍາເອົາເນື້ອໃນສໍາຄັນທີ່ໄດ້ພົບປະ, ປຶກສາຫາລືກັນໃນຄັ້ງນີ້ນໍາໄປສະເໜີຕໍ່ຂັ້ນເທິງເພື່ອສືບຕໍ່ຈັດຕັ້ງປະຕິບັດຜັນຂະຫຍາຍເຂົ້າສູ່ວຽກງານຕົວຈິງລະຫວ່າງ ສອງປະເທດ ສປປ ລາວ – ສປ ຈີນ ເວົ້າລວມ, ເວົ້າສະເພາະແມ່ນ ສອງກະຊວງປ້ອງກັນຄວາມສະຫງົບ ລາວ-ຈີນ ໃຫ້ໄດ້ຮັບໝາກຜົນ.
ໂອກາດນີ້, ທ່ານ ພົນໂທ ຫວັງ ຢົງ ກໍໄດ້ຕາງໜ້າໃຫ້ກະຊວງປ້ອງກັນຄວາມສະຫງົບ ສປ ຈີນ ມອບພາຫະນະຈຳນວນ 40 ຄັນ ມູນຄ່າ 5 ລ້ານຢວນ ໃຫ້ກະຊວງປ້ອງກັນຄວາມສະຫງົບ ສປປ ລາວ, ໂດຍມີພິທີເຊັນບົດບັນທຶກຢ່າງເປັນທາງການ, ຕາງໜ້າກະຊວງ ປກສ ລາວ ລົງນາມໂດຍທ່ານ ພັນເອກ ກີ້ ຈັນທະວົງສາ ຫົວໜ້າກົມພົວພັນຕ່າງປະເທດ, ຝ່າຍກະຊວງ ປກສ ຈີນ ລົງນາມໂດຍ ທ່ານ ພົນໂທ ຫວັງ ຢົງ.
ພາບ-ຂ່າວ: ບຸນເຫຼືອ