ກອງປະຊຸມເຈົ້າໜ້າທີ່ອາວຸໂສອາຊຽນ ວ່າດ້ວຍອາຊະຍາກໍາຂ້າມຊາດ ຄັ້ງທີ 24 ໄດ້ເປີດຂຶ້ນໃນວັນທີ 26 ມິຖຸນາ 2024 ທີ່ນະຄອນຫຼວງວຽງຈັນ ສປປ ລາວ, ໂດຍການເຂົ້າຮ່ວມຂອງ ທ່ານ ພົນໂທກົງທອງ ພົງວິຈິດ ກຳມະການສູນກາງພັກ ຮອງລັດຖະມົນຕີກະຊວງປ້ອງກັນຄວາມສະຫງົບລາວ, ມີບັນດາຫົວໜ້າເຈົ້າໜ້າທີ່ອາວຸໂສອາຊຽນ, ຫົວໜ້າຄະນະຜູ້ແທນຕີມໍເລສເຕ, ຮອງເລຂາທິການໃຫຍ່ອາຊຽນ ດ້ານການເມືອງ-ຄວາມໝັ້ນຄົງ ພ້ອມດ້ວຍຄະນະຜູ້ແທນອາຊຽນ ເຂົ້າຮ່ວມ.
ທ່ານ ພົນໂທ ກົງທອງ ພົງວິຈິດ ຮອງລັດຖະມົນຕີກະຊວງປ້ອງກັນຄວາມສະຫງົບ ແຫ່ງ ສປປ ລາວ ໄດ້ກ່າວເປີດກອງປະຊຸມ ເຈົ້າໜ້າທີ່ອາວຸໂສອາຊຽນ ວ່າດ້ວຍການຕ້ານອາຊະຍາກາຂ້າມຊາດ ຄັ້ງທີ 24 ຢ່າງເປັນທາງການ ເຊີ່ງທ່ານໄດ້ກ່າວວ່າ: ໃນປີ 2024 ສປປ ລາວ ໄດ້ຮັບກຽດເປັນປະທານອາຊຽນ ພາຍໃຕ້ຄໍາຂັວນ “ເພີ່ມທະວີການເຊື່ອມຈອດ ແລະ ຄວາມເຂັ້ມແຂງອາຊຽນ” ໂດຍອີງໃສ່ຄໍາຂັວນດັ່ງກ່າວ ສປປ ລາວ ໄດ້ກໍານົດ 9 ບູລິມະສິດ ໃນການເປັນປະທານອາຊຽນຂອງຕົນ. ໃນນັ້ນ,່ 4 ບູລິມະສິດ ຕິດພັນກັບການເຊື່ອມຈອດ ແລະ 5 ບູລິມະສິດ ຕິດພັນກັບຄວາມເຂັ້ມແຂງອາຊຽນ ແນໃສ່ຮັບປະກັນຄວາມພະຍາຍາມຮ່ວມກັນຂອງອາຊຽນ ໃນການສ້າງຄວາມເຂັ້ມແຂງປະຊາຄົມອາຊຽນ ເພື່ອນໍາໃຊ້ກາລະໂອກາດ ແລະ ແກ້ໄຂສິ່ງທ້າທາຍໃນປັດຈຸບັນ ແລະ ຕໍ່ໜ້າຢ່າງມີປະສິດທິພາບ. ສໍາລັບກອງປະຊຸມເຈົ້າໜ້າທີ່ອາວຸໂສອາຊຽນ ວ່າດ້ວຍການຕ້ານອາຊະຍາກໍາຂ້າມຊາດ ເປັນກົນໄກໜຶ່ງທີ່ສໍາຄັນ, ມີພາລະບົດບາດຊ່ວຍກອງປະຊຸມລັດຖະມົນຕີອາຊຽນ ວ່າດ້ວຍການຕ້ານອາຊະຍາກໍາຂ້າມຊາດ, ຈັດຕັ້ງປະຕິບັດ, ຕິດຕາມ ແລະ ປະສານສົມທົບການຕົກລົງ ຈາກກອງປະຊຸມລັດຖະມົນຕີອາຊຽນ ວ່າດ້ວຍການຕ້ານອາຊະຍາກໍາຂ້າມຊາດ ແລະ ປະຕິບັດຕາມໜ້າທີ່ອື່ນໆ ຕາມການມອບ ໝາຍ. ພ້ອມນັ້ນ, ກໍມີໜ້າທີ່ສ້າງນະໂຍບາຍ, ຍຸດທະສາດ ແລະ ແຜນການ, ແຜນງານ, ໂຄງການ ແລະ ປະສານງານສົມທົບຈັດຕັ້ງປະຕິບັດ ວຽກງານຕ້ານອາຊະຍາກາຂ້າມຊາດ ໃນພາກພື້ນອາຊຽນ.
ທ່ານກ່າວອີກວ່າ: ໃນປັດຈຸບັນ ສະພາບການກໍອາຊະຍາກໍາປະເພດຕ່າງໆ ເປັນຕົ້ນ ແມ່ນການກໍ່ການຮ້າຍ, ການຄ້າຢາເສບຕິດ, ການຄ້າມະນຸດ, ການຄ້າອາວຸດເສິກ, ອາຊະຍາກໍາທາງຄອມພິວເຕີ ແລະ ອື່ນໆ ໃນພາກພື້ນ ແລະ ໃນໂລກ ຍັງມີທ່າອ່ຽງເພີ່ມຂຶ້ນ, ມີຜົນກະທົບຢ່າງໃຫຍ່ຫຼວງຕໍ່ການດໍາລົງຊີວິດຂອງປະຊາຊົນ ກໍຄື ການພັດທະນາເສດຖະກິດ-ສັງຄົມ ຂອງບັນດາປະເທດໃນໂລກ. ຕໍ່ກັບສະພາບການດັ່ງກ່າວ ມີຄວາມຈໍາເປັນທີ່ສຸດ ທີ່ກົນ ໄກກອງປະຊຸມເຈົ້າໜ້າທີ່ອາວຸໂສອາຊຽນ ວ່າດ້ວຍການຕ້ານອາຊະຍາກໍາຂ້າມຊາດທີ່ຈະຕ້ອງໄດ້ມີການປະຊຸມປຶກສາຫາລືຊອກຫາວິທີປ້ອງກັນສະກັດກັ້ນອາຊະຍາກໍາຂ້າມຊາດ ຢ່າງເປັນປົກກະຕິ ແລະ ຕໍ່ເນື່ອງ.
ສະນັ້ນ, ໃນກອງປະຊຸມເຈົ້າໜ້າທີ່ອາວຸໂສອາຊຽນ ວ່າດ້ວຍອາຊະຍາກໍາຂ້າມຊາດ ຄັ້ງທີ 24 ແລະ ກອງປະຊຸມອື່ນໆທີ່ກ່ຽວ ຂ້ອງ, ເຊິ່ງຈະໄດ້ຈັດຂຶ້ນໃນລະ ຫວ່າງວັນທີ 26-28 ມິຖຸນາ 2024; ເຊິ່ງໃນກອງປະຊຸມສະເໜີໃຫ້ຄະນະຜູ້ ແທນພິຈາລະນາບາງບັນຫາ ເປັນຕົ້ນແມ່ນປຶກສາຫາລືແລກປ່ຽນທັດສະ ນະ ແລະ ປະເມີນສະພາບການ, ທ່າອ່ຽງຂອງບັນຫາອາຊະຍາກໍາຂ້າມຊາດໃນພາກພື້ນ ກໍຄື ໃນໂລກຢ່າງກົງໄປ-ກົງມາ, ຖືກຕ້ອງຕາມຄວາມເປັນຈິງ ເພື່ອເປັນບ່ອນອີງໃຫ້ແກ່ການຄົ້ນຄວ້າກໍານົດມາດຕະການທີ່ເໝາະສົມ ເພື່ອແກ້ໄຂບັນຫາດັ່ງກ່າວ; ແລກປ່ຽນບົດຮຽນອັນດີເຊິ່ງກັນແລະກັນ ໃນການແກ້ໄຂບັນຫາອາຊະຍາກໍາຂ້າມຊາດ ຢູ່ໃນແຕ່ລະປະເທດສະມາຊິກອາຊຽນ ໃນໄລຍະຜ່ານມາ; ຄົ້ນຄວ້າປັບປຸງບັນດາກົນໄກ ແລະ ເຄື່ອງມືຕ່າງໆ ທີ່ຢູ່ໃນຄວາມຮັບຜິດຊອບຂອງກອງປະຊຸມເຈົ້າໜ້າທີ່ອາວຸໂສອາຊຽນ ວ່າດ້ວຍອາຊະຍາກໍາຂ້າມຊາດ ໃຫ້ແທດເໝາະກັບສະພາບຕົວຈິງໃນປະຈຸບັນ; ຄົ້ນຄວ້າສ້າງຂໍ້ລິເລີ່ມໃໝ່ທີ່ຈໍາເປັນ ເພື່ອແກ້ໄຂບັນຫາອາຊະຍາກໍາຂ້າມຊາດເເເເເເທີ່ພົ້ນເດັ່ນໃນພາກພື້ນ ເປັນຕົ້ນບັນຫາຢາເສບຕິດ, ຄ້າມະນຸດ, ການກໍ່ການຮ້າຍ, ອາຊະຍາກໍາທາງຄອມພິວເຕີ, ການຄ້າອາວຸດ ແລະ ອື່ນໆ;
ເພີ່ມທະວີການຮ່ວມມືແລກປ່ຽນຂໍ້ມູນຂ່າວສານ ທີ່ພົວພັນເຖິງອາຊະຍາກໍາຂ້າມຊາດ ລະຫວ່າງບັນດາປະເທດສະມາຊິກອາຊຽນ ໃຫ້ວ່ອງໄວທັນກັບສະ ພາບການ; ເພີ່ມທະວີພັດທະນາຂີດຄວາມສາມາດ ຂອງເຈົ້າໜ້າທີ່ປະຕິບັດກົດໝາຍທີ່ກ່ຽວ ຂ້ອງຂອງປະເທດສະມາຊິກອາຊຽນ ເພື່ອຕ້ານອາຊະຍາກໍາຂ້າມຊາດ; ຍົກລະດັບການພົວພັນຮ່ວມມື, ຍາດແຍ່ງການຊ່ວຍເຫຼືອທາງດ້ານເຕັກນິກວິຊາການ ແລະ ທຶນຮອນ ເພື່ອຍົກລະດັບຂີດຄວາມສາມາດຂອງອາຊຽນ ໃນການຕ້ານອາຊະຍາກໍາຂ້າມຊາດ ຈາກບັນດາປະເທດຄູ່ຮ່ວມເຈລະຈາ ແລະ ອົງການຈັດຕັ້ງສາກົນທີ່ກ່ຽວຂ້ອງ.
