ກອງປະຊຸມດັ່ງກ່າວໄດ້ຈັດຂຶ້ນຢູ່ເຂດເສດຖະກິດພິເສດສາມລ່ຽມຄໍາ ເມືອງຕົ້ນເຜິ້ງ ແຂວງບໍ່ແກ້ວ ສາທານະລະລັດປະຊາ ທິປະໄຕ ປະຊາຊົນລາວ ໃນວັນທີ 25 ມິຖຸນາ 2024 ໂດຍການເປັນປະທານຂອງ ທ່ານ ພົນຕີ ຄໍາກິ່ງ ຜຸຍຫຼ້າມະນີວົງ ຮອງລັດຖະມົນຕີ ກະຊວງປ້ອງກັນຄວາມສະຫງົບ ມີທ່ານ ຮອງເຈົ້າແຂວງ ບໍ່ແກ້ວ ມີຕາງໜ້າຈາກ ຜູ້ຕາງໜ້າອົງການ UNODC ປະຈໍາ ສປປລາວ ມີຕາງໜ້າກະຊວງປ້ອງກັນປະເທດ, ກະຊວງການຕ່າງປະເທດ, ກະຊວງແຜນການແລະການລົງທຶນ, ຕ່າງໜ້າຈາກ ສະຖານທູດ 5 ປະທດ ປະຈໍາ ສປປ ລາວ ແລະ ບັນດາເຈົ້າໜ້າທີ່ຈາກປະເທດສະມາຊິກລຸ່ມແມ່ນໍ້າຂອງ ຈໍານວນ 6 ປະເທດ ຄື: ສປ ຈີນ, ມຽນມາ, ສປປ ລາວ, ໄທ, ກໍາປູເຈຍ ແລະ ສສ ຫວຽດນາມ ເຂົ້າຮ່ວມ
ທ່ານ ພົນຕີ ຄໍາກິ່ງ ຜຸຍຫຼ້າມະນີວົງ ຮອງລັດຖະມົນຕີ ກະຊວງປ້ອງກັນຄວາມສະຫງົບ ໄດ້ໃຫ້ຮູ້ວ່າ: ບັນຫາຢາເສບຕິດ ເປັນໄພອັນຕະລາຍ ຮ້າຍແຮງ ແລະ ມີການແຜ່ລະບາດເປັນວົງກວ້າງແຕ່ຕົວເມືອງໄປສູ່ຊົນນະບົດໃນຫຼາຍລະດັບທີ່ແຕກຕ່າງກັນ ກາຍເປັນສາເຫດພາໃຫ້ເກີດບັນຫາປະກົດການຍໍ້ທໍ້ ແລະ ອາຊະຍາກຳປະເພດຕ່າງໆໃນສັງຄົມ, ຈຳນວນຄະດີຢາເສບຕິດ ຜູ້ຖືກຫານັກໂທດ ຜູ້ຕິດເສບຢາເສບຕິດ ນຳໃຊ້ສານເສບຕິດ ລວມເຖິງຈຳນວນຕົວເລກຢາເສບຕິດ ແຕ່ລະປະເພດໄດ້ມີການເພີ່ມຂຶ້ນຢ່າງໜ້າເປັນຫວ່ງ. ພ້ອມດຽວກັນ, ເລ່ລ່ຽມການເຄື່ອນໄຫວຂົນສົ່ງຄ້າຂາຍ ຜະລິດຢາເສບຕິດ ມີລັກສະນະເລິກແລບແນບນຽນ ດ້ວຍຫຼາຍວິທີການ-ຫຼາຍຮູບການທີ່ສະລັບສັບຊ້ອນ ການເຄື່ອນໄຫວມີລັກສະນະເປັນກຸ່ມເຄືອຂ່າຍເຊື່ອມໂຍງທັງພາຍໃນ ແລະ ຕ່າງປະເທດ.
ສປປ ລາວ ກໍຄືບັນດາປະເທດລຸ່ມແມ່ນ້ຳຂອງພວກເຮົາໄດ້ຮັບຜົນກະທົບໂດຍກົງ ແລະ ປະເຊີນກັບໄພຂົ່ມຂູ່ຈາກບັນຫາຢາເສບຕິດ ຢ່າງຫຼີກລ່ຽງບໍ່ໄດ້. ປັດຈຸບັນ, ຢາເສບຕິດໄດ້ສົ່ງຜົນກະທົບຮ້າຍແຮງ ໃນທຸກເພດ-ທຸກໄວ ທຸກຊັ້ນຄົນໃນທົ່ວສັງຄົມ ນັບແຕ່ນັກຮຽນ-ນັກສຶກສາ ພໍ່ຄ້າຊາວຂາຍ ກຳມະກອນ ຜູ້ວ່າງງານ ຕະຫຼອດຮອດພະນັກງານ, ລັດຖະກອນຈຳນວນໜຶ່ງ, ເປັນສາເຫດພາໃຫ້ເກີດປະກົດການຫຍໍ້ທໍ້ ເປັນການກົດໜ່ວງຖ່ວງດຶງ ການພັດທະນາເສດຖະກິດ ວັດທະນະທຳ-ສັງຄົມ, ສົ່ງຜົນກະທົບຕໍ່ຄວາມໝັ້ນຄົງທາງດ້ານການເມືອງ ແລະ ຄວາມເປັນລະບຽບ ຮຽບຮ້ອຍ-ປອດໄພຂອງສັງຄົມ.
ຍາມໃດ, ລັດຖະບານ ກໍເຫັນຄວາມສຳຄັນ ແລະ ເອົາໃຈໃສ່ຢ່າງຈິງຈັງ. ຜ່ານມາ, ກໍໄດ້ມີການຮ່ວມມືກັບບັນດາປະເທດຕ່າງໆ; ເຊິ່ງສະແດງອອກ: (1) ການເຂົ້າຮ່ວມເປັນພາຄີສົນທິສັນຍາສາກົນ ວ່າດ້ວຍການສະກັດກັ້ນ ຕ້ານຢາເສບຕິດ ແລະ ສານອອກລິດຕໍ່ຈິດປະສາດ 3 ສະບັບ, (2) ລົງນາມບົດບັນທຶກການຮ່ວມມືສອງຝ່າຍ ວ່າດ້ວຍການສະກັດກັ້ນ ຕ້ານຢາເສບຕິດ ກັບ 13 ປະເທດ, (3) ລົງນາມໃນບົດບັນທຶກຄວາມເຂົ້າໃຈ ແບບສອງຝ່າຍ ກັບປະເທດໃກ້ຄຽງ-ຮ່ວມມືຫຼາຍຝ່າຍ, ພາກພື້ນອາຊຽນ, ພາກພື້ນແມ່ນໍ້າຂອງ, ການສ້າງ ແລະ ຮັບຮອງບັນດາກົດໝາຍ-ນິຕິກຳກ່ຽວກັບການຕ້ານຢາເສບຕິດອື່ນໆ.
ທ່ານກ່າວອີກວ່າ: ທັງໝົດທີ່ກ່າວມານັ້ນສະແດງເຖິງຄວາມເອົາໃຈໃສ່ໃນການແກ້ໄຂບັນຫາຢາເສບຕິດ ຂອງລັດຖະບານ ແລະ ໜ່ວຍງານທີ່ຮັບຜິດຊອບ. ສະນັ້ນ, ໃນເດືອນ ສິງຫາ 2021, ສະພາແຫ່ງຊາດ ໄດ້ເຫັນດີຮັບຮອງເອົາການແກ້ໄຂບັນຫາຢາເສບຕິດເປັນວຽກງານບູລິມະສິດຈຳເປັນຮີບດ່ວນ ແລະ ໄດ້ຍົກໃຫ້ເປັນວາລະແຫ່ງຊາດ ຕາມການສະເໜີ ຂອງລັດຖະ ບານ ແລະ ມອບໃຫ້ກະຊວງ ປກສ ນຳໄປປະສານສົມທົບກັບບັນດາອົງການຈັດຕັ້ງທີ່ກ່ຽວຂອ້ງ ເພື່ອຮ່ວມມື ແລະ ສຸມທຸກກຳລັງແຮງສັງລວມ ໂດຍໃຫ້ຖືເອົາການຈັດຕັ້ງປະຕິບັດວາລະແຫ່ງຊາດແກ້ໄຂບັນຫາຢາເສບຕິດ ເປັນພັນທະໜ້າທີ່ ແລະ ຄວາມຮັບຜິດ ຊອບຂອງທຸກພາກ ສ່ວນໃນສັງຄົມເຂົ້າໃສ່ການແກ້ໄຂບັນຫາສຳຄັນຂອງຊາດ ທີ່ໄດ້ສະສົມມາຫຼາຍປີໃຫ້ຫຼຸດລົງຢ່າງຈະແຈ້ງ ແລະ ເປັນຮູບປະທຳໂດຍໄວ.
ເພື່ອເປັນການຊຸກຍູ້ການຈັດຕັ້ງປະຕິບັດວາລະແຫ່ງຊາດ ວ່າດ້ວຍການແກ້ໄຂບັນຫາຢາເສບຕິດ 2021-2025, ແລະ ເພື່ອຜັນຂະຫຍາຍຜົນກອງປະຊຸມເຈົ້າໜ້າທີ່ອາວຸໂສ ຂອງບັນດາປະເທດພາຄີບົດບັນທຶກຄວາມເຂົ້າໃຈ ວ່າດ້ວຍການຮ່ວມມື ເພື່ອຄວບຄຸມຢາເສບຕິດ ໃນອານຸພາກພື້ນແມ່ນ້ຳຂອງ; ເຊິ່ງໄດ້ຈັດຂຶ້ນໃນວັນທີ 27-31 ພຶດສະພາ 2024, ທີ່ນະຄອນຫຼວງວຽງ ຈັນ, ສປປ ລາວ. ກະຊວງປ້ອງກັນຄວາມສະຫງົບ ຮ່ວມກັບຄະນະຮັບຜິດຊອບເຂດເສດຖະກິດພິເສດ, ເມືອງຕົ້ນເຜິ້ງ ແຂວງບໍ່ແກ້ວ ໄດ້ຈັດງານຊຸມນຸມຄັ້ງນີ້ຂຶ້ນ, ເຊິ່ງກົງກັບວັນສາກົນເພື່ອຄວບຄຸມຢາເສບຕິດ ວັນທີ 26 ມິຖຸນາ ທີ່ໝູນວຽນມາອີກວາລະໜຶ່ງ.
ເພື່ອແກ້ໄຂບັນຫາຢາເສບຕິດ, ກະຊວງ ປກສ ລາວ ໄດ້ພະຍາຍາມປຶກສາຫາລື ແລະ ຮ່ວມມືກັບ ຫຼາຍພາກສ່ວນ ທັງພາກລັດ ແລະ ເອກະຊົນ ເພື່ອຊຸກຍູ້ປະຕິບັດແຜນວາລະແຫ່ງຊາດ ແກ້ໄບັນຫາຢາເສບຕິດຢ່າງຈິງຈັງ ແນໃສ່ສົ່ງເສີມການຮ່ວມມື ແລະ ການມີສ່ວນຮ່ວມຂອງສັງຄົມ ຮັບປະກັນປະສິດທິພາບປະສິດທິຜົນການຈັດຕັ້ງປະຕິບັດໃນແຕ່ລະໄລຍະ. ກອງປະຊຸມຂອງບັນດາປະເທດອານຸພາກພື້ນແມ່ນ້ຳຂອງ ເປັນສິ່ງສຳຄັນ ແລະ ມີຄວາມຈໍາເປັນ ຕໍ່ການຮ່ວມມືການສະກັດກັ້ນ ແລະ ຕ້ານຢາເສບຕິດ ໃຫ້ມີປະສິດທິພາບ; ໄລຍະຜ່ານມາ, ກໍໄດ້ມີການສົ່ງເສີມ ຊຸກຍູ້ ການຮ່ວມມື ຜ່ານການແລກປ່ຽນສະໜອງຂໍ້ມູນຂ່າວສານ, ການຊ່ວຍເຫຼືອ ແລະ ການສົ່ງເສີມສ້າງຂີດຄວາມສາມາດ ຕ່າງໆ, ເຊິ່ງສະແດງເຖິງຄວາມເປັນຫ່ວງ ຄວາມເອົາໃຈໃສ່ ແລະ ການຊ່ວຍເຫຼືອໃນການແກ້ໄຂບັນຫາຢາເສບຕິດ ຢູ່ໃນພາກພື້ນ ໄດ້ຢ່າງມີປະສິດທິພາບ.
ເພື່ອສະກັດກັ້ນ ແລະ ແກ້ໄຂບັນຫາຢາເສບຕິດ ໃຫ້ຫຼຸດໜ້ອຍຖອຍລົງ ການຮ່ວມມືຂອງບັນດາປະເທດອະນຸພາກພື້ນແມ່ນ້ຳຂອງ ເປັນສີ່ງທີ່ຈຳເປັນ; ກອງປະຊຸມພົບປະໃນຄັ້ງນີ້, ເປັນການສ້າງໂອກາດນຳສະເໜີ ແລກປ່ຽນສະພາບ ປະສົບການ ແລະ ແນວຄວາມຄິດ ເພື່ອປະເມີນສະພາບການແກ້ໄຂສິ່ງທ້າທາຍໃນຕໍ່ໜ້າຮ່ວມກັນ ໃຫ້ມີໝາກມີຜົນ, ແນໃສ່ການສະກັດກັ້ນ ແລະ ແກ້ໄຂສະພາບບັນຫາຢາເສບຕິດ ທີ່ເປັນອຸປະສັກ ເປັນໄພອັນຕະລາຍຂົ່ມຂູ່ ແລະ ສົ່ງຜົນກະທົບຕໍ່ການພັດທະນາເສດຖະກິດ-ສັງຄົມ ໃຫ້ມີທ່າອ່ຽງທີ່ດີຂຶ້ນ ແລະ ສາມາດຈຳກັດການຂະຫຍາຍຕົວຂອງຢາເສບຕິດໃຫ້ມີລັກສະນະແຄບລົງ, ເຊິ່ງທັງໝົດນັ້ນ ປະເທດໜຶ່ງປະເທດດຽວແມ່ນບໍ່ສາມາດແກ້ໄຂໄດ້. ສະນັ້ນ, ມັນຮຽກຮ້ອງໃຫ້ມີການຮ່ວມມືກັນ ຊ່ວຍເຫຼືອກັນ ແມ່ນສິ່ງທີ່ຈໍາເປັນ ເພື່ອຮັກສາ ແລະ ສົ່ງເສີມການສ້າງສະຖຽນລະພາບທາງດ້ານການ ເມືອງ ຄວາມເປັນລະບຽບຮຽບ ຮ້ອຍ ແລະ ຮັກສາຄວາມໝັ້ນຄົງໃນສັງຄົມ.
ຈາກນັ້ນ, ບັນດາປະເທດ ທີ່ເຂົ້າຮ່ວມ ໄດ້ພັດປ່ຽນກັນຂື້ນປະກອບຄໍາເຫັນ ແລະ ລາຍງານສະພາບຢາຄ້າຂາຍຢາເສບຕິດຂອງແຕ່ລະປະເທດລຸ່ມແມ່ນໍາຂອງຕື່ມອີກ.
ພາບ-ຂ່າວ: ສີສະຫວ່າງ ຈັນມະນີ
