ໃນວັນທີ 22 ກັນຍາ 2022 ທີ່ກະຊວງ ປກສ, ທ່ານ ພົນເອກ ວິໄລ ຫຼ້າຄຳຟອງ ຮອງນາຍົກລັດຖະມົນຕີ, ລັດຖະມົນຕີ ກະຊວງ ປກສ ແຫ່ງ ສປປ ລາວ ຮັບຜິດຊອບວຽກງານຕ້ານອາຊະຍາກຳຂ້າມຊາດ ພ້ອມດ້ວຍຄະນະ ໄດ້ເຂົ້າຮ່ວມກອງປະຊຸມປຶກສາຫາລືລັດຖະມົນຕີອາຊຽນ ບວກປະເທດຄູ່ຮ່ວມເຈລະຈາ ວ່າດ້ວຍ ການຕ້ານອາຊະຍາກໍາຂ້າມຊາດ ແບບທາງໄກ.
ເຊິ່ງກອງປະຊຸມທັງໝົດມີ 4 ກອງປະຊຸມ ຄື:
ກອງປະຊຸມປຶກສາຫາລືລັດຖະມົນຕີອາຊຽນ ບວກສາມ ວ່າດ້ວຍ ການຕ້ານອາຊະຍາກໍາຂ້າມຊາດ ຄັ້ງທີ 12 ພາຍໃຕ້ການເປັນປະທານຂອງ ທ່ານ ສົມເດັດ ກາລາໂຫມ ຊໍເຄັງ ຮອງນາຍົກລັດຖະມົນຕີ, ລັດຖະມົນຕີ ກະຊວງພາຍໃນ ແຫ່ງ ຣາຊະອານາຈັກ ກຳປູເຈຍ.
ກອງປະຊຸມປຶກສາຫາລືລັດຖະມົນຕີອາຊຽນ ບວກ ສປ ຈີນ ວ່າດ້ວຍ ການຕ້ານອາຊະຍາກໍາຂ້າມຊາດ ຄັ້ງທີ 9 ພາຍໃຕ້ການເປັນປະທານຮ່ວມຂອງ ທ່ານ ພົນຕີ ຊິນມິນ ແທັດ ຮອງລັດຖະມົນຕີ ແລະ ຫົວໜ້າກອງບັນຊາການຕຳຫຼວດ ມຽນມາ ແລະ ທ່ານ ວັງສຽວຫົງ ລັດຖະມົນຕີ ກະຊວງປ້ອງກັນຄວາມສະຫງົບ ແຫ່ງ ສປ ຈີນ.
ກອງປະຊຸມປຶກສາຫາລືລັດຖະມົນຕີອາຊຽນ ບວກຍີ່ປຸ່ນ ວ່າດ້ວຍ ການຕ້ານອາຊະຍາກໍາຂ້າມຊາດ ຄັ້ງທີ 7 ພາຍໃຕ້ການເປັນທານຂອງ ພະນະທ່ານ ພົນເອກ ໄຊຊານ ຊ້າງມຸງຄຸນ ຮອງລັດຖະມົນຕີ ກະຊວງປ້ອງກັນປະເທດ ແລະ ທ່ານ ຕານີ ໂກຍຈິ ປະທານຄະນະກຳມະການຄວາມປອດໄພຕຳຫຼວດແຫ່ງຊາດຍີ່ປຸ່ນ.
ກອງປະຊຸມປຶກສາຫາລືລັດຖະມົນຕີອາຊຽນ ບວກ ສ ເກົາຫຼີ ວ່າດ້ວຍ ການຕ້ານອາຊະຍາກໍາຂ້າມຊາດ ຄັ້ງທີ 3 ພາຍໃຕ້ການເປັນປະທານຂອງ ທ່ານ ພົນຈັດຕະວາ ຫງວຽນ ມິງ ຫຽວ ຮອງຫົວໜ້າກົມພົວພັນຕ່າງປະເທດ ກະຊວງປ້ອງກັນຄວາມສະຫງົບ ແຫ່ງ ສສ ຫວຽດນາມ ແລະ ຕາງໜ້າຫົວໜ້າຄະນະຜູ້ແທນ ສ ເກົາຫຼີ.
ພ້ອມດຽວກັນນີ້, ກໍມີຄະນະຜູ້ແທນຈາກ 10 ປະເທດສະມາຊິກອາຊຽນ ເຂົ້າຮ່ວມກອງປະຊຸມດັ່ງກ່າວ. ທັງ 4 ກອງປະຊຸມປຶກສາຫາລືລັດຖະມົນຕີອາຊຽນ ບວກປະເທດຄູ່ຮ່ວມເຈລະຈາ ວ່າດ້ວຍ ການຕ້ານອາຊະຍາກໍາຂ້າມຊາດ ແບບທາງໄກ ແມ່ນກົນໄກການຮ່ວມມືລະຫວ່າງປະເທດສະມາຊິກອາຊຽນ ແລະ ປະເທດຄູ່ຮ່ວມເຈລະຈາ ( ສປ ຈີນ, ຍີ່ປຸ່ນ ແລະ ສ ເກົາຫຼີ ) ໃນການຕ້ານອາຊະຍາກໍາຂ້າມຊາດ ໂດຍສະເພາະແມ່ນ ການກໍ່ການຮ້າຍ, ການຄ້າມະນຸດ, ອາຊະຍາກໍາທາງຄອມພິວເຕີ, ການຄ້າຢາເສບຕິດ, ການລັກລອບນຳຄົນເຂົ້າ-ອອກເມືອງຜິດກົດໝາຍ, ການຟອກເງິນ, ການຄ້າອາວຸດເສິກ ແລະອື່ນໆ.
ກອງປະຊຸມ ໄດ້ຮັບຟັງລາຍງານຄວາມຄືບໜ້າໃນການຈັດຕັ້ງປະຕິບັດບັນດາໂຄງການ-ກິດຈະກຳພາຍໃຕ້ຂອບແຜນວຽກການຮ່ວມມືຂອງແຕ່ລະກອງປະຊຸມປຶກສາຫາລື ແລະ ປຶກສາຫາລືທົບທວນຄືນຂໍ້ສະດວກ-ຂໍ້ຫຍຸ້ງຍາກ ໃນການຮ່ວມມືແກ້ໄຂບັນຫາອາຊະຍາກໍາຂ້າມຊາດ ໃນໄລຍະຜ່ານມາ, ພ້ອມທັງສະເໜີທິດທາງໃນການຍົກລະດັບການຮ່ວມມືໃຫ້ດີຂຶ້ນກວ່າເກົ່າ ເພື່ອໃຫ້ສອດຄ່ອງກັບຄວາມຮຽກຮ້ອງຕ້ອງການຂອງບັນດາອົງການປະຕິບັດກົດໝາຍຂອງ ປະເທດສະມາຊິກອາຊຽນ ແລະ ກຽມພ້ອມສໍາລັບການຮັບມືກັບສິ່ງທ້າທາຍ ທັງຮູບແບບເກົ່າ ແລະ ໃໝ່.
ປະເທດສະມາຊິກອາຊຽນ ຕີລາຄາສູງຕໍ່ການຮ່ວມມືກັບບັນດາປະເທດຄູ່ຮ່ວມເຈລະຈາ ຍ້ອນທັງສາມລ້ວນແຕ່ມີຄວາມເຂັ້ມແຂງທາງດ້ານເສດຖະກິດ, ມີວິຊາການທີ່ແນ່ນອນ, ມີວິທະຍາສາດເຕັກໂນໂລຊີທີ່ທັນສະໄໝ ເຊິ່ງຈະເປັນເງື່ອນໄຂອັນດີໃຫ້ແກ່ການຮ່ວມມືກັບບັນດາປະເທດສະມາຊິກອາຊຽນ ໃນການແກ້ໄຂບັນຫາອາຊະຍາກໍາຂ້າມຊາດໃນພາກພື້ນ ແລະ ສາກົນ ໂດຍສະເພາະແມ່ນການພັດທະນາຂີດຄວາມສາມາດໃຫ້ແກ່ເຈົ້າໜ້າທີ່ປະຕິບັດກົດໝາຍ, ແລກປ່ຽນຂໍ້ມູນຂ່າວສານທີ່ພົວພັນເຖິງອາຊະຍາກຳໃຫ້ວ່ອງໄວ ແລະ ທັນກັບສະພາບການ ເພື່ອສ້າງບ່ອນອີງສຳລັບປູພື້ນຖານໃຫ້ແກ່ການຈັດຕັ້ງປະຕິບັດວຽກງານການຮ່ວມມືລະຫວ່າງອາຊຽນ ແລະ ປະເທດຄູ່ຮ່ວມເຈລະຈາ ໃຫ້ເປັນຮູບປະທໍາໃນແຕ່ລະໄລຍະ, ທັງ 4 ກອງປະຊຸມ ໄດ້ເປັນເອກະພາບຮັບຮອງເອົາຖະແຫຼງການຮ່ວມຂອງແຕ່ລະກອງປະຊຸມ.
ທັງ 4 ກອງປະຊຸມປຶກສາຫາລືລັດຖະມົນຕີອາຊຽນ ບວກປະເທດຄູ່ຮ່ວມເຈລະຈາ ວ່າດ້ວຍ ການຕ້ານອາຊະຍາກໍາຂ້າມຊາດ ແບບທາງໄກ ດໍາເນີນໄປດ້ວຍຜົນສໍາເລັດຕາມລະດັບຄາດໝາຍທີ່ກຳນົດໄວ້ ແລະ ເຕັມໄປດ້ວຍບັນຍາກາດແຫ່ງຄວາມສາມັກຄີ ແລະ ປອງດອງກັນແບບອາຊຽນ.
ຄະນະຜູ້ແທນແຕ່ລະປະເທດສະມາຊິກອາຊຽນ ລ້ວນແຕ່ຫ້າວຫັນໃນການແລກປ່ຽນທັດສະນະໃນການຮ່ວມມືແກ້ໄຂບັນຫາອາຊະຍາກໍາຂ້າມຊາດ.
