ກອງປະຊຸມຮັບສ່ອງແສງວຽກພັກ-ວຽກງານການເມືອງ ປະຈໍາໄຕມາດ III ປີ 2024 ກອງບັນຊາການ ປກສ ເຂດ 3 ໄດ້ຈັດຂຶ້ນທີ່ກອງບັນຊາການ ປກສ ແຂວງບໍລິຄໍາໄຊ ໃນວັນທີ 18 ພະຈິກ 202, ເປັນປະທານໂດຍ ສະຫາຍ ພົທ ກົງທອງ ພົງວິຈິດ ກໍາມະການສູນກາງພັກ ຮອງເລຂາຄະນະພັກກະຊວງ ຮອງລັດຖະມົນຕີກະຊວງ ປກສ , ມີ ສະຫາຍ ພົຈວ ຄອນສະຫັວນ ສົມພາໄຊ ຄະນະພັກກະຊວງ ຮອງເລຂາພັກ ຮອງຫົວໜ້າກົມໃຫ່ຍການເມືອງ, ມີຄະນະພັກ, ຄະນະກອງບັນຊາການ ປກສ ແຂວງບໍລິຄໍາໄຊ, ປກສ ແຂວງຫົວພັນ, ປກສ ແຂວງຊຽງຂວາງ, ປກສ ແຂວງໄຊສົມບູນ, ປກສ ແຂວງຄໍາມ່ວນ ແລະ ເລຂາຄະນະພັກຮາກຖານ ຈາກບັນດາຫ້ອງ, ກອງພັນ, ຄ້າຍຄຸມຂັງ-ດັດສ້າງ, ໂຮງຮຽນ, ປກສ ເມືອງ ອ້ອມຂ້າງ ປກສ ແຂວງບໍລິຄໍາໄຊ ເຂົ້າຮ່ວມ.
ສະຫາຍ ພັອ ເຄນວອນ ລໍວັນໄຊ ຄະນະພັກ ຮອງຫົວໜ້າກອງບັນຊາການ ປກສ ແຂວງບໍລິຄໍາໄຊ ໄດ້ຜ່ານບົດລາຍງານການນໍາພາ-ຊີ້ນໍາວຽກງານຮອບດ້ານ ໃນໄລຍະ 3 ເດືອນຜ່ານມາຂອງ ຄະນະພັກ ກອງບັນຊາການ ປກສ ແຂວງບໍລິຄຳໄຊ ໄດ້ເປັນເຈົ້າການໃນການນຳພາເຊື່ອມຊຶມ, ກຳແໜ້ນແນວທາງ, ມະຕິຂອງຂັ້ນເທິງ ເປັນປົກກະຕິ ແລະ ກຽມພ້ອມຕອບຕ້ານທຸກກົນອຸບາຍຂອງພວກກຸ່ມຄົນບໍ່ດີ, ໄດ້ສຳເລັດການເປີດບັ້ນດໍາເນີນຊີວິດການເມືອງ ກວດກາໜ່ວຍພັກປອດໃສ ເຂັ້ມແຂງ ໜັກແໜ້ນ ຈຳ ນວນ 41 ໜ່ວຍພັກ, ໃນນີ້ຈັດປະເພດໜ່ວຍພັກແຂງ 24 ໜ່ວຍ, ໜ່ວຍພັກກາງ 12 ໜ່ວຍ, ໜ່ວຍພັກອ່ອນ 5 ໜ່ວຍ, ຈັດປະເພດສະມາ ຊິກພັກແຂງ 736 ສະຫາຍ ຍິງ 168 ສະຫາຍ, ຈັດປະເພດກາງ 3 ສະຫາຍ, ປະເພດອ່ອນ 19 ສະຫາຍ ຍິງ 4 ສະຫາຍ, ຂະຫຍາຍມະຫາ ຊົນກ້າວໜ້າ ເຂົ້າພັກສຳຮອງ ໄດ້ 7 ສະຫາຍ ຍິງ 2 ສະຫາຍ, ເລື່ອນສະມາຊິກສໍາຮອງຂຶ້ນສົມບູນ 7 ສະຫາຍ ຍິງ 4 ສະຫາຍ, ສໍາເລັດການເປີດກອງປະຊຸມໃຫ່ຍຂັ້ນຮາກຖານພັກ 7 ຮາກຖານ, 3 ໜ່ວຍພັກຮາກຖານ ແລະ 7 ຮາກ ຖານພັກ ປກສ ເມືອງ, ປັດຈຸບັນ, ກະກຽມກອງປະຊຸມໃຫຍ່ ຄັ້ງທີ IV ຂອງຄະນະພັກກອງບັນຊາການ ປກສ ແຂວງ, ເກັບກໍາຂໍ້ມູນ, ວິເຄາະວິໄຈແຫຼ່ງຂ່າວຕ່າງໆ, ເກັບກຳສະພາບການເຄື່ອນໄຫວຂອງກຸ່ມຄົນບໍ່ຫວັງດີ ທີ່ຈະກໍ່ຄວາມບໍ່ສະຫງົບຢ່າງເຂັ້ມງວດ ເຮັດໃຫ້ແຂວງບໍລິຄຳໄຊ ມີຄວາມສະຫງົບທາງດ້ານການເມືອງຢ່າງໜັກແໜ້ນ, ສຸມໃສ່ແກ້ໄຂປະກົດການຫຍໍ້ທໍ້ຕ່າງໆທີ່ເກີດຂຶ້ນໃນສັງຄົມ ໃຫ້ຫຼຸດໜ້ອຍຖອຍລົງ, ໃນໄລຍະ 3 ເດືອນຜ່ານມາ, ທົ່ວແຂວງບໍລິຄຳໄຊ ມີຄະດີເກີດຂຶ້ນມີ 112 ເລື່ອງ, ຢຶດຂອງກາງຢາບ້າ 7.472 ເມັດ, ເຮໂຣອິນ 37,5 ກິໂລກຼາມ, ຢາໄອສ໌ 1.559 ກິໂລກຼາມ, ກັນຊາ 1.003 ກິໂລກຼາມ, ຢາອີ 61 ກິ ໂລກຼາມ, ໃບກະທ່ອມ 3 ກິໂລກຼາມ, 43 ຊຸດ, 522 ໃບ ແລະ ນໍ້າກະທ່ອມ 70 ຕຸກ ຢາສູບໄຟຟ້າ 149 ອັນ, ລົດໃຫຍ່ 8 ຄັນ, ລົດຈັກ 2 ຄັນ ແລະ ວຽກງານອື່ນໆ ກໍມີຜົນສຳເລັດຕາມຄາດໝາຍ.
ຈາກນັ້ນ, ບັນດາຄະນະພັກ-ຄະນະກອງບັນຊາການ ປກສ ແຂວງຫົວພັນ, ຊຽງຂວາງ, ໄຊສົມບູນ, ຄໍາມ່ວນ ໄດ້ຜັດປ່ຽນກັນຂຶ້ນລາຍງານສະພາບການເຄື່ອນໄຫວນໍາພາ-ຊີ້ນາວຽກງານຮອບດ້ານທີ່ມີທັງຂໍ້ສະດວກ, ຂໍ້ຫຍຸ້ງຍາກ ໃນການຈັດຕັ້ງປະຕິບັດ ແລະ ສະເໜີຕໍ່ຂັ້ນເທິງ ຄົ້ນຄວ້າປັບປຸງແກ້ໄຂ ເພື່ອຄວາມເປັນເອກະພາບກັນ ນໍາໄປຈັດຕັ້ງປະຕິບັດໃຫ້ໄດ້ຮັບຜົນສໍາເລັດ ພ້ອມທັງຕອບຄໍາຖາມເຈາະຈີ້ມຕໍ່ປະທານກອງປະຊຸມ.
ໂອກາດດຽວກັນ, ສະຫາຍ ພົຈວ ຄອນສະຫັວນ ສົມພະໄຊ ຄະນະພັກກະຊວງ ຮອງເລຂາພັກກົມ ຮອງຫົວໜ້າກົມໃຫ່ຍການເມືອງ ກໍໄດ້ຂຶ້ນປະກອບຄໍາຄິດຄໍາເຫັນ, ແກ້ຂໍ້ຂ້ອງໃຈຕໍ່ຄໍາສະເໜີຕ່າງໆຢ່າງກົງໄປກົງມາ ເພື່ອນຳເອົາບັນດາຈຸດອ່ອນ, ຂໍ້ຄົງຄ້າງ ນຳໄປປັບປຸງແກ້ໄຂໃນຕໍ່ໜ້າໃຫ້ດີຂຶ້ນ.
ສະຫາຍ ພົທ ກົງທອງ ພົງວິຈິດ ໄດ້ຊີ້ນໍາຕໍ່ຄະນະພັກ, ຄະນະບັນຊາທຸກຂັ້ນ ຈົ່ງເພີ່ມທະວີເຮັດວຽກງານການເມືອງ-ແນວຄິດ ໃຫ້ນາຍ ແລະ ພົນຕໍາຫຼວດ ຢ່າງເປັນປົກກະຕິຕໍ່ເນື່ອງ, ເປັນເຈົ້າການເຮັດໜ້າທີ່ວຽກງານການເມືອງ ກໍຄື ວຽກງານປ້ອງກັນຄວາມສະຫງົບ ໃນສະພາບການໃໝ່ ໃຫ້ມີປະສິດທິພາບ, ສຸມໃສ່ສະກັດກັ້ນ ແລະ ແກ້ໄຂປະກົດການຫຍໍ້ທໍ້ໃນສັງຄົມ ໃຫ້ຫຼຸດໜ້ອຍຖອຍລົງເປັນກ້າວໆ, ເອົາໃຈໃສ່ປັບປຸງແບບແຜນນໍາພາ-ວິທີເຮັດວຽກ ໃຫ້ມີວິທະຍາສາດ ແລະ ທັນສະໄໝ, ສະກັດກັ້ນ ແລະ ແກ້ໄຂປະກົດການຫຍໍ້ທໍ້ໃນກໍາລັງໃຫ້ໝົດໄປເປັນກ້າວໆ, ປັບປຸງກໍ່ສ້າງກໍາລັງໃຫ້ມີຄວາມປອດໃສ ເຂັ້ມແຂງ ໜັກແໜ້ນ, ມີຈັນຍາບັນ, ຈັນຍາທໍາ, ມີຄວາມຊື່ສັດບໍລິສຸດ, ມີຄຸນທາດການເມືອງໜັກແໜ້ນ, ມີຄວາມຊໍານິຊໍານານທາງດ້ານວິຊາສະເພາະ, ມີລະບຽບວິໄນເຂັ້ມງວດ ເພື່ອຮັບໃຊ້ຊາດ, ຮັບໃຊ້ປະຊາຊົນ ຢ່າງສຸດໃຈ.
