ກອງປະຊຸມສະຫຼຸບການຈັດຕັ້ງເຄື່ອນໄຫວວຽກແມ່ ແລະ ເດັກ ກະຊວງປ້ອງກັນຄວາມສະຫງົບ ປະຈຳປີ 2023 ແລະ ທິດ ທາງແຜນການປີ 2024 ໄດ້ຈັດຂຶ້ນ ໃນວັນທີ 5 ມິຖຸນາ 2024, ໂດຍການເປັນປະທານຂອງ ພົຕ ປອ ສຸວັນນີ ສີສຸພາບມີໄຊ ຫົວໜ້າກົມໃຫຍ່ການເມືອງປ້ອງກັນຄວາມສະຫງົບ ປະທານຄະນະກຳມາທິການ ເພື່ອຄວາມກ້າວໜ້າຂອງແມ່ຍິງ ແລະ ແມ່-ເດັກ ກະຊວງ ປກສ, ມີບັນດາຄະນະພັກ-ຄະນະບັນຊາ, ຄະນະກຳມາທິການ ເພື່ອຄວາມກ້າວໜ້າຂອງແມ່ຍິງ ແລະ ແມ່-ເດັກ ກະຊວງ ປກສ, ຄະນະຮັບຜິດຊອບ, ຫ້ອງ, ວິທະຍາຄານ ແລະ ກົມກອງອ້ອມຂ້າງ ກະຊວງ ປກສ ເຂົ້າຮ່ວມ.
ໃນກອງປະຊຸມ, ພົຈວ ສີວັນທາ ເພຍສະຂາ ຮອງຫົວໜ້າຫ້ອງວ່າການ ກະຊວງ ປກສ ຮອງປະທານຄະນະກຳມາທິການ ເພື່ອຄວາມກ້າວໜ້າຂອງແມ່ຍິງ ແລະ ແມ່-ເດັກ ກະຊວງ ປກສ ໄດ້ກ່າວວ່າ: ໃນໄລຍະ 1 ປີຜ່ານມາ, ກະຊວງ ປກສ ໄດ້ຖືເອົາວຽກແມ່ ແລະ ເດັກ ເປັນໜ້າທີ່ສຳຄັນ ເຊິ່ງໄດ້ເອົາໃຈໃສ່ຢ່າງໃກ້ສິດຕິດແທດໃນການຈັດຕັ້ງປະຕິບັດວຽກງານດັ່ງກ່າວຕະຫຼອດມາ, ກະຊວງ ປກສ ໄດ້ປະກອບເປັນ ຄະນະກຳມາທິການແຫ່ງຊາດ ເພື່ອຄວາມກ້າວໜ້າຂອງແມ່ຍິງ, ແມ່ ແລະ ເດັກ, ພ້ອມທັງສ້າງຕັ້ງ ຄະນະກຳມະການ ເພື່ອຄວາມກ້າວໜ້າແມ່ຍິງ ແລະ ແມ່-ເດັກ ຂັ້ນກະຊວງ, ກົມໃຫຍ່, ກົມກອງ ແລະ ວິທະຍາຄານ ທີ່ຂຶ້ນກັບ ກະຊວງ ປກສ 87 ທ່ານ ຍິງ 28 ທ່ານ ຕາມພາລະບົດບາດ, ສິດ ແລະ ໜ້າທີ່ຂອງຕົນ.
ພ້ອມທັງໄດ້ຈັດຕັ້ງຜັນຂະຫຍາຍແຜນດຳເນີນງານແຫ່ງຊາດ ເພື່ອແມ່ ແລະ ເດັກ 5 ປີ ຄັ້ງທີ III (2021-2025) ຫັນມາເປັນ ແຜນດຳເນີນງານວຽກແມ່ ແລະ ເດັກ ກະຊວງ ປກສ ໄລຍະ 3 ປີ (2023-2025) ສຳເລັດ ແລະ ຈັດພິມປຶ້ມ ຈຳນວນ 424 ຫົວ ເພື່ອແຈກຍາຍໃຫ້ບັນດາຄະນະກຳມາທິການ ກະຊວງ ປກສ ເພື່ອເປັນບ່ອນອີງໃນການຈັດຕັ້ງປະຕິບັດວຽກງານດັ່ງກ່າວ.
ນອກນີ້, ໄດ້ຈັດຕັ້ງເຄື່ອນໄຫວວຽກງານປົກປ້ອງ ແລະ ຊ່ວຍເຫຼືອເດັກ ທີ່ຖືກເຄາະຮ້າຍຈາກການໃຊ້ຄວາມຮຸນແຮງ ຕາມພາລະບົດບາດ ເຊິ່ງໄດ້ສ້າງຕັ້ງຄະນະຮັບຜິດຊອບປະສານວຽກແມ່ ແລະ ເດັກ ຂັ້ນກະຊວງ ເຊິ່ງປະກອບມີ 18 ທ່ານ ຍິງ 3 ທ່ານ, ມີຮອງຫົວໜ້າຫ້ອງວ່າການ ເປັນປະທານ, ຫົວໜ້າກົມນິຕິກຳ ແລະ ກົດໝາຍ ເປັນຮອງ, ຫົວໜ້າກົມຄຸມຂັງ-ດັດສ້າງ ເປັນຮອງ ແລະ ມີບັນດາຮອງຫົວໜ້າກົມ, ຮອງຫົວໜ້າຫ້ອງການ ແລະ ວິຊາການທີ່ກ່ຽວຂ້ອງຈຳນວນໜຶ່ງ, ເຊິ່ງເຮັດໜ້າທີ່ເປັນຈຸດປະສານງານ, ສະໜອງຂໍ້ມູນ ໃຫ້ວຽກແມ່ ແລະ ເດັກ.
ພ້ອມນັ້ນ, ໄດ້ສໍາເລັດການຈັດຕັ້ງປະຕິບັດຕາມເປົ້າໝາຍ, ແຜນວຽກຈຸດສຸມທີ່ໄດ້ກຳນົດໄວ້ ໃນແຜນດຳເນີນງານວຽກແມ່ ແລະ ເດັກ ກະຊວງ ປກສ ເປັນຕົ້ນແມ່ນແຜນງານສົ່ງເສີມ, ປົກປ້ອງ ແລະ ສ້າງໂອກາດທີ່ເທົ່າທຽມໃຫ້ແກ່ເດັກ ແລະ ເສີມຂະຫຍາຍຄວາມເປັນຢູ່ທີ່ດີຂອງເດັກ, ແຜນງານການໂຄສະນາເຜີຍແຜ່, ປູກຈິດສຳນຶກສ້າງຂໍ້ມູນ ແລະ ສຶກສາຄົ້ນຄວ້າ, ແຜນງານທົບທວນນະໂຍບາຍ-ນິຕິກຳພາຍໃນ, ການຈັດຕັ້ງປະຕິບັດພັນທະຕໍ່ສາກົນ ແລະ ພາກພື້ນ, ແຜນງານສ້າງຄວາມເຂັ້ມແຂງໃຫ້ກົງຈັກການຈັດຕັ້ງ ແລະ ບຸກຄະລາກອນ ທີ່ເຮັດວຽກສິດທິເດັກ.
ໃນຕໍ່ໜ້າ, ຄະນະກຳມາທິການ ເພື່ອຄວາມກ້າວໜ້າຂອງແມ່ຍິງ ແລະ ແມ່-ເດັກ ກະຊວງ ປກສ ຈະສືບຕໍ່ຈັດຕັ້ງຜັນຂະຫຍາຍນະໂຍບາຍຂອງພັກ-ລັດ ກໍຄື ແຜນດຳເນີນງານແຫ່ງຊາດ ເພື່ອແມ່ ແລະ ເດັກ 5 ປີ ຄັ້ງທີ III (2021-2025) ເຊື່ອມເຂົ້າແຜນການຈັດຕັ້ງປະຕິບັດ ໃນຂະແໜງປ້ອງກັນຄວາມສະຫງົບ ໃຫ້ປະກົດຜົນເປັນຈິງ.
ສືບຕໍ່ຈັດຕັ້ງປະຕິບັດແຜນດໍາເນີນງານວຽກແມ່ ແລະ ເດັກ ກະຊວງ ປກສ ໄລຍະ 3 ປີ (2023-2025) ໃຫ້ໄດ້ຮັບຜົນສໍາເລັດຕາມເປົ້າໝາຍ ແລະ ແຜນວຽກຈຸດສຸມທີ່ໄດ້ກຳນົດໄວ້; ໃຫ້ການຊ່ວຍເຫຼືອ, ປົກປ້ອງ, ຟື້ນຟູແມ່ ແລະ ເດັກທີ່ຖືກເຄາະຮ້າຍຈາກການໃຊ້ຄວາມຮຸນແຮງ, ຄ້າມະນຸດ, ຢາເສບຕິດ, ອຸບັດຕິເຫດໃນທ້ອງຖະໜົນ ແລະ ການສົ່ງຕໍ່ຜູ້ຖືກເຄາະຮ້າຍໃຫ້ເຂົ້າເຖິງຂະບວນຍຸຕິທໍາ ເພື່ອປົກປ້ອງສິດ ແລະ ຜົນປະໂຫຍດສູງສຸດຂອງແມ່ ແລະ ເດັກ; ສົ່ງເສີມສຸຂະພາບຂອງແມ່ ແລະ ເດັກ ໃຫ້ເຂົ້າເຖິງໂພສະນາການ, ການໃຫ້ບໍລິການໃນການປິ່ນປົວດູແລສຸຂະພາບຂອງແມ່ ແລະ ເດັກ ເພື່ອຫຼຸດຜ່ອນອັດຕາການຕາຍຂອງແມ່ ແລະ ເດັກທີ່ມີອາຍຸຕໍ່າກວ່າ 5 ປີ.່
(ຂ່າວ: ບຸນພະຈັນ)
