ໃນຕອນເຊົ້າວັນທີ 16 ພຶດສະພາ 2024, ຢູ່ທີ່ຫ້ອງປະຊຸມກອງບັນຊາການ ປກສ ແຂວງຈຳປາສັກ ໄດ້ເປີດກອງປະຊຸມຮັບສ່ອງແສງວຽກງານພັກ-ວຽກງານການເມືອງ ປະຈຳໄຕມາດ l ປີ2024 ຢູ່ກອງບັນຊາການ ປກສ ແຂວງ 5 ແຂວງພາກໃຕ້ ໂດຍການເປັນປະທານ ຂອງສະຫາຍ ພົຕ ປອ ສຸວັນນີ ສີສຸພາບມີໄຊ ຄະນະປະຈຳພັກກະຊວງ, ຫົວໜ້າກົມໃຫຍ່ການເມືອງ, ມີຄະນະພັກກອງບັນຊາການ5 ແຂວງຄື: ສະຫວັນນະເຂດ, ຈຳປາສັກ, ສາລະວັນ, ເຊກອງ ແລະ ອັດຕະປື, ມີຄະນະກົມທີ່ກ່ຽວຂ້ອງ, ມີຄະນະພັກຮາກຖານຫ້ອງ, ກອງບັນຊາການ ປກສ ເມືອງ, ປກສ ນະຄອນ ແລະ ກຳລັງວິຊາສະເພາະເຂົ້າຮ່ວມ.
ໂອກາດນີ້ ສະຫາຍ ພົຕ ປອ ສຸວັນນີ ສີສຸພາບມີໄຊ ຄະນະປະຈຳພັກກະຊວງ, ຫົວໜ້າກົມໃຫຍ່ການເມືອງໄດ້ໃຫ້ກຽດກ່າວເປີດກອງປະຊຸມ ແລະ ມີຄໍາເຫັນວ່າ: ການເປີດກອງປະຊຸມຮັບສ່ອງແສງວຽກງານພັກ-ວຽກງານການເມືອງ ປະຈຳໄຕມາດ l ປີ 2024 ຄັ້ງນີ້ກໍ່ເພື່ອເປັນການສະຫຼຸບຕີລາຄາຄືນວຽກງານພັກ-ວຽກງານການເມືອງ ແລະ ການກໍານົດທິດທາງຄາດໝາຍໃນຕໍ່ໜ້າໃຫ້ແທດເໝາະກັບການຜັນແປຂອງສະພາບການຕົວຈິງ ແລະ ພ້ອມກັນແກ້ໄຂບັນຫາທີ່ຄົງຄ້າງໃຫ້ສຳເລັດຜົນ.
ກອງປະຊຸມຄັ້ງນີ້, ຄະນະພັກກອງບັນຊາການ 5 ແຂວງ ໄດ້ຜັດປ່ຽນກັນລາຍງານຄືນການເຄື່ອນໄຫວຊີ້ນຳໆພາ ເປັນຕົ້ນແມ່ນການນໍາພາ-ຊີ້ນໍາຂອງຄະນະພັກແຕ່ລະຂັ້ນຕໍ່ວຽກງານພັກ-ວຽກງານການເມືອງ ໃນໄລຍະ ຜ່ານມາ ເຊິ່ງໄດ້ເອົາໃຈໃສ່ສຶກສາອົບຮົມການເມືອງ-ແນວຄິດໃຫ້ແກ່ກຳລັງຢ່າງເປັນປົກກະຕິ, ຊີ້ນຳໃຫ້ກຳລັງວິຊາສະເພາະແຕ່ລະພາກສ່ວນປະຕິບັດໜ້າທີ່ການເມືອງຂອງຕົນຢ່າງຫ້າວຫັນ, ສຸມໃສ່ເຮັດວຽກງານການກໍ່ສ້າງພັກ-ພະນັກງານ ແລະ ປັບປຸງກໍ່ສ້າງກໍາລັງ ໃຫ້ມີຄວາມປອດໃສ, ເຂັ້ມແຂງ, ໜັກແໜ້ນ ເປັນຕົ້ນແມ່ນຄວາມ ເຂັ້ມແຂງດ້ານລະບຽບວິໄນ ແລະ ຈັນຍາບັນ, ຈັນຍາທຳ ໃນການປະຕິບັດໜ້າທີ່ ຂອງນາຍ ແລະ ພົນ ຕຳຫຼວດ; ຮັບປະກັນສະຖຽນລະພາບທາງດ້ານການເມືອງ, ຄວາມສະຫງົບ ແລະ ຄວາມເປັນລະບຽບຮຽບຮ້ອຍທາງສັງຄົມ, ຕິດພັນກັບແຜນປ້ອງກັນ ກອງປະຊຸມສຸດຍອດອາຊຽນ ຄັ້ງທີ 44-45, ກອງປະຊຸມໃຫຍ່ 3 ຂັ້ນ ແລະ ປີທ່ອງທ່ຽວລາວ ແລະ ການຈັດຕັ້ງປະຕິບັດວາລະແຫ່ງຊາດວ່າດ້ວຍການແກ້ໄຂບັນຫາຢາເສບຕິດ ແລະ ການແກ້ໄຂປະກົດການຫຍໍ້ທໍ້ໃນສັງຄົມ, ເຮັດວຽກງານພະລາທິການເພື່ອສ້າງໃຫ້ກົມກອງມີຄວາມເຂັ້ມແຂງ, ເອົາໃຈໃສ່ເຮັດວຽກງານເສນາທິການ ແລະ ພົວພັນຕ່າງປະເທດ, ເປັນຕົ້ນແມ່ນການປະສານສົມທົບ, ການສ່ອງແສງລາຍງານ ກໍ່ຄືການຈັດຕັ້ງຜັນຂະຫຍາຍມະຕິ, ຄໍາສັ່ງ ຂອງຂັ້ນເທິງ ແລະ ການກະກຽມ ແລະ ດໍາເນີນກອງປະຊຸມໃຫຍ່ 3 ຂັ້ນຂອງພັກ ຂອງແຕ່ລະແຂວງ.
ກອງປະຊຸມ, ຍັງໄດ້ຍົກໃຫ້ເຫັນບັນດາຂໍ້ຄົງຄ້າງ, ຂໍ້ຂາດຕົກບົກພ່ອງ ໃນໄລຍະຜ່ານມາ ພ້ອມທັງຊີ້ໃຫ້ເຫັນບັນຫາສາເຫດຕົ້ນຕໍ ເພື່ອກໍານົດທິດທາງ, ວິທີການ ແລະ ມາດຕະການປັບປຸງແກ້ໄຂ ຢ່າງຈິງຈັງ ແລະ ສອດຄ່ອງ ກັບສະພາບການຂອງວຽກງານຕ່າງໆຕໍ່ໜ້າ.
