ໃນວັນທີ 30 ເມສາ 2024, ຄະນະບໍລິຫານງານຊາວໜຸ່ມ ກະຊວງປ້ອງກັນຄວາມສະຫງົບ ໄດ້ຈັດພິທີມອບ-ຮັບໃບຢັ້ງຢືນ 4 ບຸກ ຄັ້ງທີ III ປະຈຳປີ 2023 ແລະ ທຸງໄຊນໍາໜ້າຂະບວນການແຂ່ງຂັນ 4 ບຸກ, ເປັນກຽດເຂົ້າຮ່ວມໂດຍ ທ່ານ ມອນໄຊ ລາວມົວຊົງ ກຳມະການສຳຮອງສູນກາງພັກ ເລຂາຄະນະບໍລິຫານງານ ສູນກາງຊາວໜຸ່ມປະຊາຊົນປະຕິວັດລາວ, ມີ ພົຈວ ຄຳສາຍ ຈັນທະວົງ ຮອງຫົວໜ້າກົມໃຫຍ່ການເມືອງປ້ອງກັນຄວາມສະຫງົບ, ມີຄະນະບໍລິຫານງານຊາວໜຸ່ມ ກະຊວງປ້ອງກັນຄວາມສະຫງົບ, ອົງການຈັດຕັ້ງແມ່ຍິງ, ກຳມະການ, ບັນດາຄະນະຊາວໜຸ່ມ ກົມກອງອ້ອມຂ້າງ ແລະ ສະມາຊິກຊາວໜຸ່ມ ເຂົ້າຮ່ວມ.
ພັອ ສີສົມບັດ ໄຊປັນຍາ ຮອງເລຂາຄະນະບໍລິຫານງານຊາວໜຸ່ມ ກະຊວງປ້ອງກັນຄວາມສະຫງົບ ໄດ້ສະຫຼຸບການຈັດຕັ້ງປະຕິບັດຂໍ້ແຂ່ງຂັນ 4 ບຸກ ຕິດພັນກັບ 15 ຂໍ້ແຂ່ງຂັນຂອງຊາວໜຸ່ມ ກະຊວງ ປກສ ປະຈຳປີ 2023 ສະແດງອອກຄື:
+ ດ້ານແນວຄິດ: ໄດ້ຖືເອົາວຽກງານສຶກສາອົບຮົມການເມືອງ-ແນວຄິດເປັນກົກ, ເອົາໃຈໃສ່ເຕົ້າໂຮມຄວາມສາມັກຄີຢ່າງໜັກແໜ້ນ ໃຫ້ແກ່ສະມາຊິກຊາວໜຸ່ມ ໃນກໍາລັງ ປກສ ເວົ້າລວມ, ເວົ້າສະເພາະ ກໍຄື ຖັນແຖວສະມາຊິກຊາວໜຸ່ມ 15 ກົມກອງ ອ້ອມຂ້າງ ກະຊວງ ເຊິ່ງໃນແຕ່ລະປີ ໄດ້ລົງພົບປະໂອ້ລົມ ແລະ ຈັດຕັ້ງປາຖະກະຖາຫວນຄືນມູນເຊື້ອວັນສໍາຄັນຕ່າງໆຂອງພັກ-ຂອງຊາດ ໃກ້ຊິດຕິດແທດກັບສະມາຊິກຊາວໜຸ່ມໂດຍກົງ ເປັນຕົ້ນແມ່ນ ການລົງໂຄສະນາເຜີຍແຜ່ບັນດາມະຕິຄໍາສັ່ງ, ຂໍ້ຫ້າມ ແລະ ນິຕິກຳຕ່າງໆພ້ອມທັງຊຸກຍູ້ວຽກງານການຈັດຕັ້ງຂໍ້ແຂ່ງຂັນ 4 ບຸກ ໃຫ້ຄະນະ ແລະ ສະມາຊິກຊາວໜຸ່ມ 15 ກົມກອງ ອ້ອມຂ້າງ ກະຊວງ ແລະ ກອງບັນຊາການ ປກສ ແຂວງ ທົ່ວປະເທດ ຈໍານວນ 20 ຄັ້ງ ມີຜູ້ເຂົ້າຮ່ວມ ທັງໝົດ 3.000 ສະຫາຍ.
+ ດ້ານການຝຶກຝົນຫຼໍ່ຫຼອມຮ່ຳຮຽນ: ສະມາຊິກຊາວໜຸ່ມແຕ່ລະສະຫາຍ ໄດ້ມີຄວາມຕື່ນຕົວໃນການໄປຍົກລະດັບດ້ານຕ່າງໆ ທັງພາຍໃນ ແລະ ຕ່າງປະເທດຫຼາຍຂຶ້ນ ເພື່ອຕອບສະໜອງຄວາມຮຽກຮ້ອງຕ້ອງການຂອງໜ້າທີ່ການເມືອງ ເປັນຕົ້ນ ດ້ານວຽກງານວິຊາສະເພາະ, ທິດສະດີການເມືອງ, ພາສາຕ່າງປະເທດ, ຝຶກອົບຮົມໄລຍະສັ້ນ, ໄລຍະຍາວ, ທັດສະນະສຶກສາ, ເຂົ້າຮ່ວມສ້າງກິດຈະກຳຕ່າງໆ ຢູ່ພາຍໃນ ແລະ ຕ່າງປະເທດ ສະແດງອອກຄື: ໃນປີ 2023 ສະມາຊິກຊາວໜຸ່ມ ໄດ້ຮັບການໄປຍົກລະດັບດ້ານຕ່າງໆ ທັງພາຍໃນ ແລະ ຕ່າງປະເທດ 750 ສະຫາຍ.
+ ດ້ານວຽກງານການຈັດຕັ້ງ: ໃນໄລຍະຜ່ານມາ, ຄະນະຊາວໜຸ່ມ ກະຊວງປ້ອງກັນຄວາມສະຫງົບ ກໍໄດ້ເພີ່ມທະວີປັບປຸງກໍ່ສ້າງທາງດ້ານການຈັດຕັ້ງ ໃຫ້ມີການຂະຫຍາຍຕົວ ແລະ ມີຄວາມເຂັ້ມແຂງທາງດ້ານປະລິມານ ແລະ ຄຸນນະພາບ, ຮັບປະກັນໃນການນໍາພາ-ຊີ້ນໍາ ສະມາຊິກສະມາຊິກຊາວໜຸ່ມ ຢູ່ໃນແຕ່ລະຂົງເຂດວຽກງານ, ເປັນໃຈກາງໃນການເຕົ້າໂຮມ, ຄຸ້ມຄອງ ແລະ ສຶກສາອົບຮົມຊາວໜຸ່ມ, ປັບປຸງແບບແຜນວິທີນໍາພາ, ວິທີເຮັດວຽກ ໃຫ້ສອດຄອງກັບການເຕີບໃຫຍ່ຂະ ຫຍາຍຕົວຂອງຄະນະຊາວໜຸ່ມແຕ່ລະຂັ້ນ.
ດ້ານວິຊາຊີບ ຫຼື ການເຄື່ອນໄຫວວຽກງານວິຊາສະເພາະ: ບັນດາຄະນະຊາວໜຸ່ມ 15 ກົມກອງ ອ້ອມຂ້າງ ກະຊວງ ໄດ້ເອົາໃຈໃສ່ປະຕິບັດໜ້າທີ່ວຽກງານວິຊາສະເພາະ ໃນຄວາມຮັບຜິດຊອບຂອງຕົນ ມີຜົນສຳເລັດຕາມການມອບໝາຍຂອງຂັ້ນເທິງ ແລະ ອື່ນໆ.
ໃນພິທີ ກໍໄດ້ມີການມອບໃບຢັ້ງຢືນ 4 ບຸກ ແລະ ທຸງໄຊນໍາໜ້າຂະບວນການແຂ່ງຂັນ 4 ບຸກ ໃຫ້ຄະນະຊາວໜຸ່ມປະຊາຊົນປະຕິວັດລາວ ກະຊວງປ້ອງກັນຄວາມສະຫງົບ ທີ່ໄດ້ສໍາເລັດໃນການຈັດຕັ້ງປະຕິບັດຂໍ້ແຂ່ງຂັນ 4 ບຸກ ຂອງຄະນະຊາວໜຸ່ມປະຊາຊົນປະຕິວັດລາວ ຄັ້ງທີ III ປະຈໍາປີ 2023, ເຊິງປະກອບມີ:
ຄະນະຊາວໜຸ່ມຮາກຖານ 15 ກົມກອງ ອ້ອມຂ້າງ ກະຊວງ ແລະ 1 ຄະນະບໍລິຫານງານຊາວໜຸ່ມປະຊາຊົນປະຕິວັດລາວ ກະຊວງປ້ອງກັນຄວາມສະຫງົບ
ພ້ອມນີ້, ຍັງໄດ້ມອບຫຼຽນກາ 65 ປີ ວັນສ້າງຕັ້ງສູນກາງຊາວໜຸ່ມປະຊາຊົນປະຕິວັດລາວ ໃຫ້ອະດີດການນຳ ຄະນະບໍລິຫານງານຊາວໜຸ່ມ ກະຊວງ ປກສ 10 ສະຫາຍ ແລະ ມອບໃບຍ້ອງຍໍຂອງ ສູນກາງຊາວໜຸ່ມປະຊາຊົນປະຕິວັດລາວ ໃຫ້ຄະນະ ພັກ 15 ກົມກອງ ອ້ອມຂ້າງ ກະຊວງ ປກສ, ເຊິ່ງເປັນກຽດມອບໂດຍ ທ່ານ ມອນໄຊ ລາວມົວຊົງ.
