ພົຕ ປອ ສຸວັນນີ ສີສຸພາບມີໄຊ ຫົວໜ້າກົມໃຫຍ່ການເມືອງ ກະຊວງ ປກສ ພ້ອມຄະນະໄດ້ລົງກວດການໂຄງການສ້າງເສດ ຖະກິດທຳການຜະລິດຢູ່ໂຮງຮຽນວັດທະນະທຳ ປ້ອງກັນຄວາມສະຫງົບ ໃນວັນທີ 26 ເມສາ 2024, ມີຮອງຫົວໜ້າກົມໃຫຍ່, ຫົວໜ້າຫ້ອງການ, ຄະນະຮັບສູນການຜະລິດກົມໃຫຍ່ການເມືອງ, ຕາງໜ້າຫ້ອງວ່າການ, ກົມໃຫຍ່ພະລາທິການ, ຫົວໜ້າອໍານວຍການໂຮງຮຽນວັດທະນະທໍາ ປກສ, ບໍລິສັດ ແລະ ພະນັກງານວິຊາການເຂົ້າຮ່ວມ.
ພັອ ປອ ວຽງໄຊ ທໍາມະສິດ ຫົວໜ້າຫ້ອງການກົມໃຫຍ່ການເມືອງ ປກສ ໄດ້ລາຍງານວ່າ: ໃນໄລຍະ 1 ປີຜ່ານມາ, ໄດ້ບຸກເບີກເນື້ອທີ່ທໍາການຜະລິດ, ໄດ້ສ້າງໜອງປາເພີ່ມອີກ 1 ໜອງ ແລະ ໄດ້ກໍ່ສ້າງຫໍພັກຫຼັງໃໝ່ 1 ຫຼັງ ສຳເລັດ; ວຽກງານການຜະລິດ ( ການລ້ຽງໄກ່ ) ຟາມໄກ່ພັນໄຂ່ ຄອກ 1: ງວດທີ 1 ສາມາດຂາຍໄຂ່ ໄດ້ທັງໝົດ 115.742.000 ກີບ, ຂາຍໄກ່ສຸດໄຂ່ໄດ້ 34.290.000 ກີບ; ງວດທີ 2 ຂາຍໄຂ່ທັງໝົດ 3.355 ແຕະ ເປັນເງິນຈໍານວນ 175.315.000 ກີບ, ຂາຍໄກ່ທີ່ຖືກຕອດກົ້ນ ໄດ້ 990.000 ກີບ ລວມລາຍຮັບທັງໝົດ 326.337.000 ກີບ; ຟາມໄກ່ພັນໄຂ່ ຄອກ2: ຂາຍໄຂ່ 30.567 ແຕະ ເປັນຈໍານວນ 1.454.722.000 ກີບ, ຂາຍໄກ່ຖືກຕອດກັ້ນ, ຊ໋ອກໄຟຟ້າດັບຈຳນວນ 934 ກິໂລ ລາຄາ 30.000 ກີບ/ກິໂລ ເປັນເງິນ 28.020.000 ກີບ, ສາເຫດໄກ່ຕາຍຜ່ານມາແມ່ນ ຍ້ອນມາຈາກ: ໄກ່ຕ໋ອດກົ້ນ, ຊ໋ອກໄຟຟ້າດັບ.
ການລ້ຽງປາໜອງເບີ 9: ໄດ້ປ່ອຍປານິນ ງວດທີ 3 ໃສ່ໜອງເບີ 9 ຈຳນວນ 30.000 ໂຕ ໄດ້ເອົາອອກຈໍາໜ່າຍຍັງບໍ່ສໍາເລັດ; ການລ້ຽງປາໜອງເບີ 10 : ໄດ້ປ່ອຍປານິນ ງວດທີ 1 ຈຳນວນ 50.000 ໂຕ ໄດ້ຂາຍປາອອກ 4.202 ກິໂລ ສາມາດສ້າງລາຍຮັບ 98.744.000 ກີບ, ໄດ້ປ່ອຍປານິນ ງວດທີ 2 ໃສ່ໜອງເບີ 10 ຈຳນວນ 35.000 ໂຕ; ໄດ້ເຄື່ອນຍ້າຍປາ ຫຼັກ 62 ມາປ່ອຍລ້ຽງໃສ່ໜອງເບີ 8 ຫຼັກ 67 ຈໍານວນ 1.045 ກິໂລ.
ໂອກາດດັ່ງກ່າວ, ຫົວໜ້າກົມໃຫຍ່ການເມືອງ ປກສ ພ້ອມຄະນະໄດ້ລົງພາກສະໜາມກວດກາຮ້ານຄ້າ-ຮ້ານສະດວກຊື້, ການກໍ່ສ້າງອ່າງເກັບນໍ້າ ແລະ ສ້ອມແປງອ່າງເກັບນໍ້າເກົ່າໂຮງຮຽນວັດທະນະທໍາ ປກສ, ໂຄງາການກໍ່ສ້າງຄູກັ້ນດິນພາກຂະຫຍາຍໜອງເບີ 11, ໂຄງການກໍ່ສ້າງຟາມໄກ່ໃສ່ໜອງເບີ 11 ຕື່ມອີກ.
ພາບ-ຂ່າວ: ຄຳໂຖ
