ໃນຕອນເຊົ້າຂອງວັນທີ 2 ເມສາ 2024, ບັນດາກ້ອນກໍາລັງວິຊາສະເພາະ ກະຊວງປ້ອງກັນຄວາມສະຫງົບ ໄດ້ຈັດພິທີມອບ -ຮັບຄໍາສັ່ງ ແລະ ປ່ອຍຂະບວນລົດວິຊາສະເພາະສະແດງເຖິງຄວາມພ້ອມໃນດ້ານຕ່າງໆ ເພື່ອກະກຽມປ້ອງກັນກອງປະຊຸມສຸດຍອດອາຊຽນ ຄັ້ງທີ 44,45 ທີ່ຈະຈັດຂຶ້ນໃນມໍ່ໆນີ້ ໂດຍການເປັນປະທານຂອງທ່ານ ພົອ ວິໄລ ຫຼ້າຄໍາຟອງ ກໍາ ມະການກົມການເມືອງສູນກາງພັກ ຮອງນາຍົກລັດຖະມົນຕີ ລັດຖະ ມົນຕີກະຊວງປ້ອງກັນຄວາມສະ ຫງົບ, ມີຄະນະນໍາກະຊວງ, ກົມໃຫຍ່, ຫ້ອງວ່າການກະຊວງ, ກອງບັນຊາການ, 3 ວິທະຍາຄານ, ຫົວໜ້າກອງບັນຊາການ ປກສ ນະຄອນຫຼວງວຽງຈັນ, ປກສ ແຂວງ ທົ່ວປະເທດ, ພ້ອມດ້ວຍກ້ອນກໍາລັງວິຊາສະເພາະປ້ອງກັນຄວາມສະຫງົບ ເຂົ້າຮ່ວມ.
ໃນພິທີ ທ່ານ ພົຈວ ສຸລິນະ ແກ້ວປະເສີດ ຫົວໜ້າຫ້ອງວ່າການ ກະຊວງປ້ອງກັນຄວາມສະຫງົບ ໄດ້ລາຍງານຫຍໍ້ກ່ຽວກັບການກະກຽມປ້ອງກັນກອງປະຊຸມສຸດຍອດອາຊຽນ ຄັ້ງທີ 44,45 ເຊິ່ງກອງປະຊຸມຄັ້ງນີ້ ຈະມີຜູ້ເຂົ້າຮ່ວມຈາກບັນດາປະເທດອາຊຽນເພື່ອນມິດສາກົນ ໄດ້ໃຫ້ຄວາມເຊື່ອໝັ້ນໃນທຸກໆດ້ານ ແລະ ຈະມີຜູ້ເຂົ້າ ຮ່ວມຫຼາຍລະດັບເປັນຕົ້ນແມ່ນ ປະມຸກລັດ, ປະທານປະເທດ, ນາຍົກ ລັດຖະມົນຕີບັນດາກະຊວງ, ເຈົ້າ ໜ້າທີ່ອາວຸໂສ ແລະ ວິຊາການຂັ້ນຕ່າງໆທີ່ມາຈາກບັນດາປະເທດອາຊຽນ, ອາຊຽນບວກ ແລະ ຄູ່ເຈລະຈາອາຊຽນ ກາຍເປັນປະຊາຄົມທີ່ມີຄວາມເຂັ້ມແຂງທາງດ້ານການເມືອງ, ເສດຖະກິດ ແລະ ວັດທະນະທໍາ-ສັງຄົມ, ປະຊາຊົນອາຊຽນມີຄວາມສົມບູນພູນສຸກ.
ໃນໂອກາດສໍາຄັນນີ້ ທ່ານ ພົທ ກົງທອງ ພົງວິຈິດ ກໍາມະການສູນກາງພັກ ຮອງລັດຖະມົນຕີກະຊວງປ້ອງກັນຄວາມສະຫງົບ ໄດ້ຜ່ານຄໍາສັ່ງເພີ່ມທະວີວຽກງານປ້ອງກັນກອງປະຊຸມສຸດຍອດອາຊຽນຄັ້ງທີ 44,45, ຂໍ້ຕົກລົງ ວ່າດ້ວຍການແຕ່ງຕັ້ງຄະນະກໍາມະການລະດັບຊາດ ເພື່ອກະກຽມ ແລະ ດໍາເນີນການເປັນປະທານອາຊຽນປີ 2024 ແລະ ຂໍ້ຕົກລົງ ວ່າດ້ວຍການແຕ່ງຕັ້ງຄະນະຮັບຜິດ ຊອບໃນແຕ່ລະດ້ານໃນການປ້ອງ ກັນກອງປະຊຸມສຸດຍອດອາຊຽນ ຄັ້ງທີ 44,45 ປີ 2024 ເພື່ອຮັບ ປະກັນໃຫ້ປະເທດຊາດມີຄວາມ ສະຫງົບທາງດ້ານການເມືຶອງ ແລະ ມີຄວາມເປັນລະບຽບຮຽບຮ້ອຍປອດໄພທາງດ້ານສັງຄົມ ໃນໄລ ຍະກະກຽມ ແລະ ດໍາເນີນກອງປະຊຸມສຸດຍອດອາຊຽນ ຄັ້ງທີ 44-45 ແລະ ກອງປະຊຸມອື່ນໆທີ່ກ່ຽວຂ້ອງ ໃຫ້ມີຄວາມສະ ຫງົບປອດໄພສູງສຸດ.
ໃນໂອກາດນີ້ ທ່ານ ພົອ ວິໄລ ຫຼ້າຄໍາຟອງ ໄດ້ສະແດງຄວາມຍ້ອງ ຍໍຊົມເຊີຍຕໍ່ການຝຶກມອບ-ຮັບຄໍາສັ່ງ ແລະ ປ່ອຍຂະບວນລົດວິຊາສະເພາະຂອງກໍາລັງປ້ອງກັນຄວາມສະຫງົບ, ພ້ອມນີ້ ທ່ານຍັງໄດ້ເນັ້້ນໃຫ້ຄະນະພັກ-ຄະນະບັນຊາ ແລະ ກ້ອນກໍາລັງເຫຼົ່າວິຊາສະເພາະແຕ່ ລະສະຫາຍ ຈົ່ງເພີ່ມທະວີຄວາມເອົາໃຈໃສ່ປະຕິບັດໜ້າທີ່ຂອງຕົນ ທີ່ໄດ້ຮັບມອບໝາຍດ້ວຍຄວາມຮັບຜິດຊອບສູງ ແລະ ມີຜົນສໍາເລັດຕາມຄາດໝາຍທີ່ໄດ້ວາງໄວ້.
