ວັນທີ 2 ເມສາ 2024, ພົຕ ຄໍາກິ່ງ ຜຸຍຫຼ້າມະນີວົງ ຮອງລັດຖະມົນຕີກະຊວງ ປກສ ຫົວໜ້າກົມໃຫຍ່ຕໍາຫຼວດ ພ້ອມຄະນະ ໄດ້ຕ້ອນຮັບການເຂົ້າອວຍພອນ ຂອງ ພົຈວ ຮສ ປອ ສົມພອນ ສີສຸວັນນະ ຫົວໜ້າການເມືອງວິທະຍາຄານປ້ອງກັນຊາດໄກ ສອນພົມວິຫານ ກະຊວງປ້ອງກັນປະເທດ ພ້ອມຄະນະ, ທ່ານ ໂຊກໄຊ ສຸຂະວົງ ຜູ້ອໍານວຍການບໍລິສັດ ບໍລິຫານຈັດການໄຊເບີລາວ ຈໍາກັດ ເນື່ອງໃນໂອກາດສະເຫຼີມສະຫຼອງວັນສ້າງຕັ້ງກໍາລັງ ປກສ ຄົບຮອບ 63 ປີ (5 ເມສາ 1961-5 ເມສາ 2024).
ໂອກາດດັ່ງກ່າວ, ທັງ 2 ພາກສ່ວນ ກ່າວວ່າ: ເນື່ອງໃນໂອກາດສະເຫຼີມສະຫຼອງວັນສ້າງຕັ້ງກໍາລັງ ປກສ ຄົບຮອບ 63 ທີ່ຈະມາຮອດໃນມໍ່ໆນີ້, ເຊິ່ງເປັນວັນທີ່ມີຄວາມໝາຍ-ຄວາມສໍາຄັນທາງປະຫວັດສາດ ແລະ ສະແດງໃຫ້ເຫັນການເຕີບໃຫຍ່ຂະຫຍາຍຕົວ, ຜົນງານໄຊຊະນະຂອງກໍາລັງ ປກສ ທີ່ໄດ້ຄຽງບ່າຄຽງໄຫຼ່ກັບກອງທັບປະຊາຊົນລາວ ແລະ ປະຊາຊົນບັນດາເຜົ່າຕໍ່ສູ້ກູ້ຊາດ ຈົນໄດ້ຮັບການປົດປ່ອຍ ຕະຫຼອດເຖິງໄລຍະສ້າງສາພັດທະນາປະເທດຊາດທີ່ຍາດມາໄດ້ໃນໄລຍະຜ່ານມາ.
ທ້າຍນີ້, ຂໍອວຍພອນໄຊໃຫ້ຄະນະພັກ-ຄະນະນໍາກະຊວງ ປກສ ຕະຫຼອດຮອດ ນາຍ ແລະ ພົນຕໍາຫຼວດ ຈົ່ງມີສຸຂະພາບແຂງແຮງ ພ້ອມກັນເຮັດສໍາເລັດໜ້າທີ່ອັນມີກຽດຂອງບັນດາທ່ານທີ່ພັກ-ລັດ ແລະ ການຈັດຕັ້ງມອບໝາຍໃຫ້.
ພົຕ ຄໍາກິ່ງ ຜຸຍຫຼ້າມະນີວົງ ຮອງລັດຖະມົນຕີກະຊວງ ປກສ ໄດ້ກ່າວສະແດງຄວາມຂອບໃຈທັງ 2 ພາກສ່ວນທີ່ໄດ້ມາອວຍພອນໃນຄັ້ງນີ້ ແລະ ທີ່ເຫັນໄດ້ຄວາມໝາຍຄວາມສໍາຄັນຂອງວັນສ້າງຕັ້ງກໍາລັງປ້ອງກັນຄວາມສະຫງົບ; ພ້ອມນີ້ ກໍຍັງເປັນການຮັດແໜ້ນຄວາມສາມັກຄີລະຫວ່າງ ກໍາລັງ ປກສ ກັບ 2 ພາກສ່ວນໃຫ້ມີຄວາມແໜ້ນແຟ້ນຂຶ້ນກວ່າເກົ່າ.
ຂ່າວ: ຄຳໂຖ
