ກອງສິລະປະກອນ ປ້ອງກັນຄວາມສະຫງົບ ຮ່ວມກັບກອງກາຍຍະສິນສູນກາງ ໄດ້ຈັດການສະແດງສິລະປະ-ວັດທະນະທຳ ແລະກາຍຍະສິນ ເພື່ອສະເຫຼີມສະຫຼອງວັນສ້າງຕັ້ງກຳລັງປ້ອງກັນຄວາມສະຫງົບ ຄົບຮອບ 63 ປີ (5 ເມສາ 1961- 5 ເມສາ 2024) ໃນວັນທີ 29 ມີນາ ຜ່ານມາ ຢູ່ທີ່ສະໂມສອນ ກະຊວງປ້ອງກັນຄວາມສະຫງົບ, ໂດຍມີ ພົທ ກົງທອງ ພົງວິຈິດ ຮອງລັດຖະມົນ ຕີກະຊວງປ້ອງກັນຄວາມສະຫງົບ, ມີຮອງລັດຖະມົນຕີ, ຄະນະປະຈຳພັກກະຊວງ, ບັນດາຄະນະພັກ-ຄະນະບັນ ຊາ, ກົມກອງອ້ອມຂ້າງກະຊວງປ້ອງກັນຄວາມສະຫງົບ, ກະຊວງປ້ອງກັນປະເທດ, ປກສ ນະຄອນຫຼວງວຽງຈັນ, ຄອບຄົວການນໍາ, ຄະນະຮັບຜິດຊອບຂະບວນການ, ນາຍ ແລະ ພົນຕຳ ຫຼວດ, ນາຍ ແລະ ພົນທະຫານ, ນັກສະແດງສິລະປະກອນ ປກສ ແລະ ກອງກາຍຍະສິນສູນກາງ ເຂົ້າຮ່ວມ.
ພັອ ສອນພະຈັນ ທໍາມະວົງ ຫົວໜ້າກົມໂຄສະນາອົບຮົມ ກົມໃຫຍ່ການເມືອງປ້ອງກັນຄວາມສະຫງົບ ຕາງໜ້າໃຫ້ຄະນະຮັບຜິດຊອບອະນຸກໍາມະການຂະບວນການ ກ່າວວ່າ: ການສະແດງສິລະປະ-ວັດທະນະທຳ ແລະ ກາຍຍະສິນສະເຫຼີມສະຫຼອງວັນສ້າງຕັ້ງກຳລັງປ້ອງກັນຄວາມສະຫງົບ ໃນຄັ້ງນີ້ ເພື່ອເປັນການໂຄສະນາເຜີຍແຜ່ທາດແທ້ມູນເຊື້ອອັນສະຫງ່າອົງອາດ, ນໍ້າ ໃຈເສຍສະຫຼະອັນສູງສົ່ງ ແລະ ຜົນງານໄຊຊະນະອັນໃຫຍ່ຫຼວງທີ່ກໍາລັງປ້ອງກັນຄວາມສະຫງົບ ຍາດມາໄດ້ໃນຕະຫຼອດໄລຍະ 63 ປີ ໂດຍຜ່ານບົດເພງ-ຂັບລໍາ, ບົດຟ້ອນ.
ພ້ອມກັນນັ້ນ, ກໍເພື່ອເປັນການຊົມເຊີຍຜົນງານອັນຍິ່ງໃຫຍ່ຂອງກຳລັງປ້ອງກັນຄວາມສະຫງົບ ໂດຍພາຍໃຕ້ການນຳພາທີ່ປີຊາສາມາດ, ສະຫຼາດສ່ອງໃສ ແລະ ເດັດຂາດ, ໂດຍກົງ, ຮອບດ້ານຂອງພັກປະ ຊາຊົນປະຕິວັດລາວ ຕໍ່ກຳລັງປ້ອງກັນຄວາມສະຫງົບ; ພ້ອມນັ້ນ, ກໍເພື່ອເປັນການອະນຸລັກຮັກສາ ແລະ ເສີມຂະຫຍາຍວັດທະນະທຳອັນດີງາມຂອງຊາດໃຫ້ຄຽງຄູ່ກັບຊາດລາວ ຄົນລາວຕະຫຼອດໄປ.
ສຳລັບລາຍການທີ່ນຳມາສະແດງໃນຄັ້ງນີ້ ມີທັງໝົດ 19 ລາຍ ການຄື: ບົດເພງ ມີ 10 ລາຍການ, ບົດຟ້ອນມີ 5 ລາຍການ, ສະແດງກາຍຍະສິນ 3 ລາຍການ ແລະ ເປົ່າແຄນດ່ຽວ 1 ລາຍການ.
ຂ່າວ: ສີລິພອນ
