ໃນວັນທີ 24 ສິງຫາ ຜ່ານມາ, ພົທ ກົງທອງ ພົງວິຈິດ ຮອງລັດຖະມົນຕີ ກະຊວງ ປກສ ພ້ອມດ້ວຍຄະນະ ໄດ້ລົງເຄື່ອນໄຫວຊຸກຍູ້ຊີ້ນໍາວຽກງານວິຊາສະເພາະ ຢູ່ກອງບັນຊາການ ປກສ ແຂວງສະຫວັນນະເຂດ, ຕ້ອນຮັບໂດຍ ພັອ ສົມໜາຍ ພົມມະຈັນ ຫົວໜ້າກອງບັນຊາການ ປກສ ແຂວງສະຫວັນນະເຂດ ພ້ອມດ້ວຍຄະນະ, ມີຄະນະພັກ-ຄະນະບັນຊາ, ພ້ອມດ້ວຍຄະນະຫ້ອງອ້ອມຂ້າງ ເຂົ້າຮ່ວມ.
ໃນພິທີ, ພັອ ສົມໝາຍ ພົມມະຈັນ ໄດ້ລາຍງານສະພາບລວມໂດຍຫຍໍ້ ໂດຍສະເພາະການຈັດຕັ້ງປະຕິບັດການຊີ້ນຳ-ນຳພາວຽກງານປ້ອງກັນຄວາມສະຫງົບ ໃນທົ່ວແຂວງສະຫວັນນະເຂດ ເປັນຕົ້ນແມ່ນບັນຫາຄວາມບໍ່ສະຫງົບທາງດ້ານການເມືອງ, ບັນຫາຄວາມບໍ່ເປັນລະບຽບຮຽບຮ້ອຍໃນສັງ ຄົມ, ບັນຫາເສດຖະກິດ, ລາຄານ້ຳມັນແພງ ແລະອື່ນໆ.
ຈາກນັ້ນ, ຜູ້ເຂົ້າຮ່ວມກໍໄດ້ລາຍງານການປະຕິບັດໜ້າທີ່ວຽກງານວິຊາສະເພາະ, ແລກປ່ຽນປະກອບຄຳຄິດຄຳເຫັນຢ່າງກົງໄປກົງມາ ແລະ ເລິກເຊິ່ງ, ເປັນຕົ້ນວຽກງານກວດກາຄົນເຂົ້າ-ອອກເມືອງ, ການເກັບຄ່າທຳນຽມຜ່ານປະຕູດຽວ ຜ່ານດ່ານຂົວມິດຕະພາບ ລາວ-ໄທ 2, ດ່ານສາກົນ ແດນລາວ-ຫວຽດນາມ, ວຽກງານນະໂຍບາຍ, ວຽກງານພະລາທິການ ແລະອື່ນໆ.
ໃນໂອກາດນີ້, ພົທ ກົງທອງ ພົງວິຈິດ ກໍສະແດງຄວາມຍ້ອງຍໍຊົມເຊີຍຕໍ່ຜົນສຳເລັດໃນການເຄື່ອນໄຫວຈັດຕັ້ງປະຕິບັດໜ້າທີ່ການເມືອງ ໃນໄລຍະຜ່ານມາ ແລະ ໃຫ້ທິດຊີ້ນຳ, ຄະນະພັກ-ຄະນະບັນຊາແຕ່ລະຫ້ອງ ໃຫ້ເອົາໃຈໃສ່ຊີ້ນຳ-ນຳພາກຳລັງວິຊາສະເພາະ ຢ່າງໃກ້ຊິດຕິດແທດ, ໃນການຈັດຕັ້ງປະຕິບັດວາລະແຫ່ງຊາດ ວ່າດ້ວຍ ການແກ້ໄຂບັນຫາຢາເສບຕິດ ຢູ່ພາຍໃນແຂວງສະຫວັນນະເຂດໃຫ້ຫຼຸດໜ້ອຍຖອຍລົງ, ຕ້ອງເອົາໃຈໃສ່ເປັນເຈົ້າການແກ້ໄຂກວດກາບ່ອນຈຳໜ່າຍ ແລະ ການມົ້ວສຸມ, ກຳນົດໄດ້ 3 ຫຼັກການ, ຕ້ອງມີຄວາມເດັດຂາດ, ຄວາມໂປ່ງໃສ, ຄວາມເປັນມືອາຊີບປຸກລະດົມຂົນຂວາຍກໍາລັງແຮງ ເພື່ອແກ້ໄຂບັນຫາຢາເສບຕິດ ທີ່ລະບາດເປັນວົງກວ້າງສ້າງຄວາມຮັບຮູ້ທົ່ວສັງຄົມ ດ້ວຍການສືກສາອົມຮົມການໂຄສະນາເຜີຍແຜ່ລະບຽບກົດໝາຍ ແລະ ຜົນຮ້າຍຂອງຢາເສບຕິດ ໃຫ້ຊາວໝຸ່ມເຍົາວະຊົນ, ພໍ່ແມ່ປະຊາຊົນຢ່າງຕໍ່ເນື່ອງ.
