ກອງປະຊຸມສ່ອງແສງວຽກງານຕິດຕາມກວດກາຂອງພັກ ໄຕມາດ I ແລະ ທິດທາງແຜນການໄຕມາດ II ປີ 2024 ຂອງບັນດາຄະນະກວດກາພັກອ້ອມຂ້າງກະຊວງ ປກສ ເພື່ອເປັນການກວດກາຄືນແບບແຜນການນຳພາ-ຊີ້ນຳກ່ຽວກັບວຽກງານຕິດ ຕາມ, ກວດກາຂອງຄະນະກວດກາພັກແຕ່ລະຂັ້ນໃນການຈັດຕັ້ງຜັນຂະຫຍາຍມະຕິຕ່າງໆຂອງຄະນະພັກກະຊວງ ປກສ ແລະ ມະຕິຕ່າງໆຂອງຄະນະພັກຂັ້ນຂອງຕົນໃນແຕ່ລະໄຕມາດ ໃນວັນທີ 28 ມີນາ 2024, ໂດຍມີ ສະ ຫາຍ ພົຕ ສົມວັນ ສາຍລ້ອງພາ ຄະນະປະຈຳພັກ ປະທານກວດກາພັກ ກະຊວງ ຮອງລັດຖະມົນຕີກະຊວງ ປກສ ມີບັນດາຄະນະພັກກະຊວງ, ພ້ອມດ້ວຍຮອງປະທານກວດກາ, ຫົວໜ້າພະແນກອ້ອມຂ້າງກະຊວງ ເຂົ້າຮ່ວມ.
ສະຫາຍ ພົຕ ສົມວັນ ສາຍລ້ອງພາ ກ່າວວ່າ: ວຽກງານຕິດຕາມກວດກາພັກ ແມ່ນວຽກງານໜຶ່ງທີ່ສຳຄັນທີ່ສຸດ, ເຊິ່ງນອນຢູ່ໃນການນຳພາ, ການຜັນຂະຫຍາຍແນວທາງນະໂຍບາຍຂອງພັກ ແລະ ການປະຕິບັດລະບຽບວິໄນຂອງພັກໃຫ້ມີຄວາມເຂັ້ມງວດ ຮັກສາໄດ້ອິດທິພົນບົດບາດການຳພາຂອງພັກ, ຄະນະພັກເປັນຜູ້ຊີ້ນໍາໂດຍກົງ, ຄະນະພັກ-ຄະນະນຳກະຊວງ ປກສ ໄດ້ມອບໃຫ້ຄະນະກວດກາພັກເປັນເຈົ້າການ, ເປັນເສນາທິການໃນການຈັດຕັ້ງຜັນຂະຫຍາຍວຽກງານດັ່ງກ່າວ.
ທິດທາງໃນໄຕມາດ II ໃນປີ 2024, ບັນດາຄະນະກວດກາພັກອ້ອມຂ້າງຄະນະບໍລິຫານງານພັກ ກະຊວງ ຈະຕ້ອງສືບຕໍ່ຕິດ ຕາມ, ກວດກາຄະນະພັກແຕ່ລະຂັ້ນໃນການນໍາເອົາແນວທາງນະໂຍບາຍຂອງພັກ, ກົດລະບຽບພັກ, ກົດໝາຍຂອງລັດ, ລະ ບຽບຂອງກຳລັງປ້ອງກັນຄວາມສະຫງົບ ແລະ ຂໍ້ຫ້າມຂອງກໍາລັງປ້ອງກັນຄວາມສະຫງົບເປັນແນວທາງສຶກສາອົບຮົມ ພະນັກ ງານສະມາຊິກພັກໃຫ້ເປັນປົກກະຕິຕໍ່ເນື່ອງ ແລະ ທົ່ວເຖິງ ເພື່ອເຮັດໃຫ້ແນວຄິດຂອງພະນັກງານສະມາຊິກພັກມີຄວາມສະ ຫງົບ, ອຸ່ນອຽນທຸ່ນທ່ຽງຕໍ່ການນໍາພາ-ຊີ້ນໍາຂອງພັກໃນໄລຍະ, ກວດກາຜົນສໍາເລັດບັ້ນດໍາເນີນຊີວິດການເມືອງຂອງແຕ່ລະຄະນະພັກ ມີບັນຫາໄດ້ທີ່ຍັງບໍ່ທັນຈະແຈ້ງບໍ່ທັນສອດຄອງກໍຕ້ອງໄດ້ພ້ອມກັນແກ້ໄຂໃຫ້ຂາດຕົວ ໂດຍສະເພາະແມ່ນພິສູດໃຫ້ເຫັນບັນຫາຫ່າງສຽງຕໍ່ການຈັດຕັ້ງ ແລະ ບຸກຄົນຢູ່ໃນແຕ່ລະຮາກຖານພັກ.
ຄ່ຽງຄູ່ກັບແບບແຜນວິທີນໍາພາຂອງຄະ ນະພັກແຕ່ລະຂັ້ນໃຫ້ສືບຕໍ່ປະຕິບັດຕາມຫຼັກການຂອງພັກໃຫ້ເຂັ້ມງວດ, ມີປະຊາ ທິປະໄຕ, ໂປ່ງໃສ ສາມາດກວດກາໄດ້, ທຸກບັນຫາຕ້ອງປະຕິບັດຕາມມະຕິຄໍາສັ່ງຂອງຄະນະພັກຂັ້ນຂອງຕົນໃຫ້ເຂັ້ມງວດ, ກ້າເຮັດກ້າຮັບຜິດຊອບຂັ້ນລຸ່ມຕ້ອງປະຕິບັດຕາມຂັ້ນເທິງ, ທຸກສະຫາຍຕ້ອງປະຕິບັດຕາມການຈັດຕັ້ງຢ່າງເຂັ້ມງວດ.
ຂ່າວ: ບຸນພະຈັນ
