ກອງປະຊຸມສະຫຼຸບວຽກງານຕຳຫຼວດ ແລະ ການຈັດຕັ້ງປະຕິບັດວາລະແຫ່ງຊາດ ວ່າດ້ວຍການແກ້ໄຂບັນຫາຢາເສບຕິດ ປະຈຳປີ 2023 ຂອງກົມໃຫຍ່ຕຳຫຼວດ ຈັດຂຶ້ນໃນລະຫວ່າງວັນທີ 19-20 ກຸມພາ 2024. ໂດຍການເຂົ້າຮ່ວມຂອງ ພົທ ກົງທອງ ພົງວິຈິດ ຮອງລັດຖະມົນຕີກະຊວງ ປກສ.
ໃນກອງປະຊຸມ, ພົທ ກົງທອງ ພົງວິຈິດ ໄດ້ເນັ້ນໃຫ້ກໍາລັງວິຊາສະເພາະຕໍາຫຼວດ ເອົາ ໃຈໃສ່ປະຕິບັດໜ້າທີ່ວຽກງານວິຊາສະ ເພາະຢູ່ແຕ່ລະຂັ້ນໃຫ້ເຂັ້ມແຂງ ພ້ອມທັງມີວິທີການ, ມາດຕະການປ້ອງກັນສະກັດກັ້ນ ແລະ ແກ້ໄຂປະກົດການຫຍໍ້ທໍ້ໃຫ້ທັນກັບເວລາ, ນິ້ມນວນ-ຄ່ອງແຄ້ວ, ເກັບກໍາເປົ້າໝາຍກ່ຽວກັບກົນອຸບາຍທໍາລາຍມ້າງເພຂອງສັດຕູ ແລະ ກຸ່ມຄົນບໍ່ດີ, ພ້ອມທັງມີວິທີການ, ມາດຕະການປ້ອງກັນສະກັດກັ້ນ ແລະ ແກ້ໄຂທັນເວລາ, ນິ້ມນວນ-ຄ່ອງແຄ້ວ ພ້ອມນີ້, ໃຫ້ຕັ້ງໜ້າປັບປຸງ-ບໍາລຸງ, ກໍ່ ສ້າງ ແລະ ເອົາໃຈໃສ່ສຶກສາອົບຮົມນາຍ ແລະ ພົນຕໍາຫຼວດແຕ່ລະເຫຼົ່າລົບວິຊາສະ ເພາະໃນວຽກງານຕຳຫຼວດ ໃຫ້ຮັບປະກັນພຽງພໍທາງດ້ານຈຳນວນ ແລະ ມີຄຸນນະ ພາບ ສາມາດຮອງຮັບກັບໜ້າທີ່ການເມືອງໃນໄລຍະໃໝ່, ສືບຕໍ່ຫັນເອົາກໍາລັງລົງກໍ່ສ້າງຮາກຖານການເມືອງໃຫ້ເຂັ້ມແຂງ, ສ້າງຕາໜ່າງວຽກງານ ປກສ ຢູ່ຮາກຖານໃຫ້ກ້ວາງຂວາງ, ຕິດພັນກັບມະຕິ 3 ສ້າງ ແລະ ພັດທະນາຊົນນະບົດຮອບດ້ານ, ສະກັດກັ້ນ-ແກ້ໄຂບັນດາເປົ້າໝາຍກໍ່ອາຊະຍາກຳ, ກໍ່ຄວາມບໍ່ສະຫງົບ, ຄວາມບໍ່ເປັນລະບຽບຮຽບຮ້ອຍທາງສັງຄົມໃຫ້ໜັກແໜ້ນເຂັ້ມແຂງແຕ່ຮາກຖານຂຶ້ນມາ.
ນອກນີ້, ກໍຕ້ອງສືບຕໍ່ຈັດຕັ້ງປະຕິບັດວາລະແຫ່ງຊາດ ວ່າດ້ວຍການແກ້ໄຂບັນຫາຢາເສບຕິດ ຕາມ 6 ວຽກງານຈຸດສຸມ ເຊິ່ງແມ່ນໜ້າທີ່ຕົນຕໍ່ຂອງກົມໃຫຍ່ຕໍາຫຼວດ ແລະ ບັນດາກົມກອງທ້ອງຖິ່ນທັງໝົດ, ເອົາໃຈໃສ່ວຽກງານອົງການສືບສວນ-ສອບສວນ ແລະ ການດຳເນີນຄະດີຕ່າງໆ ໃຫ້ວ່ອງໄວ ບໍ່ໃຫ້ຄະດີອັ່ງອໍ-ແກ່ຍາວ ແລະ ໃຫ້ຖືກຕ້ອງຕາມລະບຽບກົດໝາຍ, ຖືກຂັ້ນຕອນຂອງການດຳເນີນຄະດີ,ມີຄວາມໂປ່ງໄສ ແລະ ຍຸຕິທຳ, ເອົາໃຈໃສ່ໃນການຄຸ້ມຄອງ ຮັກສາຂອງກາງຄະດີໃຫ້ຖືກຕາມຫຼັກ ການວິຊາສະເພາະ ແລະ ກົດໝາຍກໍານົດ, ເດັດຂາດບໍ່ໃຫ້ຕົກເຮ່ຍເສຍຫາຍ, ສຸມໃສ່ແກ້ໄຂປະກົດການຫຍໍ້ທໍ້ໃນສັງຄົມຢ່າງເປັນລະບົບກົມກຽວເຊັ່ນ: ບັນຫາລັກລອບຄ້າ ຂາຍ, ມົ້ວສຸມຢາເສບຕິດ, ຊີງຊັບ, ປຸ້ນຊັບ, ຈັບຕົວປະກັນຮຽກຄ່າໄຖ່, ສໍ້ໂກງຊັບ, ໂຈລະກໍາທາງໂທລະຄົມ, ຄ້າຂາຍເຖື່ອນ, ນັກເລງອັນຕະພານ, ການພະນັນເຖື່ອນ, ອຸບັດ ຕິເຫດ, ຄ້າຂາຍອາວຸດເຖື່ອນ, ຄ້າມະນຸດ,ຊອກໃຫ້ໄດ້ຜູ້ເປັນຫົວໂປ່ໂຕການ ເພື່ອມາລົງໂທດຕາມລະບຽບກົດໝາຍຢ່າງເຂັ້ມງວດ, ສະກັດກັ້ນ ແລະ ຕອບຕ້ານການໂຄ ສະນາໂຈມຕີການນໍາພັກ-ລັດ ຜ່ານທາງສື່ຕ່າງໆ ທີ່ສັດຕູ ແລະ ກຸ່ມບໍ່ດີສວຍໃຊ້ເປັນຕົ້ນແມ່ນສື່ອອນລາຍ (ທາງຢູທູບ ແລະ ເຟສບຸກ), ເອົາໃຈໃສ່ປ້ອງກັນການນຳພັກ-ລັດ, ອົງການ, ສໍານັກງານການຈັດຕັ້ງສາກົນ ແລະ ງານບຸນສຳຄັນ, ກອງປະຊຸມລະດັບຊາດ-ສາກົນ (ກອງປະຊຸມສຸດຍອດຜູ້ນໍາອາຊຽນ), ແຂກພາຍໃນ ແລະ ຕ່າງປະເທດໃຫ້ມີຄວາມສະຫງົບປອດໄພ 100%.
ຂ່າວ: ແກ້ວ
