ພົຕ ສົມວັນ ສາຍລ້ອງພາ ຮອງລັດຖະມົນຕີກະຊວງ ປກສ ເຂົ້າຮ່ວມກອງປະຊຸມສະຫຼຸບວຽກງານປ້ອງກັນເຄື່ອນທີ່ ( ປທ ) ປະຈໍາປີ 2023 ແລະ ວາງທິດທາງແຜນ ການປີ 2024 ໃນວັນທີ 20 ກຸມພາ 2024 ເປັນປະທານໂດຍ ພົຈວ ພູນສະຫວັນ ພັນທະເສນາ ຫົວໜ້າກອງບັນຊາການປ້ອງກັນເຄື່ອນທີ່ ກະຊວງ ປກສ, ມີຄະນະ ພັກ-ຄະນະບັນຊາ, ພ້ອມດ້ວຍຫ້ອງ, ກອງພັນ, ກອງຮ້ອຍ ແລະ ກອງພັນປ້ອງກັນເຄື່ອນທີ່ໃນຂອບເຂດທົ່ວປະເທດເຂົ້າຮ່ວມ.
ໂອກາດດັ່ງກ່າວ, ຮອງລັດຖະມົນຕີ ກະຊວງ ປກສ ໄດ້ມີຄໍາເຫັນໂອ້ລົມຕໍ່ກອງປະຊຸມຄັ້ງນີ້ວ່າ: ກຳລັງປ້ອງກັນເຄື່ອນທີ່ຕ້ອງສືບຕໍ່ເປັນຫຼັກແຫຼ່ງ ໃນການຈັດຕັ້ງຜັນຂະ ຫຍາຍມະຕິກອງປະຊຸມໃຫ່ຍຄັ້ງທີ XI ຂອງພັກ, ມະຕິກອງປະຊຸມໃຫ່ຍຄັ້ງທີ V ຂອງຄະນະພັກກະ ຊວງ ພ້ອມທັງປະຕິບັດ 4 ຄາດໝາຍ 4 ແຜນງານໃຫຍ່ 41 ໂຄງການ ຢ່າງມີຈຸດສຸມແທດເໝາະ ກັບຕົວຈິງ ນັບແຕ່ຂັ້ນກະຊວງລົງຮອດກົມກອງທ້ອງຖິ່ນ ໃຫ້ມີຜົນສໍາເລັດໃນຫຼາຍດ້ານ ເປັນຕົ້ນດ້ານການເມືອງ, ແນວຄິດໜັກແໜ້ນ ແລະ ການຈັດຕັ້ງເຂັ້ມແຂງ; ເອົາໃຈໃສ່ຊີ້ນໍາວຽກງານກຽມພ້ອມສູ້ຮົບດ້ວຍການສືບຕໍ່ກໍ່ສ້າງ, ປັບປຸງກໍາລັງ, ລະບົບສູນບັນຊາ, ພາຫະນະ, ວຽກງານຮັບປະກັນ, ແຜນການກຽມພ້ອມສູ້ຮົບຕະຫຼອດ 24 ຊົ່ວໂມງ, ແຜນປະສານໃນການກອບກູ້ໄພພິບັດ, ແຜນ ການອື່ນທີ່ອາດເກີດຂຶ້ນ ເພື່ອສາມາດແກ້ໄຂສະພາບໄດ້ໃນທຸກກໍລະນີ. ໃນນີ້, ໃຫ້ເອົາ ໃຈໃສ່ປັບປຸງແຜນແມ່ບົດປ້ອງກັນກອງປະຊຸມສຸດຍອດອາຊຽນ ທີ່ຈະດໍາເນີນໃນປີນີ້ ແລະ ບັນຕາເຫດການດ້ານການເມືອງສໍາຄັນຕ່າງໆ ທີ່ຈະດໍາເນີນໃນຕໍ່ໜ້າໃຫ້ ມີຄວາມປອດໄພຮອບດ້ານ; ໃຫ້ເອົາໃຈໃສ່ກໍາແໜ້ນການເຄື່ອນໄຫວຂອງກຸ່ມຄົນບໍ່ດີກົນອຸບາຍມ້າງເພທໍາລາຍປະເທດເຮົາ ແລະ ກຳລັງພວກເຮົາ ເພື່ອຄົ້ນຄວ້າວາງແຜນຕອບຕ້ານໃຫ້ທັນເວລາ. ເອົາໃຈໃສ່ໃນການແກ້ໄຂ້ປະກົດການຫຍໍ້ທໍ້ໃນສັງຄົມຕາມແຜນການຂອງບັນດາສະຫາຍ ທີ່ໄດ້ກຳນົດໄວ້ນັ້ນ ໃຫ້ກາຍເປັນຂະບວນການທົ່ວສັງຄົມຢ່າງແທ້ຈິງ ຮັບປະກັນເຮັດໃຫ້ສັງຄົມມີຄວາມປອດໄພ ຮູ້ນໍາໃຊ້ວຽກງານວິຊາສະເພາະເຂົ້າໃນການສະກັດກັ້ນ, ຈຳກັດແກ້ໄຂບັນຫາໄພຕໍ່ ສັງຄົມ ແລະ ຄວາມໝັ້ນຄົງຂອງຊາດຢ່າງເດັດຂາດ, ມີຄວາມປອດໄພບໍ່ມີບັນຫາຫຍັງເກີດຂຶ້ນ.
ທັງໝົດນັ້ນ, ແມ່ນໜ້າວຽກຈໍານວນໜຶ່ງທີ່ພວກສະຫາຍຈະໄດ້ສຸມໃສ່ຈັດຕັ້ງປະຕິ ບັດໃນ ປີ 2024, ຫວັງວ່າບັນດາສະຫາຍ ຈະເຊີດຊູຄວາມຮັບຜິດຊອບ, ຕັ້ງໜ້າບຸກບືນ ເພື່ອຜ່ານຜ່າຂໍ້ຫຍຸ້ງຍາກ ແລະ ສິ່ງທ້າທາຍຕ່າງໆ, ເປັນເຈົ້າການ ແລະ ມີຄວາມຕັ້ງໜ້າໃນການແກ້ໄຂປະກົດການຫຍໍ້ທໍ້ຕ່າງໆ, ເອົາໃຈໃສ່ຈັດຕັ້ງຜັນຂະຫຍາຍບັນດາມະຕິ ທີ່ຄະນະພັກກະຊວງວາງອອກໃຫ້ມີຜົນສຳເລັດ.
ຂ່າວ: ຄຳໂຖ
