ໃນວັນທີ 14 ກຸມພາ 2024, ພົອ ວິໄລ ຫຼ້າຄໍາຟອງ ຮອງນາຍົກລັດຖະມົນຕີ ລັດຖະ ມົນຕີກະຊວງປ້ອງກັນຄວາມສະຫງົບ ແຫ່ງ ສປປ ລາວ ພ້ອມຄະນະ ໄດ້ຕ້ອນຮັບການເຂົ້າພົບປະຂອງ ພັອ ທະວີ ສອດສ່ອງ ລັດຖະມົນຕີກະຊວງຍຸຕິທໍາ ແຫ່ງຣາຊະອານາຈັກໄທ ພ້ອມຄະນະ, ໃນໂອກາດທີ່ເດີ່ນທາງມາຢ້ຽມຢາມ ແລະ ເຮັດວຽກຢູ່ ສປປ ລາວ.
ໂອກາດດັ່ງກ່າວ, ພົອ ວິໄລ ຫຼ້າຄຳຟອງ ໄດ້ສະແດງຄວາມຕ້ອນຮັບຢ່າງອົບອຸ່ນພ້ອມທັງຕີລາຄາສູງຕໍ່ການເຂົ້າຢ້ຽມຂ່ຳນັບໃນຄັ້ງນີ້. ພ້ອມດຽວກັນນີ້, ທັງສອງຝ່າຍກໍໄດ້ລາຍງານການແກ້ໄຂບັນຫາຢາເສບຕິດຢູ່ປະເທດຂອງຕົນໃຫ້ກັນແລະກັນຊາບ, ພ້ອມທັງແລກປ່ຽນບົດຮຽນ ແລະ ປຶກສາຫາລືກັນ ໃນການສະກັດກັ້ນ ແລະ ແກ້ໄຂບັນຫາຢາເສບຕິດລຽບຕາມຊາຍແດນ, ເຊິ່ງໃນໄລຍະຜ່ານມາ, ລາວ-ໄທ ກໍໄດ້ມີການຮ່ວມມືຊ່ວຍເຫຼືອເຊິ່ງກັນແລະກັນ ໃນການສະກັດກັ້ນບັນຫາດັ່ງກ່າວ.
ສຳລັບ ສປປ ລາວ ກໍໄດ້ຖືເອົາການແກ້ໄຂບັນຫາຢາເສບຕິດເປັນວາລະແຫ່ງຊາດ ຜ່ານການຈັດຕັ້ງປະຕິບັດແມ່ນສາມາດແກ້ໄຂໄດ້ຈຳນວນຫຼາຍ, ເພື່ອເປັນການສະກັດກັ້ນການຄ້າຂາຍຕາມຊາຍແດນລາວ-ໄທ ຕ້ອງໄດ້ເພີ່ມທະວີການຮ່ວມມືຊ່ວຍ ເຫຼືອເຊິ່ງກັນແລະກັນ ເປັນຕົ້ນການຝຶກອົບຮົມວຽກງານວິຊາສະເພາະ, ການຕິດ ຕາມເປົ້າໝາຍທີ່ເອົາຕົວຫຼົບໜີຂ້າມປະເທດ ແລະ ບັນຫາອື່ນໆ ກ່ຽວກັບການສະກັດກັ້ນແລະແກ້ໄຂບັນຫາຢາເສບຕິດ ເພື່ອເຮັດໃຫ້ສອງປະເທດລາວ-ໄທມີຄວາມສະ ຫງົບ ແລະ ເປັນຊາຍແດນແຫ່ງມິດຕະພາບປະຊາຊົນທັງສອງປະເທດ ສາມາດໄປມາຫາສູ່ກັນຢ່າງມີຄວາມສະຫງົບປອດໄພຖານ.
