ກອງປະຊຸມສະຫຼຸບວຽກງານປ້ອງກັນຄວາມສະຫງົບທົ່ວປະເທດ ປະຈໍາປີ 2023 ແລະ ວາງທິດທາງວຽກງານຈຸດສຸມປີ 2024 ໄດ້ຈັດຂຶ້ນໃນວັນທີ 4-5 ມັງກອນ 2024 ທີ່ສະໂມສອນກະຊວງປ້ອງກັນຄວາມສະຫງົບ ໂດຍການເປັນປະທານຂອງ ພົອ ວິໄລ ຫຼ້າຄໍາຟອງ ກໍາມະການກົມການເມືອງສູນກາງພັກ ຮອງນາຍົກລັດຖະມົນຕີ ລັດຖະມົນ ຕີກະຊວງ ປກສ, ມີບັນດາຮອງລັດ ຖະມົນຕີ, ຄະນະພັກ-ຄະນະບັນຊາກະຊວງ, ກົມໃຫຍ່, ຫ້ອງວ່າການກະຊວງ, ກົມ, ກອງບັນຊາການ, 3 ວິທະຍາຄານ, ປກສ. ນວ-ປກສ ແຂວງ ທົ່ວປະເທດ ພ້ອມດ້ວຍພະນັກງານຫຼັກແຫຼ່ງຂອງກຳລັງ ປກສ ເຂົ້າຮ່ວມ.
ພົອ ວິໄລ ຫຼ້າຄໍາຟອງ ມີຄຳເຫັນກ່າວເປີດວ່າ: ກອງປະຊຸມຄັ້ງນີ້ ແມ່ນນອນໃນທ່າມ ກາງທີ່ທົ່ວ ພັກ-ລັດ, ທົ່ວກຳລັງປະກອບອາວຸດ ແລະ ທົ່ວປວງຊົນລາວບັນດາເຜົ່າ ພວມສູ້ຊົນຜັນຂະຫຍາຍມະຕິກອງປະຊຸມໃຫຍ່ ຄັ້ງທີ 11 ຂອງພັກ ພ້ອມທັງກະ ກຽມຄວາມພ້ອມໃຫ້ແກ່ການດໍາເນີນກອງປະຊຸມໃຫຍ່ 3 ຂັ້ນຂອງພັກ ຕິດພັນກັບການສ້າງຜົນງານ, ຂະບວນການດ້ານຕ່າງໆ ເພື່ອຂໍ່ານັບຮັບຕ້ອນວັນສໍາຄັນຕ່າງໆຂອງຊາດ-ຂອງພັກ ແລະ ຂອງກຳລັງປ້ອງກັນຄວາມສະຫງົບປະຊາຊົນ ໂດຍສະເພາະ ວັນສ້າງຕັ້ງກຳລັງປ້ອງກັນຄວາມສະຫງົບປະຊາຊົນ ຄົບຮອບ 63 ປີ ໃຫ້ເປັນຂະບວນ ການຟົດຟື້ນ, ກວ້າງຂວາງ ພ້ອມນັ້ນ, ໄດ້ສຸມໃສ່ການສືບຕໍ່ຈັດຕັ້ງປະຕິບັດ 2 ວາລະແຫ່ງຊາດ ໂດຍສະເພາະວາລະແຫ່ງຊາດ ວ່າດ້ວຍການແກ້ໄຂບັນຫາຢາເສບຕິດ ດ້ວຍຄວາມເປັນເຈົ້າການຢ່າງຕັ້ງໜ້າ ເຊິ່ງໃນໄລຍະປີ 2023 ຜ່ານມາ ພາຍໃຕ້ການນໍາພາ-ຊີ້ນໍາ ຂອງຄະນະພັກ-ຄະນະບັນ ຊາ ກະຊວງ ກໍຄືຄະນະພັກ-ຄະນະບັນຊາແຕ່ລະຂັ້ນໃນການຈັດຕັ້ງປະຕິບັດແນວທາງຂອງພັກ, ລະບຽບການຄຸ້ມຄອງຂອງລັດ ແລະ ວຽກງານຈຸດສຸມຂອງກະຊວງ ປກສ ສາມາດຍາດໄດ້ຜົນສໍາເລັດຫຼາຍດ້ານ ຮັບປະກັນໃຫ້ສະພາບທົ່ວປະເທດມີຄວາມສະຫງົບ, ສະຖຽນບະພາບທາງດ້ານການເມືອງ ມີຄວາມໝັ້ນຄົງໜັກແໜ້ນ.
ຕໍ່ກັບຜົນສໍາເລັດດັ່ງກ່າວ ຍັງມີຫຼາຍບັນຫາ, ຫຼາຍຂົງເຂດທີ່ກ່ຽວຂ້ອງກັບໜ້າທີ່ການເມືອງທີ່ຈະຕ້ອງໄດ້ເອົາໃຈໃສ່ແກ້ໄຂ, ປັບ ປຸງໃຫ້ດີຂຶ້ນ ເປັນຕົ້ນວຽກງານປ້ອງກັນຄວາມສະຫງົບທາງດ້ານການເມືອງ ແລະ ຄວາມເປັນລະບຽບຮຽບຮ້ອຍໃນສັງຄົມ, ວຽກງານກໍ່ສ້າງພັກ-ກໍ່ສ້າງກຳລັງປ້ອງກັນຄວາມສະຫງົບປະຊາຊົນ, ວຽກງານຮັບ ປະກັນດ້ານພະລາທິການ-ເຕັກນິກ, ວຽກ ງານພົວພັນຕ່າງປະເທດ ແລະ ບັນດາວຽກງານອື່ນໆ.
ສະນັ້ນ, ກອງປະຊຸມຄັ້ງນີ້ ຈະໄດ້ສຸມໃສ່ສະຫຼຸບຕີລາຄາການນໍາພາ-ຊີ້ນໍາ ຂອງຄະນະບໍລິຫານງານພັກກະຊວງ, ຮັບຟັງການ ລາຍງານ, ການປະກອບຄໍາເຫັນຂອງບັນດາກົມໃຫຍ່, ຫ້ອງວ່າການ, ກົມກອງວິຊາສະເພາະ ແລະ ກົມກອງທ້ອງຖິ່ນ ເພື່ອຄວາມເປັນເອກະພາບໃນການຕີລາຄາສະພາບການຮອບດ້ານໃນການປະຕິບັດໜ້າທີ່ການເມືອງ; ມີຄວາມຮັບຜິດຊອບໃນການເບິ່ງບັນຫາໃຫ້ຖືກກັບຄວາມເປັນຈິງ, ຍົກໃຫ້ເຫັນອັນທີ່ເຮັດໄດ້, ອັນທີ່ເປັນບົດຮຽນ ແລະ ສິ່ງຫຍໍ້ທໍ້ຄົງຄ້າງຕ່າງໆ ກໍຄືການແກ້ໄຂບັນຫາຕົວຈິງໃຫ້ຖືກຕ້ອງ, ທັນສະພາບການ ແລະ ຮັບປະກັນໃຫ້ການກຳນົດແຜນວຽກງານຈຸດສຸມໃນຕໍ່ໜ້າ ແທດເໝາະກັບສະພາບແວດລ້ອມຕົວຈິງຂອງກຳລັງປ້ອງກັນຄວາມສະຫງົບປະຊາຊົນ.
ໂອກາດນີ້, ພົອ ວິໄລ ຫຼ້າຄໍາຟອງ ຮຽກຮ້ອງມາຍັງຄະນະພັກ-ຄະນະນຳກະຊວງ ຕະ ຫຼອດຮອດພະນັກງານຫຼັກແຫຼ່ງຂອງກຳລັງ ປກສ ທີ່ເຂົ້າຮ່ວມກອງປະຊຸມ ຈົ່ງຍົກສູງຄວາມຮັບຜິດຊອບ, ສຸມສະຕິປັນຍາເຂົ້າໃນການຄົ້ນຄວ້າ ແລະ ປະກອບຄຳເຫັນໃສ່ເນື້ອໃນກອງປະຊຸມເທື່ອນີ້ໃຫ້ມີຄວາມເປັນເອກະພາບຮອບດ້ານໃນການຕີລາຄາວຽກງານການເມືອງໃຫ້ມີຜົນສຳ ເລັດຢ່າງດີ.
