ໃນວັນທີ 4 ມັງກອນ 2024, ພົຕ ຄໍາກິ່ງ ຜຸຍຫຼ້າມະນີວົງ ຮອງລັດຖະມົນຕີ ຫົວໜ້າກົມໃຫຍ່ຕໍາຫຼວດ ກະຊວງ ປກສ ໄດ້ຊີ້ ແຈງຕອບຄໍາຊັກຖາມຕໍ່ກອງປະຊຸມສະຫຼຸບວຽກງານປ້ອງກັນຄວາມສະຫງົບທົ່ວປະເທດ ປະຈໍາປີ 2023 ແລະ ວາງທິດທາງວຽກງານຈຸດສຸມປີ 2024 ກ່ຽວ ກັບການແກ້ໄຂຄະດີໃຫ້ມີຄວາມວ່ອງໄວ, ຖືກຕ້ອງ, ຊັດເຈນ, ເປັນທໍາໂດຍຈະສຸມໃສ່ປັບປຸງບາງວຽກງານ ເພື່ອຮັບປະກັນໃນການແກ້ໄຂຄະດີດັ່ງກ່າວໄດ້ຮັບການຈັດຕັ້ງປະຕິບັດດີຂຶ້ນກວ່າເກົ່າ.
ພົຕ ຄໍາກິ່ງ ຜຸຍຫຼ້າມະນີວົງ ກ່າວວ່າ: ການແກ້ໄຂຄະດີໃຫ້ມີຄວາມວ່ອງໄວ, ຖືກຕ້ອງ, ຊັດເຈນ, ເປັນທໍາ ເປັນວຽກງານໜຶ່ງທີ່ສໍາຄັນຂອງກໍາ ລັງປ້ອງກັນຄວາມສະຫງົບ, ພົວພັນໂດຍກົງເຖິງສິດຜົນປະໂຫຍດຂອງ ທົ່ວສັງຄົມ; ໃນປີຜ່ານມາ, ກໍາລັງຕໍາຫຼວດຢູ່ສູນກາງ ແລະ ທ້ອງຖິ່ນແມ່ນໄດ້ມີຄວາມຕັ້ງໜ້າພະຍາຍາມ ເຄື່ອນໄຫວເຮັດໜ້າ ທີ່ການເມືອງ ຂອງຕົນໄດ້ເປັນຢ່າງດີ, ຮັບປະກັນ ການປະຕິບັດແນວທາງຂອງພັກ, ກົດໝາຍຂອງລັດ ແລະ ຫຼັກການວິຊາສະເພາະເຂົ້າໃນການແກ້ໄຂ ຄະດີໃຫ້ມີຄວາມວ່ອງໄວ, ຖືກ ຕ້ອງ, ຊັດເຈນ ແລະ ເປັນທໍາ; ເຊີ່ງການຈັດຕັ້ງປະຕິບັດແກ້ໄຂ ຄະດີຂອງອົງການສືບສວນ-ສອບ ສວນ ເຈົ້າໜ້າທີ່ຕໍາຫຼວດແມ່ນປະ ຕິບັດຕາມລະບຽບການ ແລະ ປະ ຕິບັດຕາມຂັ້ນຕອນຂອງກົດໝາຍ ແຕ່ເຫັນວ່າຍັງຫຼາຍສາເຫດ ແລະ ປັດໄຈ ເຮັດໃຫ້ການແກ້ໄຂຄະດີບາງກໍລະນີຍັງບໍ່ທັນມີຄວາມວ່ອງໄວ, ຍັງບໍ່ທັນຖືກຕ້ອງກັບຄວາມ ເປັນຈີງ, ຍັງບໍ່ທັນຊັດເຈນທາງດ້ານ ຂໍ້ມູນຫຼັກຖານ, ດັ່ງນັ້ນແຕ່ເພື່ອຮັບ ປະກັນໃນການແກ້ໄຂຄະດີໃຫ້ມີ ຄວາມວ່ອງໄວ, ຖືກຕ້ອງ, ຊັດ ເຈນ, ເປັນທໍາ ກົມໃຫຍ່ຕໍາຫຼວດ ຈະໄດ້ສຸມໃສ່ປັບປຸງບາງວຽກງານດັ່ງນີ້:
1. ສຸມໃສ່ປັບປຸງພາຍໃນກໍາລັງຕໍາຫຼວດທີ່ເຮັດໜ້າທີ່ວິຊາສະ ເພາະໃນການດໍາເນີນຄະດີໃຫ້ມີ ຄວາມເຂັ້ມແຂງກວ່າເກົ່າ ໂດຍ ແນໃສ່ຍົກສູງວຽກງານສຶກສາອົບ ຮົບນໍາພາການເມືອງ-ແນວຄິດ ໃຫ້ ນາຍ ແລະ ພົນຕໍາຫຼວດມີທັດສະນະຫຼັກໜັ້ນຊົນຊັ້ນຈະແຈ້ງ, ການ ເມືອງໜັກແໜ້ນ, ເປັນກໍາລັງຕໍາຫຼວດຈົ່ງຮັກພັກດີຕໍ່ພັກ-ຕໍ່ປະຊາ ຊົນ, ມີສະຕິຕໍ່ການຈັດຕັ້ງ ແລະ ສະຕິເຄົາລົບລະບຽບກົດໝາຍ ເຂັ້ມງວດ, ມີຄວາມຮັບຜິດຊອບຕໍ່ໜ້າທີການເມືອງທີ່ໄດ້ຮັບການ ມອບໝາຍ;
2. ສຸມໃສ່ປັບປຸງແບບແຜນ ວິທີເຮັດວຽກງານ ແລະ ການນໍາ ພາບັນຊາໃຫ້ເຂັ້ມແຂງ, ເດັດຂາດ ແລະ ຫັນເປັນມືອາຊີບ, ມີການ ປຶກສາຫາລືເປັນໜູ່ຄະນະ, ຕົກລົງບັນຫາເປັນມະຕິ, ມີຄວາມເອ ກະພາບຢູ່ພາຍໃນສູງ, ສາມັກຄີ ໜັກແໜ້ນພ້ອມ ກັນເຮັດ ແລະ ເປັນເຈົ້າການປະຕິບັດສໍາເລັດວຽກງານທີ່ໄດ້ຮັບການມອບໝາຍ.
3. ຍູ້ແຮງວຽກງານສະກັດ ກັ້ນ ໂດຍສຸມໃສ່ໂຄສະນາດ້ວຍຫຼາຍຮູບຫຼາຍສີ, ຫຼາຍວິທີການ ເພື່ອນໍາເອົາເນື້ອໃນສໍາຄັນຂອງວຽກ ງານສະກັດກັ້ນໃຫ້ເຂົ້າເຖີງກຸ່ມເປົ້າ ໝາຍ, ກໍານົດສະຖານທີ່, ກໍານົດເວລາ, ເຮັດຢ່າງຕໍ່ເນື່ອງ ເນື່ອງຈາກວ່າການໂຄສະ ນານີ້ເປັນວຽກງານສະກັດກັ້ນທີ່ດີທີ່ສຸດ.
4. ເອົາໃຈໃສ່ປັບປຸງວຽກງານສືບຄົ້ນຫາ, ກໍາແໜ້ນສະພາບເລ້ລ່ຽມ ແລະ ເປົ້າໝາຍຢາກເຮັດໄດ້ ແນວນັ້ນຕ້ອງໄດ້ອອກແຮງປັບປຸງວຽກງານສືບສວນຂັ້ນພື້ນຖານໃຫ້ດີ ໂດຍສຸມໃສ່ສ້າງພື້ນຖານ, ເພື່ອນຮ່ວມງານ ແລະ ສ້າງກໍາລັງແຮງຂອງສັງຄົມໃຫ້ເປັນຫູເປັນຕາ, ຕ້ອງໃຫ້ຖືກຫຼັກການ, ມີຄວາມລັບ, ມີປະສິດທິຜົນ ແລະ ເຈືອຈານຢູ່ທຸກພື້ນທີ່, ການດໍາເນີນແກ້ ໄຂຄະດີຕ້ອງເຮັດຢ່າງຮັດກຸມ, ມີຂໍ້ມູນຫຼັກຖານຫຼັກແໜ້ນ, ບັງຄັບໃຊ້ກົດໝາຍຄ່ຽງຄູ່ກັບຫຼັກການວິຊາສະເພາະໃຫ້ເຂັ້ມງວດ ແລະ ຮັບປະກັນຄວາມຍຸຕິທໍາ.
5. ສຸມໃສ່ປັບປຸງວຽກງານກໍາ ແໜ້ນເປົ້າໝາຍ ໂດຍເນັ້ນໃສ່ຄົ້ນຄວ້າ, ກວດກາ, ຂຶ້ນບັນຊີເປົ້າໝາຍ, ແຍກເປົ້າໝາຍອອກເປັນແຕ່ລະປະເພດ ເພື່ອກໍາແໜ້ນຜູ້ທີ່ເປັນຫົວໂປ່ໂຕການ, ຜູ້ບັນຊາ, ຜູ້ກະທໍາຜິດຕົວຈິງ. ຢາກເຮັດໄດ້ແນວນັ້ນ, ຕ້ອງກໍາແໜ້ນປະຫັວດ, ພາຍພົວພັນສັງຄົມ, ສາຍພົວພັນຄອບຄົວ, ທີ່ຢູ່ອາໃສ, ການກະທໍາຜິດຕ່າງໆ ຜ່ານມາ ແລະ ອື່ນໆໃຫ້ລະອຽດຈະແຈ້ງ, ແຍກເປັນແຕ່ລະປະເພດ, ເປັນແຕ່ລະກໍລະນີ ແລະ ສ້າງເປັນລາຍຄະດີສະເພາະຕໍ່ເປົ້າໝາຍທີ່ເປັນຫົວໂປ່ໂຕການ ເພື່ອຄຸ້ມຄອງ, ຕິດຕາມເປົ້າໝາຍ ແລະ ກ້າວໄປເຖີງມີວິທີການແກ້ໄຂຢ່າງເໝາສົມ.
6. ສຸມໃສ່ປັບປຸງການແກ້ໄຂ ຄະດີໃຫ້ມີຄວາມວ່ອງໄວ, ຖືກ ຕ້ອງ, ຊັດເຈນ, ເປັນທໍາ ແລະ ວີທີແກ້ໄຂບັນຫາລົດເສຍ. ຢາກເຮັດໄດ້ແນວນັ້ນຕ້ອງປະຕິບັດຕາມກົດໝາຍ ແລະ ຫຼັກການວິຊາສະເພາະຢ່າງເຂັ້ມງວດ. ວຽກງານນີ້, ນາຍ ແລະ ພົນຕໍາຫຼວດທີ່ຮັບຜິດຊອບຄະດີເປັນສິ່ງທີ່ຕັດສິນໃຈຕໍ່ໄຊຊະນະ ແລະ ປະລາໄຊ ຂອງການດໍາເນີນຄະດີ.
ສະນັ້ນ ຕ້ອງໄດ້ແຕ່ງຕັ້ງຄະນະຮັບຜິດຊອບດໍາເນີນເປັນແຕ່ລະຄະດີ, ມີຜູ້ຊີ້ນໍາ ແລະ ມີຜູ້ປະຕິບັດຕົວຈີງ, ມີແຜນການດໍາເນີນຄະດີ, ມີງົບປະມານ, ມີພາຫະນະຮັບໃຊ້ໃຫ້ພຽງພໍ, ມີ ແຜນການແກ້ໄຂເປົ້າໝາຍກະທໍາ ຜິດ, ຖ້າຈັບມາແລ້ວກໍ່ຮີບຮ້ອນ ສອບສວນ ເພື່ອຂະຫຍາຍຜົນ ຫາກຸ່ມແກ້ງ, ຜູ້ຮ່ວມກະທໍາຜິດ, ຈໍາແນກຜູ້ເປັນຫົວໂປ່ໂຕການ, ຜູ້ ກໍ່ເຫດ ແລະ ອື່ນໆຕາມຫຼັກການ ວິຊາສະເພາະ. ຖ້າເຫັນວ່າຄະດີຈະແຈ້ງແລ້ວກໍຮີບຮ້ອນສະຫຼຸບຄະດີຕາມກົດໝາຍ. ສ່ວນກົນໄກຮັບຄໍາຮ້ອງຟ້ອງນັ້ນ, ຖ້າເປັນໄປໄດ້ກໍຢາກໃຫ້ພິຈາລະນາແກ້ໄຂຂອດຮັບຄໍາຮ້ອງຟ້ອງຈາກປະຕູດຽວໄປຫາກົມວິຊາສະເພາະໂດຍກົງ.
