ໃນວັນທີ 5 ທັນວາ 2023 ນີ້, ທ່ານ ເວືອງ ດິ້ງ ເຫວະ ປະທານສະພາແຫ່ງຊາດ ແຫ່ງ ສສ ຫວຽດນາມ ພ້ອມຄະນະໄດ້ເດີນທາງມາຢ້ຽມຢາມວິທະຍາຄານການເມືອງ ປກສ, ໃນໂອກາດທີ່ເດີນທາງມາເຂົ້າຮ່ວມກອງປະຊຸມວຽກງານປ້ອງກັນຊາດ-ປ້ອງກັນຄວາມສະຫງົບຂອງລັດຖະບານກຳປູເຈຍ-ລາວ-ຫວຽດນາມ, ໂດຍການຕ້ອນຮັບຂອງພົນໂທ ກົງທອງ ພົງວິຈິດ ກໍາມະການສູນກາງພັກ ຮອງລັດຖະມົນຕີ ກະຊວງ ປກສ, ມີເອກອັກຄະລັດຖະທູດ ຜູ້ມີອຳນາດເຕັມແຫ່ງ ສສ ຫວຽດນາມ ປະຈຳ ສປປ ລາວ, ມີຄະນະກຳມາທິການສະພາແຫ່ງຊາດ ສສ ຫວຽດນາມ, ພ້ອມດ້ວຍການນໍາກະຊວງ ປກສ, ຄະນະອໍານວຍການ, ພະນັກງານ ຄູ-ອາຈານ ແລະ ນັກສຶກສາວິທະຍາຄານ ການເມືອງ ປກສ ເຂົ້າຮ່ວມ.
ໃນໂອກາດມາຢ້ຽມຢາມຄັ້ງນີ້, ປະທານສະພາແຫ່ງຊາດ ພ້ອມຄະນະຍັງໄດ້ວາງກະຕ່າດອກໄມ້ຕໍ່ໜ້າຮູບປັ້ນຫຼ່ໍ ປະທານ ໄກສອນ ພົມວິຫານ, ປູກຕົ້ນໄມ້ ແລະ ຮັບຊົມພາບມູນເຊື້ອວິທະຍາຄານ; ຈາກນັ້ນ, ໃນພິທີ, ພັອ ຊາຍຄອງ ເພັດຊະວົງ ອໍານວຍການວິທະຍາຄານການເມືອງ ປກສ ໄດ້ລາຍງານຫຍໍ້ປະຫວັດຂອງການສ້າງຕັ້ງວິທະຍາ ຄານການເມືອງ ປກສ ວ່າ: ເພື່ອເປັນການຍົກລະດັບຄວາມຮູ້ທາງດ້ານທິດສະດີການເມືອງຂອງກຳລັງປ້ອງກັນຄວາມສະຫງົບ ໃຫ້ສູງຂຶ້ນໃນສະເພາະໜ້າ ແລະ ຍາວນານ ມີຄວາມຈໍາເປັນຕ້ອງໄດ້ຍົກລະດັບເປັນວິທະຍາຄານການເມືອງປ້ອງກັນຄວາມສະຫງົບ ແລະ ມີຄວາມຈຳ ເປັນຕ້ອງໄດ້ກໍ່ສ້າງລະບົບພື້ນຖານໂຄງລ່າງຂອງວິທະຍາຄານ ລັດຖະມົນຕີກະຊວງປ້ອງກັນຄວາມສະຫງົບ ຈຶ່ງໄດ້ອອກຂໍ້ຕົກ ລົງວ່າດ້ວຍການອະນຸ ມັດຍົກຖານະໂຮງຮຽນທິດສະດີການເມືອງປ້ອງກັນຄວາມສະຫງົບ ເປັນວິທະຍາຄານປ້ອງກັນຄວາມສະຫງົບ ແລະ ດຳລັດຂອງນາຍົກລັດຖະມົນຕີ ວ່າດ້ວຍການອະນຸມັດສ້າງຕັ້ງວິທະຍາຄານການເມືອງປ້ອງກັນຄວາມສະຫງົບ ໂດຍໄດ້ຮັບການຊ່ວຍເຫຼືອລ້າ 100% ຈາກລັດຖະບານ ສສ ຫວຽດນາມ, ນໍາໃຊ້ເນື້ອທີ່ທັງໝົດ 6,5 ເຮັກຕາຢູ່ບ້ານໂນນສະ ອາດ ເມືອງໄຊທານີ ນະຄອນຫຼວງວຽງຈັນ ໂດຍສ້າງໃຫ້ເປັນວິທະຍາຄານກິນ-ນອນ ອອກແບບອາຄານໃຫ້ສອດຄ່ອງກັບລະ ບົບການສຶກສາທີ່ປະກອບດ້ວຍສິ່ງອໍານວຍຄວາມສະດວກຕ່າງໆ ເປັນຕົ້ນສວນສາທາລະນະ, ສະໜາມກິລາ, ສະຖານທີ່ທຳການຜະລິດ ເພື່ອເປັນບ່ອນຈັດກິດຈະກຳຂອງນັກສຶກສານອກໂມງຮຽນ, ເປັນສະຖານທີ່ສໍາລັບການພັດທະນາຂອງນັກສຶກສາທາງດ້ານສະໝອງ ແລະ ສຸຂະພາບ ສາມາດຮອງຮັບນັກສຶກສາໄດ້ ຈຳນວນ 1.200 ຄົນ ແລະ ພະນັກງານ ຄູ-ອາຈານ ຈຳ ນວນ 150 ຄົນ; ເຊິ່ງໄດ້ວາງສີລາລຶກໃນວັນທີ 25 ສິງຫາ 2022, ເປັນກຽດເຂົ້າຮ່ວມໂດຍ ສະຫາຍ ພົນເອກ ວິໄລ ຫຼ້າຄຳຟອງ ກຳມະການກົມການເມືອງສູນກາງພັກ, ຮອງນາຍົກລັດຖະມົນຕີ ລັດຖະມົນຕີກະຊວງປ້ອງກັນຄວາມສະຫງົບ ແຫ່ງ ສປປ ລາວ, ສະຫາຍ ພົນເອກ ສຈ. ປອ ໂຕ ເລີ້ມ ກຳມະການກົມການເມືອງສູນກາງພັກກອມມູນິດ ຫວຽດນາມ ລັດຖະ ມົນຕີ ກະຊວງປ້ອງກັນຄວາມສະຫງົບ ແຫ່ງ ສສ ຫວຽດນາມ; ຈົນມາຮອດວັນທີ 1 ມັງກອນ 2023, ໄດ້ມີການລົງມືກໍ່ສ້າງວິທະຍາຄານການເມືອງປ້ອງກັນຄວາ ສະຫງົບ ຢ່າງເປັນທາງການ.
ມາຮອດປັດຈຸບັນ, ວິທະຍາຄານການເມືອງປ້ອງກັນຄວາມສະຫງົບ ໄດ້ຮັບນັກສຶກສາ ລະບົບປະລິນຍາຕີ ຮຸ່ນທີ 1 ແລະ ລະ ບົບອານຸປະລິນຍາ ຮຸ່ນທີ 17, ເຊິ່ງມີນັກສຶກສາທັງໝົດ 144 ສະຫາຍ ຍິງ 20 ສະຫາຍ; ສໍາລັບນັກສຶກສາອານຸປະລິນຍາ ຮຸ່ນທີ 17 ແມ່ນລົງເກັບກາຂໍ້ມູນຂຽນບົດປ້ອງກັນຈົບຊັ້ນ; ສະເພາະນັກສຶກສາລະບົບປະລິນຍາຕີ ຮຸ່ນທີ 1 ແມ່ນກໍາລັງຮຽນ ປະ ກອບມີ 3 ສາຂາຄື: ສາຂາການເມືອງ, ສາຂາການບັນຊາ ແລະ ສາຂາເສດຖະສາດການເມືອງ. ສຳລັບຄູ-ອາຈານ ແມ່ນໄດ້ເອົາໃຈໃສ່ແຕ່ງບົດສອນ, ຂຶ້ນຫ້ອງສິດສອນ, ສຳມະນາ ແລະ ສອບເສັງຢ່າງເປັນປົກກະຕິ.
ນອກຈາກນີ້, ວິທະຍາຄານການເມືອງ ປກສ ແຫ່ງ ສປປ ລາວ ຍັງໄດ້ຮັບຕຳລາການຮຽນ-ການສອນວິຊາກໍ່ສ້າງພັກ ແລະ ອຳ ນາດລັດ ຈາກວິທະຍາຄານການເມືອງປ້ອງ ກັນຄວາມສະຫງົບ ສສ ຫວຽດນາມ; ປັດຈຸບັນ, ກຳລັງຮຽບຮຽງແປເປັນພາສາລາວ.
ຂ່າວ: ຈັນສະໝອນ
