ຄະນະກໍາມະການຄຸ້ມຄອງອິນເຕີເນັດແຫ່ງຊາດ (ຄຄອຊ) ໄດ້ຈັດກອງປະຊຸມສະຫຼຸບວຽກງານ ປະຈຳປີ 2023 ແລະ ວາງທິດ ທາງແຜນການ ປະຈຳປີ 2024 ໃນ ວັນທີ 22 ພະຈິກ 2023, ເປັນປະ ທານໂດຍ ພົອ ວິໄລ ຫຼ້າຄຳຟອງ ຮອງນາຍົກລັດຖະ ມົນຕີ ລັດຖະມົນຕີກະຊວງ ປກສ ປະທານ ຄຄອຊ, ມີລັດຖະມົນຕີກະຊວງ ເຕັກໂນໂລຊີ ແລະ ການສື່ສານ, ຮອງປະທານ-ຜູ້ປະຈຳການ, ພ້ອມດ້ວຍບັນດາທ່ານຮອງລັດຖະມົນ ຕີ, ຄະນະ ຄຄອຊ, ບັນດາທ່ານຮອງເຈົ້າແຂວງ, ຫົວໜ້າ-ຮອງຫົວໜ້າຫ້ອງວ່າການ, ຫົວໜ້າ-ຮອງ ຫົວໜ້າກົມ ແລະ ຕາງໜ້າຈາກບັນດາກະຊວງ, ອົງການທຽບເທົ່າຢູ່ສູນ ກາງ ແລະ ບັນດາອົງ ການປົກຄອງທ້ອງຖິ່ນ, ລວມທັງບັນດາອົງການພັກ, ແນວລາວສ້າງຊາດ, ອົງການຈັດຕັ້ງມະຫາຊົນ ເຂົ້າຮ່ວມ.
ໃນກອງປະຊຸມ, ທ່ານ ມີນາໄຊ ພິລາວົງ ຫົວໜ້າສູນອິນເຕີເນັດແຫ່ງຊາດ ກະຊວງເຕັກໂນໂລຊີ ແລະ ການສື່ສານ ທັງເປັນຫົວໜ້າຫ້ອງການກອງເລຂາ ຄຄອຊ ໄດ້ ລາຍງານກ່ຽວກັບການຈັດຕັ້ງວຽກງານ ຄຄອຊ ໃນໄລຍະປີ 2023 ທີ່ຜ່ານມາ ແລະ ທິດທາງແຜນການ ໃນປີ 2024, ເຊິ່ງທ່ານໄດ້ຍົກໃຫ້ເຫັນຜົນສຳເລັດຫຼາຍດ້ານທີ່ຕິດ ພັນກັບການຄຸ້ມຄອງ, ການພັດທະນາ ແລະ ການນໍາໃຊ້ອິນເຕີເນັດ, ເຕັກໂນໂລຊີການສື່ສານຂໍ້ມູນຂ່າວສານ, ການພັດທະນາຂົງເຂດດັ່ງກ່າວເຂົ້າໃນການຈັດຕັ້ງປະ ຕິບັດວຽກງານ, ການດຳເນີນທຸລະກິດ, ການດຳລົງຊີວິດ, ການຕິດຕໍ່ພົວພັນຂອງສັງຄົມຕ່າງໆ, ຍິ່ງເຫັນໄດ້ແຈ້ງເຖິງຄວາມສໍາຄັນ ແລະ ຄວາມຈຳເປັນຂອງອິນເຕີເນັດ.
ຄຽງຄູ່ກັບຜົນປະໂຫຍດອັນມະຫາສານຈາກອິນເຕີເນັດ, ພວກເຮົາກໍເຫັນໄດ້ແຈ້ງບັນຫາ ແລະ ສິ່ງທ້າທາຍຕ່າງໆ ໂດຍສະ ເພາະແມ່ນການນໍາໃຊ້ສື່ສັງຄົມອອນລາຍ ແລະ ການນຳໃຊ້ອິນເຕີເນັດ ໄປໃນທາງທີ່ບໍ່ດີ, ເຊິ່ງບັນດາສະຫາຍໃນ ຄຄອຊ ກໍໄດ້ຊີ້ນຳພາກສ່ວນທີ່ກ່ຽວຂ້ອງສຸມໃສ່ຄົ້ນຄວ້າຫາວິທີການແກ້ໄຂດ້ວຍມາດຕະການຕ່າງໆ ເພື່ອແກ້ໄຂປະກົດການຫຍໍ້ທໍ້ທີ່ເກີດ ຂຶ້ນ.
ຜ່ານມາພວກເຮົາກໍສາມາດຈຳກັດ ແລະ ມີຜົນສຳເລັດໃນເບື້ອງຕົ້ນທີ່ສຳຄັນບໍ່ວ່າຈະເປັນຂົງເຂດລວມສູນການສື່ສານ, ການກວດກາຄື້ນຄວາມຖີ່ວິທະຍຸສື່ສານ, ການນຳໃຊ້ສັນຍານ-ການນຳໃຊ້ສາຍສົ່ງໂທລະຄົມມະນາຄົມ, ການສຸມໃສ່ຂຶ້ນທະບຽນເລກໝາຍໂທລະສັບ, ການປັບປຸງພື້ນຖານໂຄງລ່າງດິຈິຕອນ, ການຄຸ້ມຄອງຄວາມປອດໄພທາງດ້ານໄຊເບີ, ເນື້ອໃນຂໍ້ມູນຂ່າວສານຜ່ານອິນເຕີເນັດ ແລະ ດ້ານອື່ນໆ.
ໂອກາດດຽວກັນ, ພົອ ວິໄລ ຫຼ້າຄຳຟອງ ໄດ້ມີຄໍາເຫັນຊີ້ນຳຕໍ່ກັບການສະຫຼຸບລາຍງານ, ທິດທາງແຜນການ ແລະ ຂໍ້ສະເໜີຕ່າງໆ ໃນການຈັດຕັ້ງປະຕິບັດບັນດາວຽກງານໃນຕໍ່ໜ້າ, ໂດຍໄດ້ຕີລາຄາສູງຕໍ່ການຄົ້ນຄວ້າ, ການກຳນົດບັນດາເປົ້າໝາຍທີ່ມີຄວາມສຳຄັນ ແລະ ຈຳເປັນທີ່ຈະຕ້ອງຄຸ້ມຄອງ ແລະ ພັດທະນາວຽກງານອິນເຕີເນັດ, ເຊິ່ງກໍແມ່ນວຽກງານຂອງທຸກພາກ ສ່ວນທີ່ຈະຕ້ອງໄດ້ສົມທົບກັນຢ່າງແໜ້ນແຟ້ນ ແລະ ກົມກຽວ ເພື່ອເຮັດໃຫ້ອິນເຕີເນັດ ແລະ ເຕັກໂນໂລຊີດິຈິຕອນ ສາມາດປະກອບ ສ່ວນໃນພາລະກິດປົກປັກຮັກສາ ແລະ ສ້າງສາພັດທະນາປະເທດຊາດທັງຕິດພັນກັບ 2 ວາລະແຫ່ງຊາດ ຄື: ການແກ້ໄຂບັນຫາຢາເສບຕິດ ແລະ ການແກ້ໄຂຄວາມຫຍຸ້ງ ຍາກທາງດ້ານເສດຖະກິດ-ການເງິນ, ພ້ອມທັງຊຸກຍູ້ການຫັນເປັນດິຈິຕອນ ໂດຍລວມຂອງຊາດເຮົາ. ໃນນັ້ນ, ນອກຈາກສືບຕໍ່ຕາມແຜນທີ່ໄດ້ກຳນົດໄວ້ແລ້ວ, ທ່ານຍັງໄດ້ ເນັ້ນໜັກໃຫ້ເອົາໃຈໃສ່ບາງບັນຫາ ເປັນຕົ້ນແມ່ນການຄົ້ນຄວ້າປັບປຸງພາລະບົດບາດຂອງ ຄຄອຊ ເພື່ອບໍ່ໃຫ້ທັບຊ້ອນກັບຄະນະກຳມະການລະ ດັບຊາດ ເພື່ອການຫັນເປັນດິຈິຕອນ ຂອງ ສປປ ລາວ; ການປັບປຸງ ແລະ ສ້າງບັນດາຈຸດປະສານງານ ຄຄອຊ ຢູ່ແຕ່ລະກະ ຊວງ, ອົງການພັກ-ລັດ ແລະ ບັນດາຄະນະກໍາມະການຄຸ້ມຄອງອິນເຕີເນັດແຫ່ງຊາດຂັ້ນແຂວງ; ເອົາໃຈໃສ່ຄົ້ນຄວ້າ ແລະ ປັບ ປຸງບັນດານິຕິກຳທີ່ມີແລ້ວ, ນິຕິກໍາໃດຄວນໄດ້ປັບປຸງຄືນເພື່ອໃຫ້ສອດຄ່ອງກັບສະພາບການໃໝ່ໃນປັດຈຸ ບັນ ເປັນຕົ້ນດໍາລັດ ວ່າດ້ວຍການຄຸ້ມຄອງຂໍ້ມູນຂ່າວສານຜ່ານອິນເຕີເນັດ, ສ້າງຮ່າງຍຸດທະສາດການພັດທະນາໂທລະຄົມມະນາຄົມ ແລະ ອິນເຕີເນັດແຫ່ງຊາດ, ຮ່າງ ຍຸດ ທະສາດຄວາມປອດໄພໄຊເບີແຫ່ງຊາດ ເພື່ອເປັນບ່ອນອີງໃຫ້ວຽກງານຄຸ້ມຄອງອິນເຕີເນັດ ແລະ ຄວາມປອດໄພທາງໄຊເບີຢ່າງຄົບຖ້ວນ, ຮັດກຸມ ແລະ ແທດເໝາະກັບ ສະພາບການໃນແຕ່ລະໄລຍະປັດຈຸບັນ; ເພີ່ມທະວີ ແລະ ປັບປຸງວຽກງານຕິດຕາມ ກວດກາ ແລະ ຕອບໂຕ້ຫາງສຽງບໍ່ດີໃນສັງຄົມ ໃຫ້ເຂັ້ມແຂງ ແລະ ມີປະສິດທິພາບກວ່າເກົ່າ; ເຊິ່ງໃນນີ້ບັນຫາເກີດຂຶ້ນຢູ່ບ່ອນໃດ, ບ່ອນນັ້ນຕ້ອງສະໜອງຂໍ້ມູນໃຫ້ສໍານັກຂ່າວທາງການ ແລະ ອອກຖະແຫຼງຂ່າວທີ່ຖືກ ຕ້ອງໃຫ້ສັງຄົມຮັບຊາບຢ່າງທັນການ; ເພີ່ມທະວີການຄຸ້ມຄອງຜູ້ໃຫ້ບໍລິການໂທລະຄົມມະນາຄົມ ແລະ ອິນເຕີເນັດ, ເລັ່ງຈັດ ຕັ້ງປະຕິບັດການລົງທະບຽນເລກໝາຍໂທລະສັບໃຫ້ສໍາເລັດຕາມ ແຜນ ການ ໃນວັນທີ 16 ທັນວາ 2023 ໂດຍໄວ; ເລັ່ງສ້າງກອງທຶນພັດທະນາໂທລະຄົມມະ ນາຄົມ ແລະ ອິນເຕີເນັດ ເພື່ອເປັນບ່ອນສະໜອງງົບປະມານໃນການຄຸ້ມຄອງ ແລະ ພັດ ທະນາໂທລະຄົມມະນາຄົມ ແລະ ອິນເຕີເນັດ. ເລັ່ງຂະຫຍາຍລະບົບໂທລະຄົມມະ ນາຄົມ ແລະ ອິນເຕີເນັດ ໄປສູ່ເຂດຫ່າງ ໄກສອກຫຼີກ, ປັບປຸງໂຄງສ້າງອັດຕາລາຄາໂທລະຄົມມະນາຄົມ ແລະ ອິນເຕີເນັດ, ມີອັດຕາລາຄາພິເສດ ເພື່ອໃຫ້ອົງການພັກ-ລັດ, ນັກຮຽນ-ນັກສຶກສາ ແລະ ປະຊາຊົນທີ່ທຸກຍາກສາມາດເຂົ້າເຖິງການນໍາໃຊ້ອິນເຕີເນັດໄດ້.
ສໍາລັບປີ 2024, ຄຄອຊ ຕ້ອງໄດ້ເລັ່ງແກ້ໄຂບັນຫາຫຍໍ້ທໍ້ຜ່ານທາງລະບົບໂທລະຄົມມະ ນາຄົມ ແລະ ອິນເຕີເນັດ, ເປັນຕົ້ນອາຊະຍາກໍາ ແລະ ການຕົວະຍົວະຫຼອກຫຼວງ ຜ່ານລະບົບອິນເຕີເນັດ, ຜ່ານແກ໋ງຄອນເຊັນເຕີ; ການຮົ່ວໄຫຼຂອງເອກະສານຂອງພັກ-ລັດ, ການຮົ່ວໄຫຼຂໍ້ມູນສ່ວນບຸກຄົນ, ຕິດຕາມກວດກາບັນດາສື່ ແລະ ເວັບໄຊ້ ລາມົກອະນາຈານ, ບັນຫາເກມ-ການພະ ນັນ, ຄາສິໂນອອນລາຍ, ການຄ້າຂາຍຫວຍເຖື່ອນ, ການຄ້າປະເວນີ, ການຄ້າຢາເສບຕິດຜ່ານທາງອອນລາຍຕ່າງໆທີ່ຜິດກົດ ໝາຍ, ເພື່ອເຮັດແນວໃດເຮັດໃຫ້ສະພາບແວດລ້ອມອິນເຕີເນັດຂອງ ສປປ ລາວ ພວກເຮົາມີຄວາມປອດໄພ.
