ກອງປະຊຸມຄະນະຮັບຜິດຊອບກະກຽມດໍາເນີນກອງປະຊຸມໃຫຍ່ຜູ້ແທນແມ່ຍິງກະຊວງ ປກສ ຄັ້ງທີ VIII ໄດ້ຈັດຂຶ້ນໃນວັນທີ 19 ທັນວາ 2024 ໂດຍມີ ພົຈວ ໜູໃບ ອິນທິສານ ຮອງຫົວໜ້າກົມໃຫຍ່ການເມືອງ ປກສ ຜູ້ຊີ້ນໍາອົງການຈັດຕັ້ງມະຫາຊົນ, ພັອ ນາງ ຄໍາຢາດ ວິໄລວັນ ຄະນະບໍລິຫານງານສູນກາງສະຫະພັນແມ່ຍິງລາວ ປະທານສະຫະພັນແມ່ຍິງກະ ຊວງ ປກສ, ມີບັນດາຄະນະສະຫະ ພັນແມ່ຍິງກະຊວງ, ພາກສ່ວນກ່ຽວຂ້ອງ ພ້ອມດ້ວຍສະມາຊິກແມ່ຍິງ ເຂົ້າຮ່ວມ.
ພັອ ນາງ ບຸນທະວີ ພິລາວັນ ຮອງປະທານສະຫະພັນແມ່ຍິງກະຊວງ ປກສ ຜ່ານແຜນການກະກຽມດໍາເນີນກອງປະຊຸມໃຫຍ່ຜູ້ແທນແມ່ຍິງກະຊວງ ປກສ ຄັ້ງທີ VIII ໃຫ້ຮູ້ວ່າ: ເພື່ອເຮັດໃຫ້ການກະກຽມ ແລະ ດຳເນີນກອງປະຊຸມໃຫຍ່ ຄັ້ງທີ VIII ຂອງຄະນະບໍລິຫານງານສະຫະພັນ ແມ່ຍິງກະຊວງ ປກສ ຖືກຕ້ອງຕາມລະບຽບຫຼັກການ ແລະ ມີຜົນສໍາເລັດຢ່າງຈົບງາມ, ເປັນການສະຫຼຸບຕີລາຄາຄືນການເຄື່ອນໄຫວນໍາພາຂອງຄະນະບໍລິຫານງານສະຫະ ພັນແມ່ຍິງກະຊວງ ປກສ ໄລຍະ 5 ປີຜ່ານມາ (2020-2024) ແລະ ພ້ອມກັນກໍານົດທິດ ທາງຄາດໝາຍສູ້ຊົນໃນການພັດທະນາແມ່ຍິງ ໃຫ້ສອດຄ່ອງກັບສະພາບການໃນ 5 ປີຕໍ່ໜ້າ (2025-2029) ແລະ ເພື່ອປັບປຸງການຈັດຕັ້ງສະຫະພັນແມ່ຍິງກະຊວງ ປກສ ໃຫ້ມີຄວາມໜັກແໜ້ນ ເຂັ້ມແຂງ ແລະ ເປັນຕົວແທນໃນການປົກປ້ອງສິດຜົນປະໂຫຍດອັນຊອບທຳຂອງແມ່ຍິງ ແລະ ເດັກ, ສອດຄ່ອງກັບໜ້າທີ່ການເມືອງໃນແຕ່ລະໄລຍະ, ຍົກສູງຄຸນນະພາບໃນການນໍາພາຂອງຄະນະສະຫະພັນແມ່ຍິງແຕ່ລະຂັ້ນສາມາດເປັນເສນາທິການໃຫ້ແກ່ຄະ ນະພັກ-ຄະນະນໍາໃນການສຶກສາອົບຮົມ, ປຸກລະດົມແມ່ຍິງປະກອບສ່ວນເຂົ້າໃນການປະຕິບັດໜ້າທີ່ການເມືອງທີ່ການຈັດຕັ້ງຂັ້ນເທິງມອບໝາຍໃຫ້ມີປະສິດທິຜົນດີຂຶ້ນ.
ໃນກອງປະຊຸມ, ຍັງໄດ້ຜ່ານຂໍ້ຕົກລົງກະຊວງປ້ອງກັນຄວາມສະຫງົບ ວ່າດ້ວຍການແຕ່ງຕັ້ງຄະນະຮັບຜິດຊອບກະກຽມດໍາເນີນກອງປະຊຸມໃຫຍ່ຜູ້ແທນແມ່ຍິງກະຊວງ ປກສ ຄັ້ງທີ VIII. ໃນນີ້, ໄດ້ແຕ່ງຕັ້ງຄະນະຊີ້ນໍາລວມ, ອະນຸກໍາມະການເນື້ອໃນ, ອະນຸກໍາມະການບຸກຄະລາກອນ, ອະນຸກໍາມະການພິທີການ, ໂຄສະນາ, ປະດັບປະດາສະຖານທີ່, ຍ້ອງຍໍ, ຂະບວນ ການ ແລະ ຮັບແຂກ, ອະນຸກໍາມະການເສດຖະກິດ, ບໍລິຫານ ແລະ ຮັກສາສຸຂະພາບ, ອະນຸກໍາມະການປ້ອງກັນ ແລະ ໄດ້ຮັບຟັງການລາຍງານຄວາມພ້ອມຂອງແຕ່ລະໜ້າວຽກຈາກປະທານສະຫະພັນແມ່ຍິງກະຊວງ ປກສ.
ໂອກາດດັ່ງກ່າວ, ພົຈວ ໜູໃບ ອິນທິສານ ໄດ້ ຊີ້ນໍາໃຫ້ຄະນະສະຫະພັນແມ່ຍິງກະຊວງ ປກສ ຕ້ອງເປັນໃຈກາງກະກຽມຄວາມພ້ອມໃນທຸກດ້ານ, ເອົາໃຈໃສ່ປັບປຸງແກ້ໄຂບັນຫາທີ່ຍັງບໍ່ທັນແທດເໝາະໃຫ້ສອດຄ່ອງ, ຄະນະຊີ້ນໍາ ແລະ ອະນຸກໍາມະການແຕ່ລະດ້ານກໍຕ້ອງເປັນເຈົ້າການນໍາພາເຄື່ອນໄຫວຕາມພາລະບົດບາດຂອງຕົນ, ຮັບປະກັນໃຫ້ການດໍາເນີນກອງປະຊຸມໄປຕາມວາລະທີ່ໄດ້ກະ ກຽມ ແລະ ໄດ້ຮັບຜົນສໍາເລັດຕາມຄາດໝາຍທີ່ວາງໄວ້.
