ວັນທີ 18 ພະຈິກ 2024, ກອງບັນຊາການ ປກສ ແຂວງຄໍາມ່ວນ ໄດ້ເປີດກອງປະຊຸມຜັນຂະຫຍາຍການໂອນຖ່າຍສໍາເນົາສໍາມະໂນຄົວ ເປັນເອກະສານຂໍ້ມູນເອເລັກໂຕຣນິກ ໂດຍພາຍໃຕ້ການເປັນປະທານຂອງ ທ່ານ ວັນໄຊ ພອງສະຫວັນ ເຈົ້າແຂວງຄຳມ່ວນ ແລະ ເຂົ້າຮ່ວມຂອງ ພົຈວ ແກ່ນຈັນ ພົມມະຈັກ ຫົວໜ້າກົມຄຸ້ມຄອງສໍາມະໂນຄົວ ແລະ ກໍ່ສ້າງຮາກຖານ, ມີບັນດາທ່ານຕາງໜ້າທີມງານຈາກກະຊວງປ້ອງກັນຄວາມສະຫງົບ, ຫ້ອງວ່າການປົກຄອງແຂວງ, ບັນດາຫ້ອງອ້ອມຂ້າງກອງບັນຊາການ, ປກສ 10 ເມືອງເຂົ້າ ຮ່ວມ.
ພັອ ຄຳສິງ ນົນທະສອນ ຮອງຫົວໜ້າກອງບັນຊາການ ປກສ ແຂວງຄຳມວນ ໄດ້ຂຶ້ນຜ່ານຂໍ້ຕົກລົງ ຂອງກະຊວງປ້ອງກັນຄວາມສະຫງົບ ວ່າດ້ວຍການແຕ່ງຕັ້ງຄະນະຮັບຜິດຊອບ ໂອນຖ່າຍສຳເນົາສໍາມະໂນຄົວ ເປັນເອກະສານຂໍ້ມູນເອເລັກໂຕຣນິກ ແຕ່ວັນທີ່ 18 ພະຈິກ 01ທັນວາ 2024, ຂໍ້ຕົກລົງຂອງກົມຄຸ້ມຄອງສໍາມະໂນຄົວ ແລະ ກໍ່ສ້າງຮາກຖານ ວ່າດ້ວຍການແບ່ງຄວາມຮັບຜິດຊອບ ໂອນຖ່າຍສຳເນົາສຳມະໂນຄົວ ເປັນເອກະສານຂໍ້ມູນ ເອເລັກໂຕຣນິກ ຂອງໂຄງການກໍ່ສ້າງລະບົບຄຸ້ມ ຄອງພົນ ລະເມືອງ ແລະ ບັດປະຈຳຕົວ ເພື່ອຈັດຕັ້ງຜັນຂະຫຍາຍແຜນກໍ່ສ້າງລະບົບຖານຂໍ້ມູນພົນລະເມືອງ ແລະ ບັດປະຈໍາຕົວໃຫ້ແກ່ກົມຄຸ້ມຄອງສໍາມະໂນຄົວ ແລະ ກໍ່ສ້າງຮາກຖານ, ພະນັກງານ ປກສ ຂັ້ນແຂວງ ປກສ ຂັ້ນເມືອງ ໃນໄລຍະ 3 ປີ 2024 – 2026 ໃຫ້ເປັນຮູບປະທໍາໃນວຽກງານຕົວຈິງ, ເຮັດໃຫ້ພະນັກງານ ປກສ ຂັ້ນແຂວງ, ຂັ້ນເມືອງເຂົ້າໃຈແຈ້ງໃນການນໍາໃຊ້ລະບົບເຊື່ອມໂຍງຖານຂໍ້ມູນພົນລະເມືອງ ແລະ ບັດປະຈໍາຕົວກັບບັນດາກະຊວງອົງການທຽບເທົ່າກະຊວງທີ່ກ່ຽວຂ້ອງ ແລະ ບັນດາແຂວງ, ສ້າງພື້ນຖານໂຄງລ່າງຂໍ້ມູນຕົ້ນຕໍກ່ຽວກັບທີ່ຢູ່ອາໄສແຕ່ລະຂັ້ນຕອນເພື່ອກ້າວເຂົ້າສູ່ການຫັນເປັນດີຈີຕອນແຫ່ງຊາດ, ນອກຈາກນີ້, ຍັງເປັນບ່ອນອີງໃຫ້ຄະນະຮັບຜິດຊອບ ແລະ ພາກສ່ວນທີ່ກ່ຽວຂ້ອງໄດ້ປະກອບສ່ວນເຮັດໃຫ້ການຈັດຕັ້ງປະຕິບັດແຜນເກັບກໍາ, ທົດລອງປ້ອນຂໍ້ມູນເຂົ້າໃນລະບົບໃຫ້ບັນລຸຜົນສໍາເລັດຕາມຄາດໝາຍທີ່ວາງໄວ້.
ທ່ານ ວັນໄຊ ພອງສະຫວັນ ເຈົ້າແຂວງຄຳມ່ວນ ໄດ້ມີຄໍາເຫັນໂອ້ລົມ ແລະ ເນັ້ນໜັກບາງບັນຫາເຊິ່ງທ່ານໄດ້ແນະນໍາໃຫ້ບັນດາທ່ານຜູ່ທີ່ຢູ່ໃນຂໍ້ຕົກລົງແຕ່ງຕັ້ງຮັບຜິບຊອບມອບໝາຍໜ້າທີ່ວຽກງານ, ນັບທັງ ປກສ ແຂວງ, ປກສ 10 ເມືອງ ແລະ ບັນດາພະແນກການອ້ອມຂ້າງແຂວງນໍາເອົາເນື້ອໃນຈິດໃຈກອງປະຊຸມຄັ້ງນີ້, ໄປສືບຕໍ່ຜັນຂະຫຍາຍໃຫ້ບັນດາກົມກອງຂອງຕົນເພື່ອຈັດຕັ້ງປະຕິບັດໃຫ້ເກີດດອກອອກຜົນມີຜົນສໍາເລັດຕາມລະດັບຄາດໝາຍ.
