ໃນວັນທີ 15 ພະຈິກ 2024 ທີ່ສະໂມສອນຫ້ອງວ່າການປົກຄອງ ແຂວງເຊກອງ ໄດ້ຈັດພິທີປະກາດແຕ່ງຕັ້ງ ຮອງປະທານ, ຜູ້ປະຈໍາການ ຄະນະກໍາມະການ ປ້ອງກັນຊາດ-ປ້ອງກັນຄວາມສະຫງົບ ແຂວງເຊກອງ, ເປັນກຽດເຂົ້າຮ່ວມເປັນປະທານໂດຍທ່ານ ພົອ ວິໄລ ຫຼ້າຄໍາຟອງ ກໍາມະການກົມການເມືອງສູນກາງພັກ ຄະນະກໍາມະການປ້ອງກັນຊາດ-ປ້ອງກັນຄວາມສະຫງົບ ສູນກາງ ຮອງນາຍົກລັດຖະມົນຕີ, ລັດຖະມົນຕີກະຊວງປ້ອງກັນຄວາມສະຫງົບ, ມີທ່ານ ເຫຼັກໄຫຼ ສີວິໄລ ກໍາມະການສູນກາງພັກ, ເລຂາພັກແຂວງ, ເຈົ້າແຂວງເຊກອງ ທັງເປັນປະທານປ້ອງກັນຊາດ-ປ້ອງກັນຄວາມສະຫງົບ ແຂວງ, ມີບັນດາຄະນະປະຈໍາພັກແຂວງ, ກໍາມະການພັກແຂວງ, ທ່ານຜູ້ຕາງໜ້າຫ້ອງການຄະນະກໍາມະການ ປກຊ-ປກສ ສູນກາງ, ຫ້ອງວ່າການກະຊວງປ້ອງກັນຄວາມສະຫງົບ, ພ້ອມດ້ວຍຄະນະພັກ-ຄະນະບັນຊາ ປກຊ-ປກສ ແຂວງ ແລະ ພະແນກການກ່ຽວຂ້ອງອ້ອມຂ້າງ ແຂວງເຊກອງ ເຂົ້າຮ່ວມ.
ໃນພິທີ, ທ່ານ ພົຈວ ທຸມມາ ພົມມະທໍາ ຮອງຫົວໜ້າຫ້ອງການ, ຄະນະກໍາມະການປ້ອງກັນຊາດ-ປ້ອງກັນຄວາມສະຫງົບ ສູນກາງ ໄດ້ຜ່ານ ມະຕິຕົກລົງ ຂອງຄະນະເລຂາທິການສູນກາງພັກ ວ່າດ້ວຍການຕົກລົງ ແຕ່ງຕັ້ງ ສະຫາຍ ພົຈວ ທອງສີ ກຸນສະນະ ເປັນຮອງປະທານ, ຜູ້ປະຈໍການ, ຄະນະກໍາມະການປ້ອງກັນຊາດ-ປ້ອງກັນຄວາມສະຫງົບ ແຂວງເຊກອງ.
ໂອກາດນີ້, ທ່ານ ພົອ ວິໄລ ຫຼ້າຄໍາຟອງ ກໍໄດ້ຕາງໜ້າໃຫ້ພັກ-ລັດຖະບານ ກໍຄື ຄະນະກໍາມະການປ້ອງກັນຊາດ-ປ້ອງກັນຄວາມສະ ຫງົບ ສູນກາງ ກ່າວສະແດງຄວາມຍ້ອງຍໍຊົມເຊີຍຕໍ່ ສະຫາຍ ທີ່ໄດ້ຮັບການແຕ່ງຕັ້ງ ເປັນຮອງປະທານ, ຜູ້ປະຈໍາການ ຄະນະກໍາມະການ ປກຊ-ປກສ ແຂວງໃນຄັ້ງນີ້ ເຊີ່ງເປັນຕໍາແໜ່ງໜື່ງທີ່ສໍາຄັນ ໃນການນໍາພາ-ຊີ້ນໍາຂົງເຂດວຽກງານປ້ອງກັນຊາດ-ປ້ອງກັນຄວາມສະຫງົບ ຢູ່ໃນຂັ້ນແຂວງ, ໂດຍສະເພາະກໍແມ່ນເຮັດໜ້າທີ່ ເປັນເສນາທິການໃຫ້ແກ່ຄະນະກໍາມະການ ປກຊ-ປກສ ສູນກາງ ເພື່ອຄົ້ນຄວ້າ, ກໍານົດບັນຫາຍຸດທະສາດ ກ່ຽວກັບວຽກງານປ້ອງກັນຊາດ-ປ້ອງກັນຄວາມສະຫງົບ, ຄວາມໝັ້ນຄົງຂອງຊາດ, ຈັດຕັ້ງຜັນຂະຫຍາຍແນວທາງປ້ອງກັນຊາດ-ປ້ອງກັນຄວາມສະຫງົບ ທົ່ວປວງຊົນຮອບດ້ານໃນຂອບເຂດຄວາມຮັບຜິດຊອບຂອງຕົນ, ຮັບປະກັນໃຫ້ແຂວງມີສະຖຽນລະພາບທາງດ້ານການເມືອງ, ມີຄວາມສະຫງົບ ແລະ ຄວາມເປັນລະບຽບຮຽບຮ້ອຍໂດຍພື້ນຖານ.
ພ້ອມນີ້, ທ່ານກໍໄດ້ເນັ້ນໜັກໃຫ້ການນໍາແຂວງ, ຄະນະພັກ-ຄະນະບັນຊາ ປກຊ-ປກສ ເພີ່ມທະວີຄວາມເປັນເຈົ້າການນໍາພາ-ຊີ້ນໍາຕໍ່ຂົງເຂດວຽກງານດັ່ງກ່າວໃຫ້ແຂງແຮງ, ມີຈຸດສຸມຕາມທິດຊີ້ນໍາຂອງຂັ້ນເທີງ, ເອົາໃຈໃສ່ຊີ້ນໍາກໍາຫັນລົງກໍ່ສ້າງຮາກຖານການເມືອງຕາມ 4 ເນື້ອໃນ 4 ຄາດໝາຍ, ເຄື່ອນໄຫວຕາມພາລະບົດບາດຂອງຕົນຢ່າງແຂງແຮງກວ່າເກົ່າ, ພະນັກງານແຕ່ລະຂັ້ນຕ້ອງເຊື່ອມຊຶມກໍາແໜ້ນໜ້າທີ່ພາລະບົດບາດຂອງຕົນ, ແກ້ໄຂຄວາມບໍ່ສະຫງົບໃຫ້ຂາດຕົວ, ສ້າງໃຫ້ເປັນກໍາລັງຫຼັກແຫຼ່ງທີ່ເຂັ້ມແຂງ, ຖືເອົາການສືກສາອົບຮົມການເມືອງ-ນໍາພາແນວຄິດເປັນກົກ, ເອົາການພັດທະນາເສດຖະກິດ-ສັງຄົມ ເປັນໃຈກາງ ແລະ ເອົາວຽກງານປ້ອງກັນຊາດ-ປ້ອງກັນຄວາມສະຫງົບ ເປັນພື້ນຖານ ເພື່ອຮັບປະກັນໃນການປະຕິບັດວຽກງານໃຫ້ມີຄຸນນະພາບສູງສຸດຂຶ້ນກ່າວເກົ່າ.
