ວັນທີ 10 ຕຸລາຜ່ານມາ ທີ່ຫໍປະຊຸມແຫ່ງຊາດ, ທ່ານ ສອນໄຊ ສີພັນດອນ ນາຍົກລັດຖະມົນຕີແຫ່ງສປປ ລາວ ໄດ້ພົບປະສອງຝ່າຍກັບທ່ານ ຈັສຕິນ ທຣູໂດ (Justin Trudeau) ນາ ຍົກລັດຖະມົນຕີແຫ່ງການາດາ ໃນໂອກາດມາເຂົ້າຮ່ວມກອງປະຊຸມສຸດຍອດສະໄໝພິເສດອາຊຽນ-ການາດາ ແລະ ກອງປະຊຸມສຸດຍອດທີ່ກ່ຽວຂ້ອງທີ່ນະ ຄອນຫຼວງວຽງຈັນ.
ໃນໂອກາດນີ້, ທ່ານ ສອນໄຊ ສີພັນດອນ ໄດ້ສະແດງຄວາມຍິນດີຕ້ອນຮັບ ແລະ ຕີລາຄາສູງຕໍ່ການເດີນທາງມາເຂົ້າຮ່ວມກອງປະຊຸມປິ່ນອ້ອມກອງປະຊຸມສຸດຍອດອາຊຽນ ຄັ້ງທີ 44 ແລະ 45 ທີ່ ສປປ ລາວ ເປັນເຈົ້າພາບ ແລະ ໄດ້ສະແດງຄວາມຍິນດີທີ່ໄດ້ມີໂອກາດພົບກັບທ່ານ ຈັສຕິນ ທຣູໂດ ໃນຄັ້ງນີ້ຖືເປັນການພົບປະຄັ້ງທຳອິດ ຊຶ່ງເປັນຂີດໝາຍສຳຄັນໃນການສືບຕໍ່ເສີມຂະຫຍາຍສາຍພົວພັນມິດຕະພາບ ແລະ ການຮ່ວມມືອັນດີລະຫວ່າງ ສປປ ລາວ ແລະ ການາດາ ພາຍຫຼັງສອງປະເທດໄດ້ສ້າງຕັ້ງສາຍພົວພັນການທູດນຳກັນ ຄົບຮອບ 50 ປີ ແລະ ສະແດງຄວາມຍິນດີໃນໂອ ກາດ ສປປ ລາວ ໄດ້ຮັບຖານະເປັນປະ ເທດປະສານງານການພົວພັນຮ່ວມມືອາຊຽນ-ການາດາ ສົກປີ 2024-2027.
ໂອກາດດຽວກັນນີ້, ທ່ານ ຈັສຕິນ ທຣູໂດ ໄດ້ສະແດງຄວາມຂອບໃຈຕໍ່ການຕ້ອນຮັບຢ່າງອົບອຸ່ນຂອງ ສປປ ລາວ, ຊົມເຊີຍການເປັນປະທານອາຊຽນຂອງ ສປປ ລາວ, ຕີລາຄາສູງການພົວພັນຮ່ວມມືອັນດີລະຫວ່າງການາດາ-ລາວ ພ້ອມທັງຢືນຢັນຄວາມໝາຍໝັ້ນຂອງການາດາທີ່ຈະສືບຕໍ່ໃຫ້ການຮ່ວມມື ແລະ ສະໜັບສະໜູນ ສປປ ລາວ ທັງໃນຂອບສອງຝ່າຍ ແລະ ຫຼາຍຝ່າຍ.
ພ້ອມດຽວກັນນີ້, ທ່ານນາຍົກ ການາດາ ຍັງໄດ້ແຈ້ງໃຫ້ຊາບວ່າ ໃນໂອກາດ ຄົບ ຮອບ 50 ປີ ແຫ່ງການສ້າງຕັ້ງສາຍພົວພັນການທູດລາວ-ການາດາ, ການາດາຈະເປີດສະຖານເອກອັກຄະລັດຖະທູດກາ ນາດາປະຈໍາ ສປປ ລາວ ແນໃສ່ເພື່ອເສີມຂະ ຫຍາຍສາຍພົວພັນລະຫວ່າງພາກປະຊາ ຊົນກັບປະຊາຊົນ ແລະ ສົ່ງເສີມການຮ່ວມມືດ້ານການຄ້າ-ການລົງທຶນຂອງສອງປະ ເທດ ກໍຄືການຄ້າເສລີໃນອາຊຽນ.
ທ່ານ ຈັສຕິນ ທຣູໂດ ຍັງໄດ້ແຈ້ງວ່າ ການາດາໄດ້ໃຫ້ຄວາມສໍາຄັນຕໍ່ບັນຫາສິ່ງ ແວດລ້ອມ ໂດຍໄດ້ລົງທຶນສະໜັບສະໜູນມູນຄ່າຫຼາຍກວ່າ 60 ລ້ານໂດລາການາດາ ໃນຂົງເຂດວຽກ ງານດັ່ງກ່າວຜ່ານກອບແມ່ນ້ຳຂອງ ແລະ ຢືນຢັນສືບຕໍ່ຊຸກຍູ້ການຮ່ວມ ມືໃນຂະແໜງການທີ່ມີທ່າແຮງຮ່ວມກັນໃຫ້ຫຼາຍຂຶ້ນ ເພື່ອນຳເອົາຜົນປະໂຫຍດຕົວຈິງມາສູ່ປະຊາຊົນສອງປະ ເທດ ສປປ ລາວ ແລະ ການາດາ.
ໂອກາດນີ້, ທ່ານ ສອນໄຊ ສີພັນດອນ ໄດ້ສະແດງຄວາມຊົມເຊີຍຕໍ່ລັດຖະບານການາດາ ທີ່ຈະເປີດສະຖານເອກອັກຄະລັດ ຖະທູດການາດາປະຈໍາ ສປປ ລາວ ແລະ ສະແດງຄວາມຂອບໃຈມາຍັງລັດຖະບານການາດາ ທີ່ອໍານວຍຄວາມສະດວກແກ່ພົນລະເມືອງສັນຊາດລາວດຳລົງຊີວິດຢູ່ການາດາ.
ສປປ ລາວ ແລະ ການາດາ ໄດ້ສ້າງຕັ້ງສາຍພົວພັນທາງການທູດໃນວັນທີ 15 ມິຖຸນາ 1974 ( 15 ມິຖຸນາ 1974-15 ມິຖຸນາ 2024). ການາດາໄດ້ເປີດຫ້ອງການຕາງໜ້າການທູດການາດາທີ່ນະຄອນຫຼວງວຽງຈັນ ໃນເດືອນສິງຫາ 2015 ໂດຍມີລະດັບອຸປະທູດການາດາປະຈໍາຫ້ອງການ, ເຊິ່ງຖືວ່າເປັນບາດກ້າວສຳຄັນໃນການຊຸກຍູ້ສົ່ງເສີມການຮ່ວມມືໃນຂະແໜງຕ່າງໆເຊັ່ນ: ການຄ້າ-ການລົງທຶນ, ການທ່ອງທ່ຽວ ແລະ ການສຶກສາລະຫວ່າງສອງປະເທດ.
