ກອງປະຊຸມສຸດຍອດອາຊຽນ-ອົດສະຕຣາລີ ຄັ້ງທີ 4 ໄດ້ຈັດຂຶ້ນໃນວັນທີ 10 ຕຸລານີ້ ທີ່ ນະຄອນຫຼວງວຽງຈັນ ໂດຍການເປັນປະທານຂອງທ່ານ ສອນໄຊ ສີພັນດອນ ນາຍົກລັດຖະມົນຕີແຫ່ງ ສປປ ລາວ, ມີບັນດາຜູ້ນໍາອາຊຽນ, ທ່ານ ແອນໂຕນີ ອານ ບານີຊີ ນາຍົກ ລັດຖະມົນຕີ ແຫ່ງ ອົສຕຣາລີ ແລະ ນາຍົກລັດຖະມົນຕີ ແຫ່ງ ຕີມໍແລັສເຕເຂົ້າຮ່ວມໃນນາມຜູ້ສັງເກດການ.
ກອງປະຊຸມໄດ້ແລກປ່ຽນຄໍາຄິດຄໍາເຫັນກ່ຽວກັບການພົວ ພັນຮ່ວມມືໃນໄລຍະຜ່ານມາ ແລະ ກໍານົດທິດທາງການຮ່ວມມືໃນຕໍ່ໜ້າ. ກອງປະຊຸມໄດ້ສະແດງຄວາມຍິນດີຕໍ່ຜົນສໍາເລັດອັນຈົບງາມຂອງກອງປະຊຸມສຸດຍອດສະໄໝພິ ເສດເພື່ອສະເຫຼີມສະຫຼອງຄົບຮອບ 50 ປີ ການພົົວພັນອາຊຽນ-ອົສຕຣາລີ ທີ່ໄດ້ຈັດຂຶ້ນໃນວັນທີ 4-6 ມີນາ 2024 ທີ່ ເມວເບີນ ອົດສະຕຣາລີ ໂດຍການເປັນປະທານຮ່ວມຂອງທ່ານນາຍົກລັດຖະມົນຕີແຫ່ງ ສປປ ລາວ ໃນນາມປະທານອາຊຽນ ແລະ ປະເທດປະສານງານການພົວພັນຮ່ວມມືອາຊຽນ-ອົດສະຕຣາລີ ສົກປີ 2021-2024 ແລະ ທ່ານນາຍົກລັດຖະມົນຕີແຫ່ງອົດສະຕຣາລີ.
ສໍາລັບທິດທາງໃນຕໍ່ໜ້າ, ກອງປະຊຸມໄດ້ຊຸກຍູ້ໃຫ້ສອງຝ່າຍສືບຕໍ່ເພີ່ມທະວີຄວາມພະຍາຍາມໃນການຮັດແໜ້ນການຮ່ວມມືໂດຍຜ່ານການຈັດຕັ້ງປະຕິບັດບັນດາເອກະ ສານຜົນກອງປະຊຸມ ແລະ ຂໍ້ລິເລີ່ມຕ່າງໆ ທີ່ໄດ້ປະກາດໃນກອງປະຊຸມສຸດຍອດສະໄໝພິເສດດັ່ງກ່າວ ລວມທັງແຜນປະຕິບັດງານ (2025-2029) ແນໃສ່ເພື່ອຜັນຂະຫຍາຍການເປັນຄູ່ຮ່ວມຍຸດທະສາດຮອບດ້ານອາຊຽນ-ອົດສະຕຣາລີ.
ອົດສະຕຣາລີ ເປັນຄູ່ເຈລະຈາທີ່ຍາວນານ ແລະ ສໍາຄັນຂອງອາຊຽນ ທີ່ໄດ້ສ້າງຕັ້ງສາຍພົວພັນກັບອາຊຽນໃນປີ 1974 ໄດ້ຖືກຍົກລະດັບຂຶ້ນເປັນຄູ່ຮ່ວມຍຸດທະສາດໃນປີ 2014 ແລະ ເປັນຄູ່ຮ່ວມຍຸດທະສາດຮອບດ້ານໃນປີ 2021.
