ໃນຕອນເຊົ້າຂອງວັນທີ 9 ຕຸລາ 2024, ພົຕ ຄຳກິ່ງ ຜຸຍຫຼ້າມະນີວົງ ຮອງລັດຖະມົນຕີກະຊວງປ້ອງກັນຄວາມສະ ຫງົບ ຫົວໜ້າກົມໃຫຍ່ຕຳຫຼວດ ພ້ອມຄະນະ ໄດ້ເຄື່ອນ ໄຫວກວດກາ, ຕິດຕາມ ແລະ ຊຸກຍູ້ການປະຕິບັດໜ້າທີ່ຂອງກຳລັງປ້ອງກັນຄວາມສະຫງົບ ຢູ່ຈຸດຕ່າງໆໃນການປ້ອງກັນເພື່ອຮັບປະກັນຄວາມສະຫງົບ ແລະ ຮັກສາຄວາມເປັນລະບຽບຮຽບຮ້ອຍ ໃຫ້ແກ່ການເປັນເຈົ້າພາບຈັດກອງປະຊຸມສຸດຍອດອາຊຽນ ຄັ້ງທີ 44-45 ຂອງ ສປປ ລາວ.
ການເຄື່ອນໄຫວກວດກາ, ຕິດຕາມ ແລະ ຊຸກຍູ້ການປະຕິ ບັດໜ້າທີ່ຂອງກຳລັງປ້ອງກັນຄວາມສະຫງົບ ຂອງທ່ານຮອງລັດ ຖະມົນຕີກະຊວງປ້ອງກັນຄວາມສະຫງົບ ໃນຄັ້ງນີ້ ຄະນະຮັບຜິດຊອບນຳພາ-ບັນຊາຢູ່ຕາມຈຸດຕ່າງໆກໍໄດ້ລາຍງານສະພາບລວມ, ຂໍ້ສະດວກ, ຂໍ້ຫຍຸ້ງຍາກ ແລະ ບັນຫາອື່ນໆ ທີ່ພົວພັນເຖິງການປະຕິບັດໜ້າທີ່ຂອງກຳລັງປ້ອງ ກັນຄວາມສະຫງົບ ໃຫ້ທ່ານຮອງລັດຖະມົນຕີກະຊວງປ້ອງກັນຄວາມສະຫງົບ ພ້ອມຄະນະໄດ້ຮັບຊາບວ່າ ຜ່ານການປະຕິບັດໜ້າທີ່ຂອງກຳລັງປ້ອງ ກັນຄວາມສະຫງົບ ຢູ່ຕາມຈຸດຕ່າງໆແມ່ນ ສາມາດຮັບປະກັນໄດ້ຄວາມສະຫງົບ, ຄວາມປອດໄພ 100% ແລະ ມີຄວາມເປັນລະບຽບຮຽບ ຮ້ອຍໂດຍພື້ນຖານ. ເຊິ່ງການລົງເຄື່ອນໄຫວຄັ້ງນີ້ປະກອບມີ 4 ຈຸດທີ່ສໍາຄັນຄື: ຈຸດປ້ອງກັນສູນຂ່າວ, ຈຸດປ້ອງ ກັນຫໍປະຊຸມແຫ່ງຊາດ, ຈຸດປ້ອງກັນຢູ່ໂຮງແຮມດອນຈັນພາເລດ ແລະ ຈຸດປ້ອງກັນຢູ່ໂຮງແຮມແລນມາກ ລີເວີຊາຍ.
ໂອກາດດັ່ງກ່າວ ພົຕ ຄໍາກິ່ງ ຜຸຍຫຼ້າມະນີວົງ ກໍໄດ້ສະແດງຄວາມຍ້ອງຍໍຊົມເຊີຍ ພ້ອມທັງ ຮຽກຮ້ອງໃຫ້ກຳລັງປ້ອງ ກັນຄວາມສະຫງົບ ທີ່ປະຈຳຢູ່ແຕ່ລະຈຸດ ໃຫ້ພ້ອມກັນເອົາໃຈໃສ່ປະຕິບັດໜ້າທີ່ຮັບປະກັນເຮັດໃຫ້ການເປັນເຈົ້າພາບຈັດກອງປະຊຸມສຸດຍອດອາຊຽນ ຂອງ ສປປ ລາວ ໃນຄັ້ງນີ້ ມີຄວາມສະຫງົບປອດໄພ 100% ເພື່ອເຮັດໃຫ້ກອງປະຊຸມຄັ້ງນີ້ດໍາເນີນໄປດ້ວຍຜົນສໍາເລັດຢ່າງຈົບງາມ.
ຈາກນັ້ນ, ທ່ານໄດ້ມອບເຄື່ອງບໍລິໂພກໃຫ້ກໍາລັງປ້ອງກັນຄວາມສະຫງົບ ເຊິ່ງສະແດງເຖິງຄວາມເປັນຫ່ວງເປັນໄຍຈາກພັກ-ລັດ ເວົ້າສະເພາະກໍຄືການນໍາກະຊວງປ້ອງກັນຄວາມສະຫງົບ ທີ່ເຫັນໄດ້ຄວາມໝາຍ ແລະ ຄວາມສໍາຄັນຂອງວຽກງານປ້ອງ ກັນຄວາມສະຫງົບ ຄວາມເປັນລະບຽບຮຽບຮ້ອຍຂອງສັງຄົມ ເວົ້າສະເພາະແມ່ນການປ້ອງກັນກອງປະຊຸມສຸດຍອດອາຊຽນ ຄັ້ງທີ 44-45 ທີ່ ສປປ ລາວ ໄດ້ຮັບກຽດເປັນເຈົ້າພາບໃນຄັ້ງນີ້ ໃຫ້ມີຄວາມຮັບປະກັນຄວາມສະຫງົບປອດໄພຮອບດ້ານ.
