ເພື່ອຮັບປະກັນໃຫ້ການດໍາເນີນກອງປະຊຸມສຸດຍອດອາຊຽນ ຄັ້ງທີ 44-45 ທີ່ ສປປ ລາວ ໄດ້ຮັບກຽດເປັນເຈົ້າພາບ ໃຫ້ມີຄວາມສະຫງົບ ແລະ ປອດໄພ ເຈົ້າໜ້າທີ່ຮັບຜິດຊອບວຽກ ງານປ້ອງກັນຄວາມສະຫງົບ ຫຼາຍຈຸດ ໄດ້ສຸມໃສ່ປະຕິບັດໜ້າທີ່ຢ່າງເຂັ້ມງວດ ແລະ ດ້ວຍຄວາມຮັບຜິດຊອບສູງ ຜ່ານການປະຕິບັດໜ້າທີ່ຂອງກຳລັງປ້ອງກັນຄວາມສະຫງົບນັບແຕ່ວັນທີ 1 ຫາ 7 ຕຸລາ 2024 ແມ່ນຮັກສາໄດ້ຄວາມສະຫງົບ-ປອດໄພ.
ວັນທີ 7 ຕຸລາ 2024, ພົຈວ ຄອນສະຫວັນ ສົມພາໄຊ ຮອງຫົວໜ້າກົມໃຫຍ່ການເມືອງ ກະຊວງ ປກສ ພ້ອມຄະນະ ໄດ້ເຄື່ອນໄຫວຊຸກຍູ້ຢູ່ຈຸດປ້ອງກັນ 4 ຈຸດໃນນະຄອນຫຼວງວຽງຈັນ ຜ່ານການລາຍງານຂອງຫົວໜ້າຈຸດປ້ອງກັນເຫັນວ່າ ແຕ່ລະຈຸດ ສາມາດປະຕິບັດຄໍາສັ່ງ ແລະ ແຜນການປ້ອງກັນກອງປະຊຸມສຸດຍອດອາຊຽນ ຄັ້ງທີ 44-45 ຈາກຂັ້ນເທິງໄດ້ຢ່າງເຂັ້ມງວດ ສາມາດຮັກສາໄດ້ຄວາມສະ ຫງົບປອດໄພໃນທຸກດ້ານ.
ໃນໂອກາດລົງເຄື່ອນໄຫວຊຸກຍູ້ວຽກງານປ້ອງກັນໃນຄັ້ງນີ້ ພົຈວ ຄອນສະຫວັນ ສົມພາໄຊ ຍັງໄດ້ເນັ້ນໃຫ້ຄະນະຮັບຜິດຊອບ ພ້ອມດ້ວຍນາຍ ແລະ ພົນຕໍາຫຼວດ ໃນແຕ່ລະຈຸດເພີ່ມຄວາມເອົາໃຈໃສ່ໃນການປ້ອງກັນຈຸດຮອບຜິດຊອບຂອງຕົນເອງຂຶ້ນຕື່ມ ເພື່ອຮັບປະກັນໃຫ້ການດໍາເນີນກອງປະຊຸມສຸດຍອດອາຊຽນ ຄັ້ງທີ 44-45, ມີຄວາມສະຫງົບ, ປອດໄພ, ສັງ ຄົມມີຄວາມເປັນລະບຽບຮຽບຮ້ອຍ, ປະຕິບັດຕາມແນວທາງປ້ອງກັນຊາດ-ປ້ອງກັນຄວາມສະຫງົບທົ່ວປວງຊົນຮອບດ້ານຂອງພັກໃຫ້ປະ ກົດຜົນເປັນຈິງ ເຮັດໃຫ້ວຽກກງານປ້ອງກັນຊາດ-ປ້ອງກັນຄວາມສະຫງົບກາຍເປັນພັນທະ ແລະ ໜ້າທີ່, ຖືເອົາວຽກ ງານປ້ອງກັນຄັ້ງນີ້ເປັນບັ້ນຮົບໜຶ່ງຂອງກໍາລັງປ້ອງກັນຄວາມສະຫງົບ.
ພ້ອມນີ້, ທ່ານຍັງຮຽກຮ້ອງໃຫ້ຫົວໜ້າແຕ່ລະຈຸດ ເອົາໃຈໃສ່ໃນການປຸກລະດົມ ປກສ ບ້ານ ແລະ ອຳນາດການປົກຄອງບ້ານ ຈັດຕັ້ງປ້ອງກັນເວນຍາມຕາມຂອບເຂດຄວາມຮັບຜິດຊອບຂອງຕົນ ເພື່ອຊ່ວຍເປັນຫູເປັນຕາເຈົ້າໜ້າທີ່ຫາກມີກໍລະນີສຸກ ເສີນຈະໄດ້ແກ້ໄຂໄດ້ທັນກັບເວລາ.
ໃນໂອກາດນີ້, ພົຈວ ຄອນສະຫວັນ ສົມພາໄຊ ຍັງໄດ້ນໍາເອົານໍ້າດື່ມ, ໝີ່, ເຄື່ອງດື່ມ ແລະ ເຄື່ອງອື່ນໆອີກຈໍານວນໜຶ່ງ ທີ່ໄດ້ຮັບການອຸປະຖຳຈາກບໍລິສັດຕ່າງໆ ມອບໃຫ້ແຕ່ລະຈຸດຕື່ມອີກ.
