ໂດຍຕອບສະໜອງຕາມຄຳເຊີນຂອງ ສະຫາຍ ໂຕ ເລິມ ເລຂາທິການໃຫຍ່ຄະນະບໍລິຫານງານສູນກາງພັກກອມມູນິດ ຫວຽດນາມ, ປະທານປະເທດ ແຫ່ງ ສສ ຫວຽດນາມ, ສະຫາຍ ທອງລຸນ ສີສຸລິດ ເລຂາທິການໃຫຍ່ຄະນະບໍລິຫານງານສູນກາງພັກ ປະຊາຊົນ ປະຕິວັດລາວ,ປະທານປະເທດ ແຫ່ງ ສປປ ລາວ, ພ້ອມດ້ວຍພັນລະຍາ ແລະ ຄະນະຜູ້ແທນຂັ້ນສູງ ໄດ້ເດີນທາງຢ້ຽມຢາມລັດຖະກິດ ສສ ຫວຽດນາມ ແຕ່ວັນທີ 10-13 ກັນຍາ 2024, ເພື່ອເພີ່ມທະວີ ແລະ ເສີມຂະຫຍາຍສາຍພົວພັນມິດຕະພາບອັນຍິ່ງໃຫຍ່, ຄວາມສາມັກຄີພິເສດ ແລະ ການຮ່ວມມືຮອບດ້ານ ລະຫວ່າງສອງພັກ, ສອງລັດ ກໍຄື ປະຊາຊົນສອງຊາດ ລາວ-ຫວຽດນາມ, ຫວຽດນາມ-ລາວ ໃຫ້ຈະ ເລີນງອກງາມ ແລະ ແຕກດອກອອກຜົນຍິ່ງໆຂຶ້ນ.
ໃນຕອນເຊົ້າວັນທີ 10 ກັນຍາ 2024, ພິທີຕ້ອນຮັບຢ່າງເປັນທາງການ ໄດ້ຈັດຂຶ້ນຢ່າງອົບ ອຸ່ນ, ສົມກຽດ ແລະ ມີລັກສະນະພິເສດ ທີ່ສໍານັກງານປະທານປະເທດ ສສ ຫວຽດນາມ ໂດຍການເຂົ້າຮ່ວມຂອງ ສະຫາຍ ທອງລຸນ ສີສຸລິດ ເລຂາທິການໃຫຍ່, ປະທານປະທານ ແຫ່ງ ສປປ ລາວ ແລະ ສະຫາຍ ໂຕ ເລິມ ເລຂາທິການໃຫຍ່, ປະທານປະເທດ ແຫ່ງ ສສ ຫວຽດ ນາມ ພ້ອມດ້ວຍຄະນະຜູ້ແທນຂັ້ນສູງຂອງທັງສອງຝ່າຍ. ຫລັງຈາກນັ້ນ, ຜູ້ນໍາຂອງສອງປະເທດ ລາວ-ຫວຽດນາມ ໄດ້ພົບປະສອງຝ່າຍຢ່າງເປັນທາງການທີ່ຫ້ອງວ່າການສູນ ກາງພັກ ກອມມູນິດ ຫວຽດນາມ.
ໃນໂອກາດນີ້, ສະຫາຍ ທອງລຸນ ສີສຸລິດ ກໍໄດ້ສະແດງຄວາມຂອບໃຈຕໍ່ການຕ້ອນຮັບອັນອົບອຸ່ນ ແລະ ສະແດງຄວາມຍິນດີທີ່ໄດ້ພົບປະກັບ ສະຫາຍ ປະທານປະເທດ ໂຕ ເລິມ ອີກຄັ້ງ, ເຊິ່ງເປັນການພົບປະກັນຢ່າງເປັນທາງການ ເທື່ອທີ 2 ໃນຮອບ 2 ເດືອນ, ພ້ອມທັງໄດ້ສະແດງຄວາມຊົມເຊີຍຕໍ່ ສະຫາຍ ໂຕ ເລິມ ທີ່ໄດ້ຮັບເລືອກຕັ້ງໃຫ້ດໍາລົງຕໍາແໜ່ງເປັນເລຂາ ທິການໃຫຍ່ ຄະນະບໍລິຫານງານສູນກາງພັກກອມມູນິດ ຫວຽດນາມ ໃນກອງປະຊຸມສະ ໄໝສາມັນຂອງຄະນະບໍລິຫານງານສູນກາງພັກກອມມູນິດຫວຽດນາມ ສະໄໝທີ XIII ໃນວັນທີ 3 ສິງຫາ 2024 ທີ່ຜ່ານມາ, ເປັນການສະແດງໃຫ້ເຫັນເຖິງການຕີລາຄາສູງ ແລະ ຄວາມໄວ້ເນື້ອເຊື່ອໃຈຂອງພັກ, ລັດ ແລະ ປະຊາຊົນຫວຽດນາມອ້າຍນ້ອງທີ່ມີຕໍ່ສະຫາຍ, ເຊິ່ງເປັນໜ້າທີ່ອັນໜັກໜ່ວງທີ່ສຸດແຕ່ເຕັມໄປດ້ວຍກຽດອັນສະຫງ່າຫາສິ່ງອື່ນປຽບບໍ່ໄດ້.
ໃນທ່າມກາງບັນຍາກາດອັນໂສກເສົ້າສະຫຼົດໃຈ ແລະ ອາໄລອາວອນຢ່າງສຸດຊຶ້ງຕໍ່ການຈາກໄປຢ່າງບໍ່ມີວັນຫວນກັບຄືນຂອງ ສະຫາຍ ຫງວຽນ ຝູ໋ ຈ້ອງ ອະດີດເລຂາທິການໃຫຍ່ພັກກອມມູນິດຫວຽດນາມ. ສະຫາຍເລຂາທິການໃຫຍ່, ປະທານປະ ເທດ ທອງລຸນ ສີສຸສິດ ມີຄວາມເຊື່ອໝັ້ນຢ່າງໜັກແໜ້ນວ່າ: ພັກ, ລັດ ແລະ ປະຊາຊົນຫວຽດນາມອ້າຍນ້ອງ ພາຍໃຕ້ການຊີ້ນຳ-ນຳພາອັນສະຫລາດສ່ອງໃສຂອງພັກ ໂດຍມີ ສະຫາຍ ໂຕ ເລິມ ເປັນເລຂາທິການໃຫຍ່ ບັນດາສະຫາຍຈະຫັນເອົາຄວາມທຸກໂສກເສຍດາຍນີ້ ໃຫ້ກາຍເປັນເຫງົ້າແຫ່ງຄວາມສາມັກຄີທົ່ວປວງຊົນທັງຊາດ ເພື່ອສືບຕໍ່ກ້າວຂຶ້ນຢ່າງໜັກແໜ້ນ ແລະ ສ້າງສາປະເທດຫວຽດນາມ ກາຍເປັນປະເທດອຸດສາຫະກໍາຕາມທິດທັນສະໄໝ ແລະ ບັນລຸເປົ້າໝາຍປະ ຊາຊົນຮັ່ງມີຜາສຸກ, ປະເທດຊາດມັ່ງຄັ່ງເຂັ້ມແຂງ, ປະຊາທິປະໄຕ, ຍຸຕິທໍາ ແລະ ສີວິໄລ.
ພ້ອມກັນນີ້, ກໍໄດ້ສະແດງຄວາມເຫັນອົກເຫັນໃຈ ຕໍ່ຜົນກະທົບຂອງພາຍຸເລກ 3 (ຢາກິ) ທີ່ພັດເຂົ້າສູ່ພາກກາງ ແລະ ພາກເໜືອຂອງຫວຽດນາມ ໃນລະຫວ່າງວັນທີ 6-7 ກັນຍາ 2024 ຜ່ານມາ, ເຊິ່ງໄດ້ສ້າງຄວາມເສຍຫາຍຢ່າງໜັກໜ່ວງເຖິງຊີວິດ ແລະ ຊັບສິນຂອງປະຊາຊົນຫວຽດນາມອ້າຍນ້ອງ.
ໃນການພົບປະ, ສອງຝ່າຍໄດ້ແຈ້ງສະພາບການໂດຍຫຍໍ້ ການພັດທະນາເສດຖະກິດ-ສັງຄົມຂອງແຕ່ລະປະເທດໃຫ້ກັນຊາບ, ພ້ອມທັງໄດ້ຮ່ວມກັນປຶກສາຫາລື ແລະ ຕີລາຄາສະພາບ ການຮ່ວມມືສອງຝ່າຍ ໃນໄລະຍະຜ່ານມາ ກໍຄື: ທິດທາງແຜນການໃນຕໍ່ໜ້າ ລວມທັງໄດ້ແລກປ່ຽນຄໍາຄິດເຫັນບາງສະພາບການພົ້ນເດັ່ນ ຢູ່ພາກພື້ນ ແລະ ສາກົນ ທີ່ສອງຝ່າຍມີຄວາມສົນໃຈຮ່ວມກັນ; ສອງຝ່າຍໄດ້ຕີລາຄາສູງຕໍ່ສາຍພົວພັນມິດຕະພາບອັນຍິ່ງໃຫຍ່, ຄວາມສາມັກຄິພິເສດ ແລະ ການຮ່ວມມືຮອບດ້ານ ລະຫວ່າງ ສອງພັກ, ສອງລັດ ແລະ ປະຊາຊົນສອງຊາດ ລາວ-ຫວຽດນາມ ທີ່ໄດ້ຮັບການເສີມຂະຫຍາຍຢ່າງຕໍ່ເນື່ອງ ແລະ ເຂົ້າສູ່ລວງເລິກ ໂດຍໄດ້ມີການພົບປະ ແລະ ແລກປ່ຽນຢ້ຽມຢາມເຊິ່ງກັນ ແລະ ກັນຂອງການນໍາຂັ້ນສູງຢ່າງເປັນປົກ ກະຕິ. ການຮ່ວມມືທາງດ້ານການເມືອງ ສືບຕໍ່ມີຄວາມໄວ້ເນື້ອເຊື່ອໃຈ, ໜັກແໜ້ນ, ໝັ້ນທ່ຽງ ແລະ ນັບມື້ມີຄວາມໃກ້ຊິດສະໜິດສະໜົມກັນ; ດ້ານວຽກງານປ້ອງ ກັນຊາດ-ປ້ອງກັນຄວາມສະຫງົບ ມີການຮ່ວມມືດ້ວຍຫລາຍຮູບການ ແລະ ວິທີ ການທີ່ແໜ້ນແຟ້ນ, ມີຄວາມໃກ້ຊິດ ເພື່ອຮັບມືກັບສະພາບການໃໝ່ ທີ່ນັບມື້ນັບຜັນແປຢ່າງສະ ຫລັບສັບຊ້ອນ ແລະ ຮັກສາໄດ້ຊາຍແດນ ລາວ-ຫວຽດນາມ ໃຫ້ກາຍເປັນຊາຍແດນ ແຫ່ງສັນຕິ ພາບ ແລະ ການພັດທະນາແບບຍືນຍົງ; ການຮ່ວມມືດ້ານເສດຖະກິດ-ການຄ້າ ສືບຕໍ່ໄດ້ຮັບການເອົາໃຈໃສ່ຈາກພັກ, ລັດ ກໍຄື ບັນດາກະຊວງ, ຂະແໜງການຂອງສອງປະເທດ ໃນການປະຕິບັດເປົ້າໝາຍສູ້ຊົນທີ່ສອງຝ່າຍໄດ້ວາງອອກ ໃນການເພີ່ມມູນຄ່າການຄ້າສອງສົ້ນ, ເຊິ່ງໃນ 7 ເດືອນຕົ້ນປີ 2024 ນີ້ ບັນລຸໄດ້ 1,1 ຕື້ໂດລາສະຫະລັດ ເພີ່ມຂຶ້ນ 17% ຖ້າທຽບໃສ່ໄລຍະດຽວກັນໃນປີ 2023. ສໍາລັບ ການຮ່ວມມືດ້ານເຕັກໂນໂລຊີ, ວັດທະນະທໍາ-ສັງຄົມ ແລະ ການສຶກສາ ແມ່ນນັບມື້ນັບໄດ້ເພີ່ມທະວີ ແລະ ແຫນ້ນແຟ້ນຍິ່ງໆຂຶ້ນ ເຊິ່ງໃນປີ 2024 ນີ້ ລັດ ຖະບານຫວຽດນາມ ໄດ້ໃຫ້ທຶນການສຶກສາ ແກ່ພະນັກງານ ແລະ ນັກຮຽນ ໄປຮຽນຢູ່ ສສ ຫວຽດນາມ ໄລຍະສັ້ນ-ໄລຍະຍາວ ຈໍານວນ 1.120 ທຶນ.
ພ້ອມກັນນັ້ນ, ການນໍາຂອງທັງສອງປະເທດ ເຫັນດີຈະສືບຕໍ່ຮ່ວມກັນຈັດຕັ້ງປະຕິບັດຢ່າງມີປະສິດທິຜົນ ບັນດາຂໍ້ຕົກລົງຂອງການນໍາຂັ້ນສູງສອງປະເທດ ກໍຄື ບັນດາກະຊວງ, ຂະແຫນງການຕ່າງໆ ຢູ່ສູນກາງ ແລະ ທ້ອງຖິ່ນ ໂດຍສະເພາະບັນດາໂຄງ ການຮ່ວມມືຍຸດທະສາດ ໃຫ້ເປັນຮູບປະທໍາ ເປັນຕົ້ນ ແມ່ນໂຄງການທ່າທຽບເຮືອຫວຸງອາງ 1, 2, 3, ໂຄງການເສັ້ນທາງດ່ວນ ວຽງຈັນ-ຮ່າໂນ້ຍ, ໂຄງການພັດທະນາເສັ້ນທາງລົດໄຟ ວຽງຈັນ-ທ່າແຂກ (ຫວຸງອາງ), ໂຄງການກໍ່ ສ້າງໂຮງງານໄຟຟ້າຄວາມຮ້ອນ ຢູ່ ແຂວງເຊກອງ, ໂຄງການບໍ່ເກືອກາລີ ຢູ່ ແຂວງຄໍາມ່ວນ, ໂຄງການກໍ່ສ້າງ ສວນອຸທິຍານ ປະທານໂຮ່ຈີ່ມິນ ຢູ່ນະຄອນ ຫລວງວຽງຈັນ ແລະ ໂຄງການອື່ນໆ; ສືບຕໍ່ເພີ່ມທະວີການຮ່ວມມືດ້ານການເມືອງ, ການຕ່າງປະເທດ, ການປ້ອງກັນຊາດ-ປ້ອງກັນຄວາມສະຫງົບ, ການທ່ອງທ່ຽວ, ພະລັງງານ, ການກະສິກໍາ, ຊຸກຍູ້ການເຊື່ອມໂຍງທາງດ້ານເສດຖະກິດ ໂດຍເລີ່ມຈາກການເຊື່ອມໂຍງທາງດ້ານຄົມມະນາຄົມ ໃຫ້ຫລາຍຂຶ້ນລວມທັງການປັບປຸງ ແລະ ຍົກລະດັບດ່ານສາກົນຮ່ວມກັນ; ພ້ອມທັງເອົາໃຈໃສ່ປັບປຸງກົນໄກ ແລະ ສ້າງສະພາບແວດລ້ອມ ອັນເອື້ອອໍານວຍໃຫ້ແກ່ການລົງທຶນຂອງກັນ ແລະ ກັນ ທັງໂຄສະນາດຶງດູດນັກລົງທຶນຂອງກັນ ແລະ ກັນ ໂດຍສະເພາະແມ່ນນັກລົງທຶນເອກະຊົນລາຍໃຫຍ່ທີ່ມີທ່າແຮງ ໃນບັນດາຂະແໜງການທີ່ເປັນບູລິມະສິດ ເຊັ່ນ: ກະສິກໍາສະອາດ, ປຸງແຕ່ງແຮ່ທາດ, ດ້ານພະລັງງານ, ດ້ານເຕັກໂນໂລຊີ, ທ່ອງທ່ຽວ, ການປຸງແຕ່ງຜະລິດເປັນສິິນຄ້າ.
ພ້ອມກັນນັ້ນ, ສະຫາຍເລຂາທິການໃຫຍ່, ປະທານປະເທດ ທອງລຸນ ສີສຸລິດ ກໍໄດ້ຕາງໜ້າໃຫ້ພັກ, ລັດ ແລະ ປະຊາຊົນລາວອວຍພອນໄຊອັນປະເສີດເນື່ອງໃນວັນຊາດແຫ່ງ ສສ ຫວຽດນາມ ຄົບຮອບ 79 ປີ ກໍຄື ວັນສ້າງຕັ້ງສາຍພົວພັນການທູດລາວ-ຫວຽດນາມ ຄົບ ຮອບ 62 ປີ, ພ້ອມທັງໄດ້ສະແດງຄວາມຂອບໃຈ ແລະ ຮູ້ບຸນຄຸນເປັນຢ່າງສູງຕໍ່ການຊ່ວຍ ເຫຼືອອັນລໍ້າຄ່າ ແລະ ທັນການຂອງພັກ, ລັດ ແລະ ປະຊາຊົນຫວຽດນາມອ້າຍນ້ອງ ບໍ່ວ່າຈະຢູ່ໃນໄລຍະແຫ່ງການຕໍ່ສູ້ກູ້ຊາດໃນເມື່ອກ່ອນ ໂດຍສະເພາະໃນໄລຍະທີ່ ສປປ ລາວ ກໍາລັງຜະເຊີນກັບຄວາມຫຍຸ້ງຍາກທາງດ້ານເສດຖະກິດຄືປັດຈຸບັນ ສົມກັບຄໍາເວົ້າອໍາມະຕະທີ່ວ່າ “ເຂົ້າເມັດຫັກຜັກເສັ້ນດຽວກໍບິແບ່ງກັນກິນ” ກໍຄືການຊ່ວຍເຫລືອຜ່ານໂຄງການຕ່າງໆເຊັ່ນ: ໂຄງການສະໜາມບິິນໜອງຄ້າງ, ໂຄງການສ້າງຖານຂໍ້ມູນໃນການຄຸ້ມຄອງສໍາມະໂນຄົວ ແລະ ບັດປະຈໍາຕົວຂອງພົນລະເມືອງລາວ, ໂຄງການກໍ່ສ້າງສູນບໍາບັດປິ່ນປົວ ແລະ ຟື້ນຟູສຸຂະພາບຜູ້ຕິດຢາເສບຕິດ ກໍຄື ການສະໜັບສະໜູນ ແລະ ຊ່ວຍເຫລືອ ການເປັນປະທານອາຊຽນໃນປີ 2024 ຂອງ ສປປ ລາວ.
ສະຫາຍ ໂຕ ເລິມ ເລຂາທິການໃຫຍ່, ປະທານປະເທດ ແຫ່ງ ສສ ຫວຽດນາມ ໄດ້ສະແດງຄວາມຍິນດີຕ້ອນຮັບ ແລະ ຕີລາ ຄາສູງການເດີນທາງຢ້ຽມຢາມລັດຖະກິດ ທີ່ ສສ ຫວຽດ ນາມ ຂອງ ສະຫາຍ ປະທານປະເທດ ແຫ່ງ ສປປ ລາວ ພ້ອມດ້ວຍພັນລະຍາ ແລະ ຄະນະຜູ້ແທນຂັ້ນສູງ ໃນຄັ້ງນີ້, ເຊິ່ງຈະເປັນການປະກອບສ່ວນສໍາຄັນເຂົ້າໃນການຮັດແໜ້ນ ແລະ ເສີມຂະ ຫຍາຍສາຍພົວ ພັນມິດຕະພາບອັນຍິ່ງໃຫຍ່, ຄວາມສາມັກຄີພິເສດ ແລະ ການຮ່ວມມືຮອບດ້ານ ລະຫວ່າງ ສອງພັກ, ສອງລັດ ແລະ ປະຊາຊົນສອງຊາດ ລາວ-ຫວຽດນາມ ໃຫ້ແຕກດອກອອກຜົນຍິ່ງໆຂຶ້ນ.
