ພົຈວ ແກ່ນຈັນ ພົມມະຈັກ ຫົວໜ້າກົມຄຸ້ມຄອງສຳມະໂນຄົວ ແລະ ກໍ່ສ້າງຮາກຖານ ກະຊວງປ້ອງກັນຄວາມສະຫງົບ ທັງເປັນຄະນະຊີ້ນຳວຽກງານກໍ່ສ້າງຮາກຖານ ນະຄອນຫຼວງວຽງຈັນ ໄດ້ໂອ້ລົມຕໍ່ຄະນະພັກ-ຄະນະບັນຊາກອງບັນຊາການ ປກສ ເມືອງໄຊທານີ ນະຄອນຫຼວງວຽງຈັນ ໃຫ້ສຸມໃສ່ວຽກງານກໍ່ສ້າງຮາກຖານການເມືອງ ຕິດພັນກັບການກະກຽມປ້ອງກັນກອງປະຊຸມສຸດຍອດອາຊຽນ ຄັ້ງທີ 44-45 ທີ່ ສປປ ລາວ ຮັບກຽດເປັນເຈົ້າພາບໃຫ້ມີຄວາມສະຫງົບປອດໄພ 100%.
ໃນໂອກາດທີ່ ທ່ານຫົວໜ້າກົມຄຸ້ມຄອງສຳມະໂນຄົວ ແລະ ກໍ່ສ້າງຮາກຖານ ໄດ້ລົງເຄື່ອນໄຫວວຽກຢູ່ກອງບັນຊາການ ປກສ ເມືອງໄຊທານີ ກ່ຽວກັບວຽກງານຊຸກຍູ້ວຽກງານກໍ່ສ້າງຮາກຖານການເມືອງ ແລະ ວຽກງານກະກຽມໃຫ້ແກ່ການປ້ອງກັນກອງປະຊຸມສຸດຍອດອາຊຽນ ຄັ້ງທີ 44-45; ໂດຍມີ ພັທ ວຽງຄໍາ ຈັນທະວົງສາ ຫົວໜ້າກອງບັນຊາການ ປກສ ເມືອງໄຊທານີ, ມີການນໍາຂັ້ນເມືອງ, ຄະນະກອງບັນຊາການ, ຄະນະຫ້ອງ, ນາຍຕໍາຫຼວດ, ພະນັກງານຮາກຖານ ເຂົ້າຮ່ວມ.
ພ້ອມດຽວກັນນັ້ນ, ທ່ານໄດ້ມີຄໍາເຫັນວ່າ: ເພື່ອເຮັດໃຫ້ວຽກງານງານກໍ່ສ້າງຮາກຖານການເມືອງ ມີຄວາມເຂັ້ມແຂງ ພະນັກງານວິຊາສະ ເພາະທຸກພາກສ່ວນຂອງເມືອງ ເອົາໃຈໃສ່ວຽກງານການເມືອງ-ແນວຄິດ ເປັນບັນຫາຫຼັກ, ອັນນີ້ໝາຍເຖິງກອງບັນຊາການເມືອງ ຕ້ອງເປັນຫຼັກ ເປັນບ່ອນເຕົ້າໂຮມຄວາມສາມັກຄີ, ທັງໄດ້ຄົ້ນຄວ້າດ້ານລະບຽບຫຼັກການ, ແນວທາງ, ປກສ ກຸ່ມ, ພະນັກງານຮາກຖານ ຕ້ອງໄດ້ເອົາໄປຜັນຂະຫຍາຍລົງສູ່ຮາກຖານປະຊາຊົນ ເຮັດໃຫ້ຮາກຖານມີຄວາມສະຫງົບ ແລະ ຮັບປະກັນໄດ້ໃນໄລຍະກອງປະຊຸມສຸດຍອດອາຊຽນ ຄັ້ງທີ 44-45 ມີຄວາມສະຫງົບ 100%.
ສໍາລັບການຄຸ້ມຄອງການເໜັງຕີງຂອງພົນລະເມືອງຢູ່ໃນແຕ່ລະບ້ານ ຕ້ອງໄດ້ເອົາໃຈໃສ່ຕິດຕາມຄຸ້ມຄອງໃຫ້ແໜ້ນ ແລະ ກຳໃຫ້ໄດ້ເປົ້າໝາຍຂອງການມາພັກເຊົາ ແລະ ກໍາໃຫ້ໄດ້ເຮືອນເຊົ່າ, ຫ້ອງແຖວ, ຫ້າງຮ້ານ ໃຫ້ໄດ້ນັບທັງການເປີດ-ປິດຮ້ານບັນເທີງ, ຮ້ານກິນດື່ມ ຕ້ອງໄປຕາມການແຈ້ງການ, ການປະຈຳການຢູ່ໃນແຕ່ລະຈຸດ ໄລຍະກອງປະຊຸມ ບໍ່ໃຫ້ມີຜູ້ຂາດ, ການແກ້ໄຂປະກົດການຫຍໍ້ທໍ້ ຂໍໃຫ້ດຳເນີນໄປຕາມລະບຽບກົດໝາຍບໍ່ໃຫ້ສວຍໂອກາດ ແລະ ວ່ອງໄວ ທັງຮັບປະກັນໄດ້ຫຼັກການວິຊາສະເພາະ ແລະ ເປັນມືອາຊີບ.
ວຽກງານສຳມະໂນຄົວ ໃຫ້ບັນດາສະຫາຍເອົາໃຈໃສ່ເປັນພິເສດ ໃນໄລຍະຜ່ານມາ ຄະນະຊີ້ນຳ ກໍຄື ກະຊວງ ກໍໄດ້ກຳນົດອອກແລ້ວ ຄ່າທຳນຽມແມ່ນເທົ່າໃດ ບໍ່ໃຫ້ສວຍໂອກາດ ບໍ່ໃຫ້ກົດໜ່ວງທ່ວງດຶງ, ເປົ້າໝາຍການຂຶ້ນສຳມະໂນຄົວ ໃຫ້ບັນດາສະ ຫາຍເຂົ້າໃຈວ່າ ເນື້ອແທ້ແມ່ນຢາກຄຸ້ມຄອງໃຫ້ເຂົ້າສູ່ລະບຽບກົດໝາຍ ເຊິ່ງໃນທ້າຍປີນີ້ ທຸກຄອບຄົວຕ້ອງໄດ້ເຂົ້າຢູ່ໃນຖານຂໍ້ມູນ, ໃນນີ້ເມືອງຂອງພວກເຮົາຈະໄດ້ເຂົ້າຝຶກອົບ 5 ສະ ຫາຍ, ເຊິ່ງລັດຖະບານລາວ ແລະ ລັດຖະບານຫວຽດນາມ ໄດ້ເຊັນສັນຍາ.
ວຽກງານການແກ້ໄຂປະກົດການຫຍໍ້ທໍ້ ກໍເປັນວຽກງານໜຶ່ງທີ່ສຳຄັນຕ້ອງໄດ້ຍົກສູງຄຸນນະພາບ ແລະ ແກ້ໄຂບັນດາເປົ້າ ໝາຍໃຫ້ທັນເວລາ ໂດຍສະເພາະແມ່ນເປົ້າໝາຍຢາເສບຕິດ, ຂີ້ລັກງັດແງະປັດຈຸບັນເຫັນວ່າຫຼາຍກວ່າໝູ່ແມ່ນບັນຫາລັກລົດທີ່ສັງຄົມຕິດຕາມຢູ່ວ່າເປັນຫຍັງຈັ່ງແກ້ບໍ່ໄດ້, ກໍລະນີຈັບ, ກັກຕົວໄດ້ບັນດາເຄື່ອງຂອງກາງ ກໍຕ້ອງໄດ້ມອບໃຫ້ກອງບັນ ຊາການ ເປັນຜູ້ຄຸ້ມຄອງ ຖ້າຫາກຕ້ອງການຊົມໃຊ້ກໍຕ້ອງໄດ້ມີລາຍລັກອັກສອນອັນລະອຽດ.
