ໃນວັນທີ 14 ກັນຍາ 2024 ນີ້, ທ່ານ ພົອ ວິໄລ ຫຼ້າຄໍາຟອງ ຮອງນາຍົກລັດຖະມົນຕີ ລັດຖະມົນຕີກະຊວງ ປກສ ພ້ອມດ້ວຍຄະນະ ໄດ້ລົງເຄື່ອນໄຫວ ຕິດຕາມສະພາບນ້ຳຖ້ວມ ຢູ່ລຽບແຄມນ້ຳຂອງ ໃນນະຄອນຫລວງວຽງຈັນ ເປັນຕົ້ນຢູ່ເຂດ ທ່າເຮືອຫຼັກ 4 ບ້ານພັນໝັ້ນ ເມືອງສີສັດຕະນາກ ແລະ ບ້ານດ່ານຄຳ ເມືອງສີໂຄດຕະບອງ ເພື່ອລົງຊຸກຍູ້ ໃຫ້ກຳລັງໃຈ ຕໍ່ປະຊາຊົນ ທີ່ໄດ້ຮັບຜົນກະທົບຈາກໄພນ້ຳຖ້ວມໃນຄັ້ງນີ້, ພ້ອມທັງ ໄດ້ຊີ້ນໍາໃຫ້ກຳລັງ ປກສ ປກຊ ເອົາໃຈໃສ່ ຊ່ວຍເຫຼືອ ປະຊາຊົນ ແລະ ສ້າງຄູກັນນໍ້າໃຫ້ແຂງແຮງ ເພື່ອປ້ອງກັນບໍ່ໃຫ້ນໍ້າໄຫຼເຂົ້າຖ້ວມເຮືອນປະຊາຊົນ.
ໃນໂອກາດລົງເຄື່ອນໄຫວ ຕິດຕາມສະພາບນ້ຳຖ້ວມ ໃນຄັ້ງນີ້, ທ່ານ ພົອ ວິໄລ ຫຼ້າຄໍາຟອງ ຮອງນາຍົກລັດຖະມົນຕີ ລັດຖະມົນຕີກະຊວງ ປກສ ຍັງໄດ້ຕາງໜ້າ ໃຫ້ກອງທຶນຄຸ້ມຄອງໄພພິບັດຂັ້ນສູນກາງ ມອບເງິນ ຈຳນວນ 200 000 000 ລ້ານກີບ ໃຫ້ກອງທຶນຄຸ້ມຄອງໄພພິບັດຂັ້ນ ນະຄອນ ຫຼວງວຽງຈັນ ເພື່ອນໍາໃຊ້ເຂົ້າໃນການຊ່ວຍເຫຼືອປະຊາຊົນ ທີ່ໄດ້ຮັບຜົນກະທົບຈາກໄພພິບັດນ້ຳຖ້ວມ ຢູ່ນະຄອນຫລວງວຽງຈັນ ໃນປີ 2024. ຕາງໜ້າຮັບໂດຍ ທ່ານ ອາດສະພັງທອງ ສີພັນດອນ ເຈົ້າຄອງນະຄອນຫຼວງວຽງຈັນ ແລະ ໄດ້ມອບເຄື່ອງອຸປະໂພກບໍສິໂພກ ໃຫ້ບັນດາບ້ານ ກໍຄື ປະຊາຊົນ ທີ່ໄດ້ຮັບຜົນກະທົບ ຈາກໄພນ້ຳຖ້ວມ ຢູ່ 2 ເມືອງ ດັ່ງກ່າວ ຕື່ມອີກ.
ການລົງຄັ້ງນີ້ ແມ່ນຄວາມເປັນຫ່ວງເປັນໄຍ ຂອງພັກ-ລັດ ກໍ່ຄືການນຳກະຊວງ ປກສ ຕໍ່ກັບຊີວິດການເປັນຢູ່ ແລະ ຄວາມປອດໄພຂອງປະຊາຊົນ ແລະ ເພື່ອເປັນກຳລັງໃຈໃຫ້ ທຸກພາກສ່ວນທີ່ເປັນກຳລັງແຮງໃນການຕ້ານໄພພິບັດນໍ້າຖ້ວມໃນນະຄອນຫຼວງວຽງຈັນ ໃຫ້ຜ່ານພົນໄປດ້ວຍດີ.
