ວັນທີ 6 ກັນຍາ 2024 ພົຈວ ໜູຈອນ ກ້ອນທອງດໍາ ຫົວໜ້າກົມໃຫຍ່ພະລາທິການ ກະຊວງປ້ອງກັນຄວາມສະຫງົບ ແຫ່ງ ສປປ ລາວ ໄດ້ຕ້ອນຮັບການເຂົ້າຢ້ຽມຢາມຂອງ ພັອ ຫງວຽນ ວັນ ຫ່ຽນ ຮອງຫົວໜ້າອໍານວຍການໂຮງໝໍ 19.8 ກະຊວງປ້ອງກັນຄວາມສະຫງົບ ແຫ່ງ ສສ ຫວຽດນາມ ພ້ອມຄະນະ ເນື່ອງໃນໂອກາດທີ່ມາຢ້ຽມຢາມ ແລະ ກວດສຸຂະພາບໃຫ້ການນໍາຂັ້ນສູງຂອງກະຊວງປ້ອງກັນຄວາມສະຫງົບ ແຫ່ງ ສປປ ລາວ ລະຫວ່າງ ວັນທີ 5-6 ກັນຍາ 2024.
ໂອກາດນີ້, ພົຈວ ໜູຈອນ ກ້ອນທອງດໍາ ໄດ້ກ່າວສະແດງຄວາມຕ້ອນຮັບຢ່າງອົບອຸ່ນຕໍ່ ພັອ ຫງວຽນ ວັນ ຫ່ຽນ ພ້ອມດ້ວຍຄະນະ ແລະ ຕີລາຄາສູງຕໍ່ການມາຢ້ຽມຢາມ ແລະ ໃຫ້ການຊ່ວຍເຫຼືອກວດສຸຂະພາບການນໍາຂັ້ນສູງກະຊວງປ້ອງກັນຄວາມສະຫງົບ ແຫ່ງ ສປປ ລາວ ໃນຄັ້ງນີ້, ໃນທ່າມກາງທີ່ສອງພັກ-ສອງລັດ ແລະ ສອງກະຊວງ ປກສ ລາວ-ຫວຽດນາມ ພວມຢູ່ໃນການຈັດຕັ້ງບັນດາກິດຈະກຳທີ່ມີຄວາມໝາຍຄວາມສໍາຄັນຕ່າງໆ ເປັນຕົ້ນແມ່ນ ຂໍ່ານັບຮັບຕ້ອນສອງວັນປະຫວັດສາດ ກໍຄືວັນສ້າງຕັ້ງສາຍພົວພັນທາງການທູດ, ວັນເຊັນສົນທິສັນຍາມິດຕະພາບ ແລະ ການຮ່ວມມືລາວ-ຫວຽດນາມ ແລະ ອື່ນໆ. ພ້ອມນີ້, ທ່ານກໍຍັງໄດ້ສະເໜີໃຫ້ກະຊວງປ້ອງກັນຄວາມສະຫງົບ ແຫ່ງ ສສ ຫວຽດນາມ ກໍຄື ໂຮງໝໍ 19.8 ຈົ່ງສືບຕໍ່ໃຫ້ການຊ່ວຍເຫຼືອກະຊວງປ້ອງກັນຄວາມສະຫງົບ ແຫ່ງ ສປປ ລາວ ກໍຄືໂຮງໝໍ 5 ເມສາ ໃນການຊ່ວຍເຫຼືອກໍ່ສ້າງພະນັກງານ, ອຸປະ ກອນການແພດທີ່ມີຄວາມຈໍາເປັນ ຕື່ມອີກ.
ໂອກາດດຽວກັນນີ້, ພັອ ຫງວຽນ ວັນ ຫ່ຽນ ກໍໄດ້ກ່າວສະແດງຄວາມຂອບໃຈເປັນຢ່າງສູງມາຍັງທ່ານຫົວໜ້າກົມໃຫຍ່ພະລາທິການ ປກສ ພ້ອມຄະນະ ທີ່ໄດ້ໃຫ້ການຕ້ອນຮັບອັນອົບອຸ່ນ ພ້ອມທັງ ກ່າວສະເໜີລາຍງານຫຍໍ້ກ່ຽວກັບການຈັດຕັ້ງປະຕິ ບັດວຽກງານໃນໄລຍະຜ່ານມາຂອງໂຮງໝໍ 19.8 ກະຊວງປ້ອງກັນຄວາມສະຫງົບ ແຫ່ງ ສສ ຫວຽດນາມ ໂດຍສະເພາະ ໃຫ້ການຊ່ວຍເຫຼືອໂຮງໝໍ 5 ເມສາ ກະຊວງປ້ອງກັນຄວາມສະຫງົບ ແຫ່ງ ສປປ ລາວ ເປັນຕົ້ນ: ການຊ່ວຍຝຶກອົບຮົມໄລຍະສັ້ນໃຫ້ ພະນັກງານແພດໝໍ, ການຊ່ວຍຈັດຫາອຸປະກອນການແພດທີ່ຈຳເປັນ, ສົ່ງຊ່ຽວຊານມາສ້ອມແປງອຸປະກອນການແພດ ແລະ ຍັງຊ່ວຍເຫຼືອດ້ານອື່ນໆອີກຢ່າງຫຼວງຫຼາຍ.
ຈາກນັ້ນ, ພັອ ຫງວຽນ ວັນ ຫ່ຽນ ຮອງຫົວໜ້າອໍານວຍການໂຮງໝໍ 19.8 ກະຊວງປ້ອງກັນຄວາມສະຫງົບ ແຫ່ງ ສສ ຫວຽດນາມ ກໍຍັງໄດ້ມອບເຄື່ອງກວດ ຫູ, ດັງ, ຄໍ ຈໍານວນ 1 ຊຸດ ແລະ ຢາປົວພະຍາດ ຈໍານວນໜຶ່ງ ໃຫ້ໂຮງໝໍ 5 ເມສາ ຕາງໜ້າກ່າວຮັບໂດຍ ພົຈວ ໜູຈອນ ກ້ອນທອງດໍາ ຫົວໜ້າກົມໃຫຍ່ພະລາທິການ ກະຊວງປ້ອງກັນຄວາມສະຫງົບ ແຫ່ງ ສປປ ລາວ.
