ໃນວັນທີ 15 ຕຸລາ 2024, ຫ້ອງວ່າການ ກະຊວງ ປກສ ໄດ້ຈັດພິທີປະກາດດັດແກ້ຊັ້ນໃຫ້ພົນຕຳຫຼວດ, ເປັນປະທານໂດຍ ພົຈວ ອານຸເດດ ຄູນຄໍາ ຮອງຫົວໜ້າຫ້ອງວ່າການ ກະຊວງ ປກສ, ມີຄະນະພັກ-ຄະນະຫ້ອງວ່າການ, ຄະນະກົມ, ພ້ອມດ້ວຍນາຍ ແລະພົນຕໍາຫຼວດ ເຂົ້າຮ່ວມ.
ພັອ ນາງ ກົງຈີນ ລີນາວົງ ຮອງຫົວໜ້າຫ້ອງການເມືອງ ຫ້ອງວ່າການ ກະຊວງ ປກສ ໄດ້ຜ່ານຂໍ້ຕົກລົງຂອງ ກົມໃຫຍ່ການເມືອງປ້ອງກັນຄວາມສະຫງົບ ວ່າດ້ວຍການດັດແກ້ຊັ້ນໃຫ້ພົນຕໍາຫຼວດ ຫ້ອງວ່າການ ກະຊວງ ປກສ ດັ່ງນີ້: ດັດແກ້ຊັ້ນ ສິບໂທ ຂຶ້ນເປັນຊັ້ນ ຮ້ອຍໂທ ຈໍານວນ 2 ສະຫາຍ; ດັດແກ້ຊັ້ນ ສິບໂທ ຂຶ້ນເປັນຊັ້ນ ຮ້ອຍຕີ 26 ສະຫາຍ ຍິງ 7 ສະຫາຍ; ດັດແກ້ຊັ້ນ ສິບໂທ ຂຶ້ນເປັນຊັ້ນ ວາທີ 12 ສະຫາຍ ຍິງ 3 ສະຫາຍ ແລະ ດັດແກ້ຊັ້ນ ສິບໂທ ຂຶ້ນເປັນຊັ້ນ ສິບເອກ 2 ສະຫາຍ ປະດັບຊັ້ນໂດຍ ພົຈວ ອານຸເດດ ຄູນຄໍາ ຮອງຫົວໜ້າຫ້ອງວ່າການກະຊວງ ປກສ.
ໂອກາດນີ້, ພົຈວ ອານຸເດດ ຄູນຄໍາ ໄດ້ໂອ້ລົມຕໍ່ພິທີວ່າ: ການປະກາດການດັດແກ້ຊັ້ນໃນຄັ້ງນີ້ ເປັນການປະຕິບັດນະໂຍບາຍຂອງພັກ-ລັດ ທີ່ມີຕໍ່ນາຍ ແລະ ພົນຕຳຫຼວດ ຜູ້ທີ່ມີຜົນງານ, ມີຜົນສໍາເລັດໃນໜ້າທີ່ວຽກງານ, ຄົບມາດຖານ, ເງື່ອນໄຂ ແລະ ຜ່ານການຄົ້ນຄວ້ານໍາສະເໜີຂອງກົມກອງກ່ຽວຂ້ອງຕໍ່ຂັ້ນເທິງ. ໃນນັ້ນ, ໄດ້ສະແດງເຖິງຄວາມເຕີບໃຫຍ່ຂະຫຍາຍຕົວຂອງ ກໍາລັງປ້ອງກັນຄວາມສະຫງົບປະຊາຊົນ ເວົ້າສະເພາະແມ່ນກໍາລັງຫ້ອງວ່າການກະ ຊວງ ທີ່ຍາມໃດກໍມີຄວາມບຸກບືນຫ້າວ ຫັນ, ມີການປັບປຸງ ແລະ ພັດທະນາຕົນເອງໃຫ້ມີຄວາມເຂັ້ມແຂງທາງດ້ານກົງຈັກການຈັດຕັ້ງ ແລະ ກຳລັງພົນ.
ພ້ອມນີ້, ຍັງໄດ້ເນັ້ນໃຫ້ພົນຕໍາຫຼວດທີ່ໄດ້ຮັບການດັດແກ້ຊັ້ນ ສືບຕໍ່ເສີມຂະຫຍາຍມູນເຊື້ອ ແລະ ຜົນງານທີ່ຍາດມາໄດ້ ໃນໄລຍະຜ່ານມາ, ເອົາໃຈໃສ່ເພີ່ມທະວີຄວາມຮັບຜິດຊອບຂອງຕົນໃຫ້ສູງຂຶ້ນ, ກຳແໜ້ນແນວທາງແຜນນະໂຍບາຍຂອງພັກ, ລະບຽບກົດໝາຍຂອງລັດແຕ່ ລະໄລຍະ, ມີຄວາມໜັກແໜ້ນທາງດ້ານການເມືອງ-ແນວຄິດ, ມີຄວາມເຂັ້ມແຂງທາງດ້ານການຈັດຕັ້ງ, ເອົາໃຈໃສ່ເຮັດໜ້າທີ່ວິຊາສະເພາະຂອງຕົນດ້ວຍຄວາມຮັບຜິດຊອບສູງ, ເພີ່ມທະວີຄວາມສາມັກຄີພາຍໃນກົມກອງໃຫ້ແໜ້ນແຟ້ນ, ເສີມຂະຫຍາຍຄວາມສາມັກຄີກັບປະຊາຊົນບັນດາເຜົ່າຢ່າງກວ້າງຂວາງ, ດໍາລົງຊີວິດດ້ວຍຄວາມປອດໃສຂາວສະອາດບົນພື້ນ ຖານປະຢັດມັດທະຍັດບໍ່ຫຼິ້ນກິນຟຸມເຟື້ອຍ, ຕ້ານແນວຄິດສວຍໂອກາດ, ສວຍໃຊ້ໜ້າທີ່ຫາຜົນປະໂຫຍດທີ່ບໍ່ຊອບທຳ ທີ່ພາໃຫ້ເຊື່ອມເສຍບົດບາດຂອງກໍາລັງປ້ອງກັນຄວາມສະຫງົບ.
