ໃນຕອນເຊົ້າຂອງວັນທີ 4 ເມສາ 2024, ພົທ ກົງທອງ ພົງວິຈິດ ກໍາມະການສູນກາງພັກ ຮອງລັດຖະມົນຕີກະຊວງ ປກສ ພ້ອມດ້ວຍຄະນະໄດ້ຕ້ອນຮັບການເຂົ້າອວຍພອນຂອງ ພົຕ ປອ ສະຫວ່າງໄຊ ສິນນະວົງ ຫົວໜ້າຫ້ອງການ ຄະນະກຳມະ ການ ປກຊ-ປກສ ສູນກາງ ພ້ອມດ້ວຍຄະນະເນື່ອງໃນໂອກາດສະເຫຼີມສະຫຼອງວັນສ້າງຕັ້ງກໍາລັງປ້ອງກັນຄວາມສະຫງົບ ຄົບຮອບ 63 ປີ (5 ເມສາ 1961 -5 ເມສາ 2024).
ໂອກາດດັ່ງກ່າວນີ້, ພົຕ ປອ ສະຫວ່າງໄຊ ສິນນະວົງ ໄດ້ກ່າວຄໍາອວຍພອນ ແລະ ສະແດງຄວາມຢື້ຢາມຖາມຂ່າວມາຍັງນາຍ ແລະ ພົນຕຳຫຼວດທົ່ວກຳລັງປ້ອງກັນຄວາມສະຫງົບ ເນື່ອງໃນໂອກາດສະເຫຼີມສະຫຼອງວັນສ້າງຕັ້ງກຳລັງປ້ອງກັນຄວາມສະ ຫງົບ ຄົບຮອບ 63 ປີ, ເຊິ່ງເປັນວັນທີ່ມີຄວາມໝາຍຄວາມສໍາຄັນທາງປະຫວັດສາດ ແລະ ສະແດງໃຫ້ເຫັນເຖິງການເຕີບໃຫຍ່ຂະຫຍາຍຕົວ, ຜົນງານໄຊຊະນະຂອງກຳລັງປ້ອງກັນຄວາມສະຫງົບ ທີ່ໄດ້ຄຽງບ່າຄຽງໄຫຼ່ກັບກອງທັບປະຊາຊົນລາວ ແລະ ປະຊາຊົນບັນດາເຜົ່າຕໍ່ສູ້ກູ້ຊາດຈົນ ໄດ້ຮັບການປົດປ່ອຍຕະຫຼອດເຖິງໄລຍະສ້າງສາພັດທະນາປະເທດຊາດທີ່ຍາດມາໄດ້ໃນໄລຍະຜ່ານມາ.
ໂອກາດດຽວກັນ, ພົທ ກົງທອງ ພົງວິຈິດ ກໍໄດ້ກ່າວສະແດງຄວາມຂອບໃຈເປັນຢ່າງສູງມາຍັງ ພົຕ ປອ ສະຫວ່າງໄຊ ສິນນະວົງ ພ້ອມຄະນະ ທີ່ເຫັນໄດ້ຄວາມໝາຍຄວາມສໍາຄັນຂອງວັນສ້າງຕັ້ງກໍາລັງປ້ອງກັນຄວາມສະຫງົບ ແລະ ມາອວຍພອນໃນຄັ້ງນີ້, ຂໍອວຍພອນມາຍັງທ່ານຫົວໜ້າຫ້ອງການຄະນະກຳມະການ ປກຊ-ປກສ ສູນກາງ ພ້ອມຄະນະ ຈົ່ງມີສຸຂະພາບທີ່ແຂງແຮງ, ສໍາລັບປີໃໝ່ລາວໃກ້ຈະມາເຖິງນີ້ຂໍອວຍພອນໃຫ້ທຸກທ່ານຈົ່ງມີແຕ່ຄວາມຜາສຸກໃນຊີວິດສ່ວນຕົວ, ຄອບຄົວ ແລະ ການປະຕິ ບັດໜ້າທີ່ການເມືອງກໍຂໍໃຫ້ມີແຕ່ປະສົບຜົນສໍາເລັດ ແລະ ເຕີບໃຫຍ່ຂະຫາຍຕົວໃຫຍ່ຍິ່ງໆຂຶ້ນກວ່າເກົ່າ.
