ໃນວັນທີ 11 ມີນາ 2024 ທີ່ກະຊວງປ້ອງກັນຄວາມສະຫງົບ, ທ່ານ ພົນໂທ ກົງທອງ ພົງວິຈິດ ຮອງລັດຖະມົນຕີກະຊວງປ້ອງ ກັນຄວາມສະຫງົບ ແຫ່ງ ສປປ ລາວ ໄດ້ຕ້ອນຮັບການເຂົ້າຢ້ຽມຂໍ່ານັບຂອງ ທ່ານ ນາງ ມໍຣະກົດ ສີສະຫວັດດີ ເອກອັກຄະຣາຊະທູດ ວິສາມັນຜູ້ມີອຳນາດເຕັມແຫ່ງຣາຊະອານາຈັກໄທ ປະຈໍາ ສປປ ລາວ ເພື່ອລາຍງານກ່ຽວກັບຄວາມຄືບໜ້າໂຄງການຕ່າງໆຂອງສົມເດັດພຣະເທບໃຫ້ຄວາມຊ່ວຍເຫຼືອໂຮງຮຽນວັດທະນະທໍາປ້ອງກັນຄວາມສະຫງົບ.
ການພົບປະຄັ້ງນີ້, ທ່ານ ນາງ ມໍຣະກົດ ສີສະຫວັດດີ ກໍໄດ້ລາຍງານກ່ຽວກັບການສືບຕໍ່ປະຕິບັດໂຄງການຂອງສົມເດັດພະເທບທີ່ໄດ້ໃຫ້ການຊ່ວຍເຫຼືອໂຮງຮຽນວັດທະນະທໍາປ້ອງກັນຄວາມສະຫງົບ ກ່ຽວກັບການບູລະນະສ້ອມແປງອາຄານພາຍໃນໂຮງຮຽນເປັນຕົ້ນແມ່ນປັບປຸງອາຄານອ່າງເກັບນໍ້າ ແລະ ອຸປະກອນການຮຽນ-ການສອນ. ພ້ອມທັງປຶກສາຫາລືກ່ຽວກັບການພັດທະນາການຮຽນ-ການສອນຢູ່ໂຮງຮຽນດັ່ງກ່າວ. ໂອກາດນີ້, ຝ່າຍໄທ ກໍໄດ້ສະເໜີມາຍັງກະຊວງປ້ອງກັນຄວາມສະຫງົບ ແຫ່ງ ສປປ ລາວ ກ່ຽວກັບການຈັດສົ່ງນັກຮຽນໄປສຶກສາຕໍ່ຢູ່ຣາຊະອານາຈັກໄທ ຕື່ມອີກ.
ໂອກາດນີ້, ທ່ານ ພົນໂທ ກົງທອງ ພົງວິຈິດ ໄດ້ສະແດງຄວາມຂອບໃຈມາຍັງທ່ານເອກອັກຄະຣາຊະທູດຜູ້ມີອຳນາດເຕັມແຫ່ງຣາຊະອານາຈັກໄທ ປະຈໍາ ສປປ ລາວ ທີ່ໄດ້ຕິດຕາມການຊ່ວຍເຫຼືອສົມເດັດພະເທບກ່ຽວກັບໂຄງການພັດທະນາໂຮງຮຽນວັດ ທະນະທໍາປ້ອງກັນຄວາມສະຫງົບ ໃນໄລຍະຜ່ານມາ ທີ່ໄດ້ໃຫ້ການຊ່ວຍເຫຼືອຢ່າງຕໍ່ ເນື່ອງຕະຫຼອດມາໃນການສະໜອງທາງດ້ານອາຄານ, ອຸປະກອນການຮຽນ-ການ ສອນ, ສິ່ງອໍານວຍຄວາມສະດວກ ແລະ ການພັດທະນາທາງດ້ານການຮຽນ-ການສອນ.
ຂ່າວ: ບຸນຖິນ
