ກົມຄົ້ນຄວ້າວິທະຍາສາດ ແລະ ປະຫວັດສາດ (512) ກະຊວງ ປກສ ຈັດກອງປະຊຸມ ເປີດບັ້ນດຳເນີນຊີວິດການເມືອງ ປະຈໍາປີ 2023 ແລະ ເຊື່ອມຊຶມເອກະສານສຶກສາອົບຮົມການເມືອງ-ແນວຄິດ ເພື່ອດຳເນີນກອງປະຊຸມ 3 ຂັ້ນຂອງພັກໃນລະຫວ່າງ ວັນທີ 13-15 ກຸມພາ 2024 ໂດຍການເປັນປະທານ ຂອງສະຫາຍ ພົຈວ ສະແຫວງ ພົມມະລີ ຄະນະພັກກະຊວງ ເລຂາຄະນະພັກຮາກຖານ ຫົວໜ້າກົມ 512, ມີຄະນະພັກ-ຄະນະກົມ, ພະແນກ ພ້ອມດ້ວຍນາຍ ແລະ ພົນຕໍາຫຼວດ ເຂົ້າຮ່ວມ.
ສະຫາຍ ພົຈວ ສະແຫວງ ພົມມະລີ ກ່າວວ່າ: ການຈັດຕັ້ງດໍາເນີນຊີວິດການເມືອງຄັ້ງນີ້ແມ່ນຈະໄດ້ສຸມໃສ່ໃນການຄົ້ນຄວ້າ ເຊື່ອມຊຶມບັນດາເອກະສານທີ່ກ່ຽວຂ້ອງ. ພ້ອມກັນນັ້ນ, ສະມາຊິກພັກ ແລະ ມະຫາຊົນຍັງຈະໄດ້ຍົກສູງຄວາມຮັບຜິດຊອບຂອງຕົນເຂົ້າໃນການຂຽນໃບສຳຫຼວດ ແລະ ຈັດປະເພດ, ຕິດພັນກັບການສໍາຫຼວດກວດກາ, ຕຳນິສົ່ງຂ່າວເຊິ່ງກັນແລະກັນ ດ້ວຍຄວາມຈິງໃຈ, ຖືເອົາໂອກາດນີ້ ເພື່ອເປັນການກໍ່ສ້າງ-ປັບປຸງຕົນເອງ, ປັບປຸງວຽກງານຂອງບັນດາພະແນກ ແລະ ວຽກ ງານຂອງກົມໃຫ້ມີຄວາມໜັກແໜ້ນ, ເຂັ້ມແຂງ ແລະ ມີແບບແຜນທັນສະໄໝກ້າວຂຶ້ນຢ່າງບໍ່ຢຸດຢັ້ງເວົ້າສະເພາະ ເພື່ອຍົກສູງຄຸນນະພາບໃນການນໍາພາ-ບັນຊາໃນທຸກຂົງເຂດວຽກງານ, ທັງເປັນການສໍາຫຼວດກວດກາຄືນດ້ານຄຸນທາດການເມືອງ ແລະ ຄຸນສົມບັດສິນທຳປະຕິວັດ, ດ້ານສະຕິຕໍ່ການຈັດຕັ້ງ, ການປະຕິບັດລະບຽບຂອງກຳລັງ ແລະ ກົດໝາຍຂອງລັດ, ດ້ານແບບແຜນວິທີນໍາພາ-ແບບແຜນວິທີເຮັດວຽກ ແລະ ດ້ານຄວາມຮັບຜິດຊອບຕໍ່ໜ້າທີ່ການເມືອງຕາມ 5 ເນື້ອໃນຂອງສະມາ ຊິກ ແລະ 5 ເນື້ອໃນສໍາລັບມະຫາຊົນ ເພື່ອຕີລາຄາ ແລະ ຍົກໃຫ້ເຫັນດ້ານດີ-ຜົນສຳເລັດ, ດ້ານອ່ອນ-ຂໍ້ຄົງຄ້າງທີ່ເປັນບັນຫາທີ່ຕັ້ງຂຶ້ນໃນໄລຍະ 1 ປີ ຜ່ານມາ ແລະ ເປັນພື້ນຖານກໍານົດທິດທາງແກ້ໄຂໃນຕໍ່ໜ້າ ເພື່ອສ້າງການຫັນປ່ຽນໃໝ່ຢ່າງແຂງ ແຮງ, ນອກຈາກການເຊື່ອມຊຶມເອກະສານດຳເນີນຊີວິດການເມືອງແລ້ວ, ຍັງຈະໄດ້ພ້ອມກັນເຊື່ອມຊຶມ, ກຳແໜ້ນເອກະ ສານສຶກສາອົບຮົມການເມືອງ-ແນວຄິດ ສໍາລັບສະມາຊິກພັກ, ພະນັກງານຫຼັກແຫຼ່ງ ເພື່ອກະກຽມ ແລະ ດໍາເນີນກອງປະຊຸມໃຫຍ່ 3 ຂັ້ນຂອງພັກ.
ເອກະສານທີ່ນຳມາເຜີຍແຜ່ເຊື່ອມຊຶມຄັ້ງນີ້, ປະກອບມີເສີມຂະຫຍາຍທາດແທ້ມູນເຊື້ອປະຕິວັດອັນສະຫງ່າຂອງກໍາລັງປ້ອງ ກັນຄວາມສະຫງົບປະຊາຊົນລາວ, ຕັ້ງໜ້າຝຶກຝົນຫຼ່ໍຫຼອມສິນທຳປະຕິວັດ ແລະ ປັບປຸງແບບແຜນວິທີເຮັດວຽກຂອງນາຍ ແລະ ພົນຕໍາຫຼວດ ໃນໄລຍະໃໝ່, ເອກະສານຈັນຍາບັນຂອງນາຍ ແລະ ພົນຕໍາຫຼວດ, ຍົກສູງຄວາມສາມາດນໍາພາ ແລະ ຄວາມເປັນແບບຢ່າງນໍາໜ້າຂອງສະມາຊິກພັກ, ບົດໂອ້ລົມຂອງສະຫາຍເລຂາທິການໃຫ່ຍບໍລິຫານງານສູນກາງພັກ ປະທານປະເທດ ແຫ່ງ ສປປ ລາວ, ບົດແນະນໍາການຂຽນໃບສໍາຫຼວດ, ຄຳແນະນຳຂອງຄະນະໂຄສະນາອົບຮົມສູນກາງພັກ, ຕັ້ງໜ້າຝຶກຝົຫຼ່ໍຫຼອມຄຸນທາດການເມືອງ ແລະ ຄຸນສົມບັດສິນທຳປະຕິວັດ ແລະ ເອກະສານເດັດດຽວແກ້ໄຂປະກົດການຫຍໍ້ທໍ້ໃນຖັນແຖວພະນັກງານ ແລະ ສະມາຊິກພັກ.
ຂ່າວ: ແກ້ວ
