ວິທະຍາຄານຕໍາຫຼວດປະຊາຊົນ ກະຊວງ ປກສ ປະກາດການແຕ່ງຕັ້ງນາຍຕໍາຫຼວດຂຶ້ນເປັນຮອງຫົວໜ້າອໍານວຍການວິທະຍາຄານຕໍາຫຼວດປະຊາຊົນໃນ ວັນທີ 1 ສິງຫາ 2023 ໂດຍການເປັນກຽດເຂົ້າຮ່ວມຂອງ ພົຕ ວັນທອງ ກອງມະນີ ກໍາມະການສູນກາງພັກ ຮອງລັດຖະມັນຕີ ຫົວໜ້າກົມໃຫຍ່ການເມືອງ ປກສ, ມີຄະນະອໍານວຍການ, ຄູ-ອາຈານ ແລະ ນາຍຕໍາຫຼວດເຂົ້າຮ່ວມ.
ພັອ ວັນໄຊ ຈັນທະສຸກ ຮອງຫົວໜ້າກົມພະນັກງານ ກົມໃຫຍ່ການເມືອງ ປກສ ໄດ້ຜ່ານຂໍ້ຕົກລົງ ຂອງລັດຖະມົນຕີ ກະຊວງປ້ອງກັນຄວາມສະຫງົບ ເລກທີ 1451/ປກສ, ລົງວັນທີ 19 ກໍລະກົດ 2023 ວ່າດ້ວຍການແຕ່ງຕັ້ງນາຍຕໍາຫຼວດ ທີ່ຂຶ້ນກັບວິທະຍາຄານຕໍາຫຼວດປະຊາຊົນ; ໃນນັ້ນ, ແຕ່ງຕັ້ງ ພັອ ບຸນຮຽງ ສອນສົມບັດ ເປັນຮອງຫົວໜ້າອໍານວຍການວິທະຍາຄານຕໍາຫຼວດປະຊາຊົນ ສ່ວນຫົວໜ້າ ແລະ ຮອງທີ່ມີຢູ່ແລ້ວແມ່ນຮັກສາໄວ້ຄືເກົ່າ.
ໃນໂອກາດນີ້ ພົຕ ວັນທອງ ກອງມະນີ ກໍາມະການສູນກາງພັກ ຮອງລັດຖະມັນຕີ ຫົວໜ້າກົມໃຫຍ່ການເມືອງ ປກສ ໄດ້ສະແດງຄວາມຍ້ອງຍໍຊົມເຊີຍຕໍ່ນາຍຕໍາຫຼວດທີ່ໄດ້ຮັບການແຕ່ງຕັ້ງໃຫ້ເປັນຮອງຫົວໜ້າອໍານວຍການວິທະຍາຄານຕໍາຫຼວດປະຊາຊົນຜູ້ໃໜ່ ພ້ອມທັງເນັ້ນໜ້ກໃຫ້ສືບຕໍ່ນໍາພາ-ບັນຊາເຮັດວຽກງານວິຊາສະເພາະຂອງຕົນທີ່ໄດ້ຮັບມອບໜາຍໃນຄັ້ງນີ້ໃຫ້ສົມຄູ່ກັບຕໍາແໜ່ງໃໜ່, ເພີ່ມທະວີຄວາມສາມັກຄີໃນໝູ່ຄະນະໃຫ້ແໜ້ນແຟ້ນ, ສຸມທຸກເຫື່ອແຮງ, ສະຕິປັນຍາ ເຂົ້າໃນການຄົ້ນຄວ້າ ເຂົ້າໃນວຽກງານການຮຽນ-ການສອນ ເພື່ອປະກອບສ່ວນເປັນກໍາລັງແຮງ ແລະ ເປັນຄັນທຸງໃນການບໍາລຸງ-ກໍ່ສ້າງ, ຍົກລະດັບຄວາມຮູ້-ຄວາມສາມາດໃຫ້ນາຍ ແລະ ພົນຕໍາຫຼວດ ໃນກໍາລັງປ້ອງກັນຄວາມສະຫງົບປະຊາຊົນໃຫ້ມີຄຸນນະພາບອັນໃໝ່ ຍິ່ງໃຫຍ່ກວ່າເກົ່າ.
